¹ Amu tinye ng'atutiet uruetab tuguk che kororon che bwanii, ago ma itondong'wai. Tuguchuto ko maimuchi koyai icheket che rikyini Jehovah koek che igesunotinge eng' tiseiywechoto igoitoi tisiik kotugul eng' kenyit age tugul. ² Nda kima u noto, ko tos kima kiagebagakta kigoitoi? Amu kita kinga kotilil che sae konyil agenge ko kimata kotinye kabkateetab tengekwogik kogeny. ³ Ago eng' tiseiywechoto komito kabkatetab tengekwogik kenyit age tugul. ⁴ Amu maimugakse eng' korotikab kirugik ak ngororek koisto tengekwogik. ⁵ Eng noto anyun ye kingocho Kristo ng'weny, konyo komwa kole, "Kima imach tiseiywek ak kagochinoik, ago kiichobko borto; ⁶ kima ibaibaitu eng' kagochinoik che kibeele komugul ak kogochinoik che bo tengekwogik. ⁷ Amwa anyun ale, 'keero, angni anee- ko u ye kigisir agobo ane eng' bukuit- ayai mageng'ung, ee Jehovah."' ⁸ Ne tai komwa kole, "Ki ma imach anan ibaibaitu eng' tiseiywek, ak kagochinoik, anan ko kagochinoik che kibeele komugul, nda ko che bo tengekwogik. Ama ibaibaitu eng choto. ⁹ Yeityo komwa anyun inendet [Jeiso] kole, " Keero, kaanyo ayai mageng'ung." Noto anyun, istoi atebto ne bo tai, asi kigimit atebto ne bo aeng. ¹⁰ Eng' maget noto, kigitililech anyun kobun kagoitoetab bortab Jeiso Kristo konyil agenge ak koem. ¹¹ Iman, tisiindet age tugul kotononi eng' betut age tugul koboisie ak kogoitoi konyil che chang- tiseiywechoto che magoi imuchi koisto tengekwogik. ¹² Ago tisiindeni [ Kristo] ko ye kingo kagogoito tiseiywot konyil agenge agobo tengekwogik, kotebe anyun eutab tai ne bo Jehovah. ¹³ Koganyi kong'ete yoto agoi keyai bunikchi koek ng'echeretab kelyekchi. ¹⁴ Amu eng kagoitoet agenge ko kigoyai icheket che kitilili koek che igesunotinge koigeny. ¹⁵ Ak baorianwech agine Tamirmiriet Ne Tilil. Ne tai komwae kole, ¹⁶ ''Ni ko arorutiet ne tun kiyomisyinige ak icheket ye ibata betusiechoto, mwae Kiptaiyat. Andeni ng'atutikchu mugulelwekwai, ak asirjini eng kabkatutikwai''. ¹⁷ Ak kotesyi kole, "Ama abwati chalwogikwai ak tengekwogikwai kogeny." ¹⁸ Nguno anyun ole mito nyoetab kaat ne bo chuto, komakomi kogeny kagoitoet agobo tengekto. ¹⁹ Amu noto anyun che kitupche, kitinye nyiganatet kechut ole tilil mising amu eng' korotikab Jeiso. ²⁰ Noto ko oret ne leel ak kosobe, ne kiyatwech kechute kebundoe anget ne kigebesio, ne noto ko kobun bortanyi. ²¹ Amu kitinye tisiindet ne o ne bou gotab Jehovah, ²² ongerikte anyun eng' muguleldo ne bo imanda, ak eng' kayanet ne nyitat ko kagetis mugulelwekcho ak kemete kabwatet ne ya, ak kiun borwekcho eng' beko che tililen. ²³ Ongenam mising', ng'ang'etab kamang'unennyo, amu bo iman inendet ne kiiaroru. ²⁴ Ak ongebkaat mising ole kicheerteige achege eng' achege, kigimitige eng chamnyet ak boisionik che kororon. ²⁵ Ama kibagakte ketuitosi achege eng achege, ko u ye kigoyai alak. Ago, ongecheerge achege eng achege, ko u yo ogeere ole rigu betut. ²⁶ Amu ngot keyae tengek kekwetyini ko kagetaach naetab imanit, ko ma komi tiseiywot age kogeny ne bo tengekwogik. ²⁷ Ago kito ne kang'et ko kagenet eng' kaiyweisiet ne bo kiruoget, ak koromnatetab mat ne igesu bunikab Jehovah. ²⁸ Chito age tugul ne kasas ng'atutietab Musa komee amamii rirenet eng' baorinik aeng' anan ko somok. ²⁹ Obwatitoi ano akwe, ago ng'wanitu ne tia biret ne tun nyoljini kiruokyine inendet ne kigotiech Weritab Jehovah, ak koiit korotikab arorutiet che kitilile inendet koek tuguk che ma tililen, ak kosas Tamirmirietab mieindo? ³⁰ Amu kinget inendet ne kigomwa kole, nenyu yaaktaetab mugetut, ane ne ayaaktoi". Ak kogeny, "Ko iruokyini Kiptaiyat bikchi." ³¹ kit ne ngw'an mising' ngibutyi eunekab Jehovah ne sobe! ³² Ago obwat ye kingo kagegonok lapkeiyet eng betusiek che ki bo keny, ole kiomuitoji boriet ne o eng' nyalilwogik. ³³ Ye kioegu eng' kasarta age che kitangangjini eng' katewerisiosiek ak kanyalilosiek, ak eng' kasarwek alak ko kiotoretige koboto icheket che kicham keyachini ko u noto. ³⁴ Amu kiorire icheket che ki ratotin, ak ocham eng' boiboiyet kesarenak tugukwok. Amu kiongen ole otinye magornatet ne kararan kosiir choto ago ne tebche koigeny. ³⁵ Amowirte anyun nyiganateng'wong,' ne tinye melekto ne o. ³⁶ Amu nyolu otinye muitaet, si ye kaoyai magetab Jehovah, omuch otaach tuguk che kiyamis. ³⁷ Amu ta komi kasarta kitigin mising', si kocho inendet ne nyonii ama ienege. ³⁸ Ago sobe nenyu ne bo imanda eng' kayanet. Ak ngot kochuchuchge, ko mabaibaitu sobondanyu eng' inendet." ³⁹ Ago ache ko mabotech icheget che ichuchuchige kobendi luset, ago kimite ak icheket che iyani ak kosor sobonwekwai.