¹ Amu Mechizedekinito, laitoriatab Salem, tisiindetab Jehovah ne Toror Mising, ne kituiyo ak Abram kingowechekei kobunu boriet eng' ole kibare laitorinik ak kiberur [Melchizedek] inendet. ² Nito ko inendet ne kipchechi Abram kebebertab taman ne bo tugul. Kainennyi ne bo tai ko "laitoriatab imanda" ak yeityo kogeny ko "laitoriatab Salem", noto ko "laitoriatab kalyet". ³ Ne matinye kwan, ama tinye kamet, ama tinye oreng'wai, ama tinye taunetab betusiek, anan kagesunetab sobet. Ago kegergei ak Weritab Jehovah, tebchei ko tisiindet koigeny. ⁴ Ogeer anyun ole ki tee oindab chichi ne kigoochi Abram boiyot ne o kebebertannyi bo taman ne bo barunoikchii. ⁵ Ak tinyei iman werikab Lawi che namei boisietab tisisiet ko kiking'at konam kebeberwekab taman kobun biko kou eng' ng'atutiet, noto ko tupchosiekchi agot nga nda kibunu bortab Abram. ⁶ Ago kinam Melkidedek kebeberwekab taman kobun Abram, nga nda inendet ko kima kiitito inendet eng' oreng'wai ak koberur inendet, ne kitinye kayomisutik. ⁷ Ak ko mami tiiyet age tugul kele nyoru ne mining' kaberuret eng' ne o. ⁸ Ak eng' nito, kotaachei biko che begu kebeberwekab taman, kobate eng' nito kigibaorian kele sobe agoi. ⁹ Ak kimuchi anyun kemwa kele, eng Lawi ne kitaache kebeberwekab taman, ko kigoito agine eng Abram, ¹⁰ amu kita komi bortab kwandanyi Lawi kingotuitos Melkizedek ak Abram. ¹¹ Ak nda kiimugakse keityi kagesunetabge eng tiseinatetab Lawi [amu kinyorune yoto biko ng'atutiet], ko kita kimage nee kobiit tisiindet age ne u ole ki u Melkizedek, ama kiyai ko u ole ki u Aron? ¹² Amu ngot kowalak tiseinatet, ko matiny agoi kewal agine ng'atutiet. ¹³ Amu inendet ne kimwaitae tuguchu ko bo bororiet age, ne mami chi eng' bororionoto ne kigobois eng' kaptisisio. ¹⁴ Amu toogu komie kele Kiptaiyandennyo ko kibunu oretab Juda, bororiet ne kimang'alale Musa ng'olyo age tugul agobo ng'alekab tisiik. ¹⁵ Che kimwae ko toogu komie kosiir kele biitu tisiindet age eng' kergeindab Melkizedek. ¹⁶ Nito kigiyai ago ma eng' oretab ng'atutikab borto, ago eng' kimnatetab sobondab koigeny. ¹⁷ Amu baoriani sirutik agobo inendet kole: ''ii tisiindet koigeny ko u kit ne ki u Melkizedek''. ¹⁸ Ama kele kikiisto kityo ng'atutiet ne kiga kendoune amu nyalulenyi ako amu ma til kiy- ¹⁹ ako amu ma yai ng'atutienoto kiy koek ne igesunotge-- ak kora ibunetab kamang'unet ne keigei ne kirikchine Jehovah kosiir. ²⁰ Ako ki makiyai koek tisiindet ko mami murtoet! Alak ko kiek tisiik ko makimurto, ²¹ kobate kigiyai inendet [Jeiso] koek tisiindet eng inendet ne kimwochi kole, " Kikomurto Kiptaiyat ama walei kapkotutikchi kole: ii tisiindet koigeny". ²² Eng nito anyun ko kiek Jeiso tononjinindet ne bo arorutiet ne kararan kosiir. ²³ Tisiik che ki bo betusiek che kikosirto ko ki chang, amu kitaee icheket meiyat si matebi. ²⁴ Ako anyun amu sobei Jeiso koigeny, kotinyei tiseinatet ne magiwalei. ²⁵ Eng noto anyun komuchi kogeny kosor agoi kasuldaet icheget che bwanjini Jehovah kobun inendet, amu sobe inendet si kosae agobo icheket. ²⁶ Amu kinyolu ketinye tisiindet ne o, ne tilil , ne matinye kenisiet, ama tinye muruonindo, ne itabanat eng' kiptengekinik ak kigitoror kosiir kipsengwetisiek. ²⁷ Ne manyoljini kogoito tiseiywek betut age tugul, ko u tisiik chuun ki eechen che kiigoitoi korok agobo tengekwogikwai, ngotar kogoito agobo che bo biko. Kiyai noto [Jeiso] konyil agenge ak koem ye kingogoitoge. ²⁸ Amu kiindenoi ng'atutiet bich che nyalulyotin koek tisiik che eechen. Ago eng' ngolyotab murtoet, ne kibiitu let eng' ng'atutiet, ko kilewen Werit, ne kigeyai koek ne igesunotge koigeny.