¹ Ara anyun kayanet ko naetab tuguk che kimang'u ak kaborunetab tuguk che tomo kegeer. ² Amu eng nito ne kigibaorianjine boisiekcho che bo tai agobo kayaneng'wai. ³ Eng kayanet kenae kele kigiyai kipsengwetisiek eng ng'olyotab Jehovah, noto anyun tuguk che kigeere ko kima kiyae tuguk che toogu. ⁴ Eng' kayanet ko kiigochi Abel Jehovah tiseiywot ne kararan kosiir ne bo Kain, ne kigibaorianjine inendet kele ki bo imanda, ak kibaorian Jehovah agobo kagochinoikchi, ak eng' kayanet ko agot ng'anda kigome ko ta kong'alali Abel. ⁵ Ki eng' kayanet ko kigimut Enok si mageer meet. Ak kimata kogeer chi inendet, amu kiimut Jehovah. Amu kiga kibaorian agobo inendet ye kitomo kimut kele kiibaibai Jehovah. ⁶ Ak ngo mami kayanet ko ma imugaksei kibaibai inendet. Amu inendet ne chonjini Jehovah konyoljini koyan kole mi inendet ak ko igochini inendet melekto icheket che cheng'e inendet. ⁷ Ki eng' kayanet si koyai Noa melit, kot kosor gonyi ye kingo kageteechi agobo tuguk che kitomo kegeere, amu kiiywei Jehovah. Kigiruokchine ng'weny nito anyun, akoek inendet ne kinam imanda ne biitu eng' kayanet. ⁸ Eng' kayanet ko kigas iit Abraham ye kingeguur, ak kimanda ak kwo koret ne ki maingen, kwo komosta ne ki tun kotaach koek borotet. ⁹ Eng' kayanet ko kiek kiprutoiyot eng' emetab kayamisutiet, ko u emet ne ma nenyi. Kimeng'oti emaisiek koboto Isak ak Jakobo, che ki che name kayamisutienoto koboto inendet. ¹⁰ Amu kiiganyi nganaset ne tinye lumeiywek, ne teegindennyi ak yaindennyi ko Jehovah . ¹¹ Ki eng' kayanet, ko kisiich agine Sara kimnatet nga nda ki sonet, ak komanach ko kagosiirto kenyisiekyi. Amu kiit kole bo iman inendet ne kikochini kayomiset. ¹² Noto anyun, kobun chichi agenge----ne kiga koige ne kigome---- ko kigisiich biko che chang ko u kokelikab kipsengwet ak kipsiaiyet che mi tabandab araraita che ma iitokistos. ¹³ Eng' kayanet ko kimeiyo chuto tugul ama taach kayomisutichu. Ago kiga kogeer kityo, ak koboiboitu kota komi ole loo, ko kagong'any kole ki toek ak ko kiprutoinik icheket eng' ng'weny. ¹⁴ Amu icheket che mwae tuguk che u choto, koboru kole cheng'e emet ne neng'wai. ¹⁵ Ak nda kiga kibwati iman agobo emoni kimong'une, ta kinyoru boroindo koweektage. ¹⁶ Ago ko u ole u, ko mache missing emet, ne kararan kosiir, noto ko ne bo kipseng'wet inegei. Ak ma ililandoige Jehovah agobo icheket keguure Jehovah neng'wai, amu kigochopchi icheket nganaset. ¹⁷ Eng' kayanet ko kiigoito Abraham Isak, kingetiem inendet . Ee kiigoito werinnyi ne kigisich inegei, inendet ne kigataach kayamisutik. ¹⁸ Inendet Abram ne kiga kimwoji keleji, "Tun kemwoitoe Isak iyoteng'ung". ¹⁹ Kiit anyun Abram kole imuchi Jehovah kong'eet Isak agot eng' che kigobek, ak kitaach inendet ak kowechge si koek kaborunet. ²⁰ Eng' kayanet ko kiiberur Isak Jakobo ak Esau eng' tuguk che bwanii. ²¹ Eng' kayanet ko kiiberur Jakobo werik tuwai che bo Josep ye ki legit kome, ak kosa kotiegei walitab kiroktannyi. ²² Eng' kayanet ko kimwa Josep agobo mandaetab legukab Israel ye ki legit kome, ak kogon ng'atutiet agobo kowoikchi. ²³ Eng kayanet ko kiuny sigikchi Musa eng' arawek somok kingo kagesich, amu kiga geer kole ki lakwet ne kararan. Ak kima iywei ng'atutietab laitoriat. ²⁴ Eng' kayanet ko kitai Musa, kingo kagoeet keguure weritab cheptab Parao. ²⁵ Kilewen keyachi che yaachen koboto bikab Jehovah kosiir kobaibaige eng' boiboiyosiekab tengekto che bo betusiek che matia. ²⁶ Kiit tewernatet ne kiteweri agobo Kristo kole magornatet ne o kosiir konoraik che bo Misiri, amu kiiganyi melektonnyi. ²⁷ Eng' kayanet kobagakta Musa Misiri. Ama iywei neregekab laitoriat, amu kimuita ko u yo kikeerei inendet ne ma toogu. ²⁸ Eng' kayanet ko kiyai Pasaka, ak isisietab korotik, si ma twa israelik ne kibare werik che bo tai. ²⁹ Eng' kayanet ko kibun orit ne bo araraita ne Birir ko u yo bunei emet ne yaamat. Ak kingolen kotiem Misirik koyai ko u nito, kelugui icheget. ³⁰ Eng' kayanet ko kilulyo irimoikab (tiikab) Jeriko, kingo kagemut betusiek tisab. ³¹ Eng' kayanet ko ma me chepkukoniot ne kigiguure Rahab koboto icheket che ki ng'elelik, amu kigataach segeik eng' kalyet. ³² Ara anyun, nee age ne ta kemwae? Amu mamii boroindo ngot amwa agobo Gideon, Barak , Samson, Jepta ak agobo Daudi ak Samuel ak Maotik. ³³ Ki eng' kayanet koterter bounatosiek, ak koyai imanda, ak kotaach Kayamisutik. Kiger kutuswekab ng'etunyik, ³⁴ kiimis kimnatet ne bo mat, kichilile rotwetab chok, kigigimit eng' nyalulateng'wai, kigimegitu eng' luget, ak kiterter askarikab luget chebo bunik. ³⁵ Kitaach kwonyik bikwai che kiga komeiyo, che kiging'eet. Alak kenyalil, ago ki taiyo ketiach, si kobiit kosiich ng'eetyet ne kararan kosiir. ³⁶ Ak kigitiem alak eng' chombilet ak eng' birosiekab kipcharitisiek, ee ak kogeny eng' ratisiosiek ak toorjinetab korgoret. ³⁷ Kigiwir alak eng' koik. Kigibet kobun aeng eng' musumenosiek. Kigibar eng' rotwetab chok. Kiilogoti ngoraikab kechirek ak che bo ng'ororek. Kibononsot, kiginyalil ak keyachini che yaachen. ³⁸ Che kima konyoljini ng'weny icheket. Kiombenoti eng' ong'atosiek ak tulondok, ak eng kebenonik ak keringonikab ng'weny. ³⁹ Nga nda bichu tugul ko kinyor chamet ak kobaorianji Jehovah amu kayaneng'wai, koma taach iche kayamisutiet. ⁴⁰ Amu kigasib kochobgech Jehovah kito ne kararan kosiir, si ma kiyai ichegei koek che igesunotinge ama kimi.