¹ Nguno anyun eng' tuguk che kimwae ko kit ne o ko ni: kitinye tisiindet ne o ne kikotebee eutab tai ne bo ng'echeretab Torornatet eng' kipsengwetisiek. ² Inendet ko kiboitiot eng ole tilil, emait ne bo iman ne kilume Kiptaiyat, ama chito. ³ v 3 Amu kitorori tisiindet age tugul ne o si kogoito kagochinoik ak tiseiywek. Noto anyun ko nyolu kotinye agine tisiindeni kito ne igoitoi. ⁴ Nda mito Kristo ng'weny, nda maegu tisiindet inendet, amu mi icheket che igoitoi kagochinoik ko u biteetab ng'atutiet. ⁵ Boisie icheget eng' kaborunet ak uruetab tuguk che bo kipsengwet. Ko u ye kigitechi Musa Jehovah ye kimache kotonon emait: Kimwa Jehovah kole, ''Rib si iyai tuguk tugul kou kergeindo ne kigiborun eng' tulwet''. ⁶ Ago nguno Kristo ko kigotaach boisiet ne kararan kosiir, ko u eng' noto ko agine ko katuiyoindet ne bo arorutiet ne kararan kosiir, ne kigiyai eng' inendet kayomisutik che kororon kosiir. ⁷ Amu nda kima ko rartaat arorutiet ne bo tai, ko ki ta makechengjini boroindo ne bo aeng'. ⁸ Amu ye kingo nyorji lelutik biko, komwa kole; ''Ogeero, mwae Kiptaiyat kole bwanii betusiek, che tun kiyomisyinige kayomiset ne leel koboto gotab Israel ak gotab Juda. ⁹ Ma ko u kayomiset ne kigiyomisge, ak kwanisiekwai eng betut ne kianam eunekwai si amut komong eng' emetab Misiri. Amu kima kas iit kayomisenyu, ak kima tamage kiy icheket- mwaei Kiptaiyat. ¹⁰ Ako ni kayomiset ne tun kiyomisyinige ak gotab Israel ye ibata betusiechoto- mwae Kiptaiyat. Andenoi ng'atutikchu kabkatutikwai, ak asire kogeny eng mugulelwekwai. Aegu Jehovah neng'wai ak koek icheket bikchu. ¹¹ Ama koneti chi age tugul chitab kokwenyi anan konet chi ne tupcho, ak koleji 'Nai Kiptaiyat,' Amu tun konaa chi tugul, kong'ete ne mining' eng' icheket kot koit ne o. ¹² Amu tun ariree icheket amu tengekwogikwai, ama tun anani tengekwogikwai agoi. ¹³ Amu kingogure arorutieni "ne leel," ko kibarasta kole kigometo arorutiet ne bo tai, ago noto kakemeto ak koosit ko legit kobetito.