¹ Ingotestai chamnyet nebo tupchosiek. ² Amatouitye otaach toek. Amu kigotaach alak malaikaisiek eng' noto ko maingen. ³ Obwati icheget che ratotin ko u yo oratatin tugul. Obwati icheget che kinyalili ko u yo omi ak akwe eng' boroto. ⁴ Ingogonyit chi tugul katunisiet, amat koek kitogut ne tinye simdo, amu tun iruokyini Jehovah biko che sokse ak che ibege. ⁵ Ingoek atebeng'wong' ne matinye chametab silingisiek. Ingoemak tuguk che otinye, amu kigomwa Jehovah inendet kole, " Magoi abagakten, ama goi ameten." ⁶ Ingoemech anyun tuguk che ketinye si kenyoru nyiganatet kemwa kele, "Toretindennyu Kiptaiyat, maiyweisiei. Tos itaa nee chi? ⁷ Obwati icheket che indoiywok, icheket che kimwawok ng'olyotab Jehovah, ak ye obwati ogeere ole kiteptoi atebosiekwai. Oyai ko u ye kiyae iche eng' kayanengwai. ⁸ Kerge Jeiso Kristo eng' amut, rani, ak agoi koigeny. ⁹ Ama ta ogany kobeetok kanetisiosiek che besiotin ak che ter. Amu kararan kolumdaak muguleldo eng' mieindo, ago ma eng' amitwogik che matoreti kiy icheket che bendote choto. ¹⁰ Kitinye anyun kaptisisiet ne ma kichamjini icheket che boisie eng' emait koamis. ¹¹ Amu korotikab tiong'ik che kigibare agobo tengekwogik ko kiibu tisindet ne o kobwa ole tilil, ak kigibeelei borwekab tiong'ichoto eng' nganaset sang'. ¹² Noto anyun kinyalil agine Jeiso eng' ormarich sang ne bo nganaset, si kobiit kotilil biko eng' korotikyi. ¹³ Ongebe anyun ole mi inendet eng' sang'utab ormarich, keibe tewernatet ne kimuitoji inendet. ¹⁴ Amu makitinye eng' yu nganaset ne tebche koigeny. Ago kicheng'e noto chonii. ¹⁵ Eng inendet, ko ongigochi Jehovah kotugul korosekab kalosunet, noto ko lokoekab kutuswek che ilosu kainenyi. ¹⁶ Amata kiutie keyai che kororon ak kagoitoetab tuguk che kitinye, amu baibai mising' Jehovah eng' korosek che u choto. ¹⁷ Ogas iit che indoiywok ak omining'ityige icheket, amu ripse agobo sobonwekwok, ko u che tun tetu agobo boisieng'wai. Ogas iit si kobiit koyai boisionoto eng' boiboiyet, ama eng arogenet, si maek buch eng akwe. ¹⁸ Osaiwech, amu kiyani kele kitinye tugul kabwatet ne kararan, ak kemache ketebi eng' atebet ne chulat eng tuguk tugul. ¹⁹ Ak asomok mising' kot koit ale oyai ko u noto (Osaiwech), si kosib keweekwo anyo ole omite. ²⁰ Ingoyaak Jehovah ne bo kalyet, ne kiimut mestowot ne o ne bo kechirek komong eng' che kikomeiyo, eng' korotik che bo kayomiset ne bo koigeny, inendet noto kiptaiyandennyo Jeiso. ²¹ Oegu anyun che ochobotin eng' boisiet age tugul ne kararan, si oyai magenyi, yae eng' ache che chamakse mising' eng' tainyi, eng' Jeiso Kristo, ne nenyi torornatet koigeny ak koigeny. Amen. ²² Ago acheerok mising' anyun tupchosiechu ale, omuite eng' ng'olyotab kagimitet, amu kaasiruak eng' ng'alek tutigin. ²³ Onai ole kogitiach tupchenyo Timoteo, ago ngot konyo ko legit ko tun anyoni ageerok koboto inendet. ²⁴ Ogat tugul che indoinywok ak bikab Jehovah tugul che tililen. Igatok che bunu Italia. ²⁵ Ingotebi mieindo kobotok akwe tugul..