¹ Noto anyun, amu kimutech boldet ne kindet ne bo baorinik eng' komoswek tugul, ongelelektee kobaa taban nyigisin age tugul ak tengekto ne sib kong'wilech. Ak ongeruei eng muitaet ak eng' kabeletab ge ne kigindenoiwech tainyo. ² Ongegeer Jeiso, ne taunindet ak ko kawong'unindet ne bo kayanet. Ne kimuita eng' kimurtoiyot amu boiboiyet ne kigindeno tainyi, ak kosas kalilanet ak kigotebe eutab tai ne bo ng'echeretab laitornatet ne bo Jehovah. ³ Obkat mising' inendet ne kimuita eng' kirindaet ne bo kiptengeginik ak kanyalilet agobo inendet, si mojosye ak otanuise eng' sobonwekwok. ⁴ Tomo ogirinde tengek kot kotumdage korotik, obarege ak tengekto; ⁵ ak kioutie kakaigaet ne ng'alalwok oii werik kolejinok: "Werinyu, amesas kotigonetab kiptaiyat, anan itanui ye kerin kong' inendet. ⁶ Amu inendet ne chame kiptaiyat kotigoni, ak kobire werit age tugul ne taache." ⁷ Omuitee anyun eng nyalilwogik amu kotigonet. Yaiywok Jehovah ko u noto, ko u ye yaachini werik. Ara werit anonoo anyun ne maitigoni kwanit? ⁸ Ago ngot ko motinye kotigonet, ne kiginyorune ache tugul yamdaet, oboe sorbuch anyun, mo ii werik. ⁹ Ngot ko kigitinye kwanisiek che bo borwekcho che kiitigonech ago kigigonyitii icheket, ko tos kaigai ne tia kimining'ityige Kwanda ne bo tamirmiriet ak kesopche! ¹⁰ Amu kiitigonech kwanisiekcho eng' betusiek che ng'ering' ko u ye kigeere kole kararan. Ago Jehovah kotigonech agobo toretennyo, si keegu che kiemtei tililindanyi. ¹¹ Ma toogu kotigonet age tugul kele bo boiboiyet eng' betunoto, ago konu kaimutik. Ago ye ibata koiichi icheget che kiginet logoekab kalyet choto ko logoekab imanda. ¹² Eng noto anyun onamji barak eunek che nyalulyotin, ak kutung'oik che meiyotin. ¹³ Ak oyachi kelyekwok ortinwek che lititen, si ma kimaas icheket che ing'waltos, ago si kinya ak kesoob. ¹⁴ Ogiilge ak otebi eng' kalyet koboto biko tugul, ak tililindo, amu ngo matinye chi ko memuchi kogeer Kiptaiyat. ¹⁵ Oribge si ma rarchi chi age tugul mieindab Jehovah, si mabiit tigitiotab ng'wanindo ak koet si ko koon kaimutik, ak komuruon che chang, ¹⁶ si mabiit ne sokse, anan chito ne meiywei Jehovah, ko u Esau ne kialda etunennyi ne bo siget agobo amdit agenge. ¹⁷ Kingomach eng' let konam kaberuret ketae, amu onget ole kimasich boroindo ne bo sigunet, nganda kicheng mising' eng' beekab kong. ¹⁸ Amu ma obwanji tulwet ne kimuchi ketiiny, tulwet ne lale ko u maat, anan tuindo, ak mesundeito ak kipchurchuriet. ¹⁹ Ma obwbaa ole mi cheetab iriaget, anan ko twegunet ne bo tuget ne ngalali ngalek ne kisom icheket che kigas kole si matata ketes kemwoji icheket ng'olyo age. ²⁰ Amu kima komuji komuita eng' ng'olyondonoto kiging'at kele: "Agot ngo tiiny tiony tulwet kewiree koik ne matiny." ²¹ Ak eng' kioto kitook, ko kito ne ang'oss ak kiimui biich mising', kot kole agine Musa, ''Aiywei ak abotani.'' ²² Ago ne siire anyun, ko kaobwaa akwe tulwetab Sion, ak ng'anaset ne bo Jehovah ne sobe, Jerusalem ne bo kipsengwet, ak tuiyosiek elfusiek tamanusiek che bo malaikaisiek che mi eng boiboiyet . ²³ Kaoitu tuiyet ne o ne bo kiboret, biko tugul, ak kaniset ne bo che kigesir eng' kipseng'wet. Kaobwanji Jehovah, kiruogindetab tugul, ak ne bo tamirmirik che bo bikab imanda che kigeyai koek che igesunotinge. ²⁴ Ak Jeiso katuiyoindetab arorutiet ne leel, ak korotikab iset che ng'alali ne kaigai kosiir che bo Abel. ²⁵ Ogeer si motaiye inendet ne ng'alali. Amu ngot ko kimachililyo icheket ye kingotaiyo inendet ne kiitechini icheket eng ng'weny, kechililtei ano anyun ache ngot keistoege inendet ne iteu eng kipsengwet. ²⁶ Eng kasarta agenge, ko kitumtum ng'weny kutinyi. Ago kagoaror anyun ra kole, "ta ketyini atumtumi kogeny ng'weny, ago ma ng'weny inegei, ago koboto kipsengwet agine." ²⁷ Ago eng' ng'olyondonito, kamwa kole, "ta ketyini", koboru istoetab tuguk che kimuchi kitumtum, ko u eng' tuguk che kigeyai, si kobiit kong'et tuguk choto che ma kitumtumi. ²⁸ Noto anyun, amu kigetaach ache bounatet ne magimuchi kitumtum, ko ongeegu che tinye kongoi ak ko u nito keyai boisiet ne iboiboi Jehovah mising', eng' teegisto ak kaiyweet . ²⁹ Amu Jehovah nenyo ko mat ne igesu.