¹ Amu tisiindet age tugul ne o, ne kigilewen eng' biko, ketorori kotebe yoto agobo biko amu tononjinetab tuguk che tokchinige Jehovah, si kobiit kogoito kagochinoik ak tiseiywek agobo tengekwogik. ² Inendet ko imuchi korire che mengen kiy, ak che ki keberber, amu inendet agine komi eng' nyalulnatet. ³ Amu nito anyun, ko u ye nyoljini kogoito che kitisisie agobo tengekwogikab biko, konyoljini kogoito agine agobo tengekwogikchi. ⁴ Ama mi chi ne igochinigei teegisi inegei. Kobate ye kaguur Jehovah inendet ko u Aron. ⁵ Ko u noto anyun, kima itororgei Kristo agine koyaige koek tisiindet ne o. Kobate mi inendet ne king'alalji koleji ; "ii Werinyu; rani kaaeku Kwandang'ung'." ⁶ Ko u ye mwae agine eng komosta age kole, " ii tisiindet koigeny ko u ole ki u Melkisedek." ⁷ Ki eng' betusiek che kimi eng' borto, ko kiigoito Kristo sautik ak samutik eng' rirek che kasunotin, ak beekab kong' korirjini Jehovah, ne imuchi kosor inendet eng' meet, ako kigigasyi amu kaiyweenyi ne kiywei Jehovah eng' sobenyi. ⁸ Agot nganda ki Werit inendet, ko kiinetgei kasetab iit eng' tuguk tugul che kinyorune nyalilda. ⁹ Kigiyai inendet koek ne igesunotgei, ak kiek inendet taunetabge nebo yetunetab koigeny eng' tugul che kase iit inendet. ¹⁰ Ak kiguure Jehovah inendet tisiindet ne o ko u ye ki u Melkisedek. ¹¹ Kitinye anyun che kimwae agobo Jeiso che chang,' kobate korom ole kemwoitei, amu kigo uiit eng' akwe ogaste. ¹² Nga nda eng kasari konyolu koegu konetik, kogagonyoljok kogeny kocho chito age si konetak konetisiosiek che bo tai che bo ng'alekab Jehovah. Amu kioegu che mache chego, ama amitwogik che uuen. ¹³ Amu age tugul ne kiguue chego ko tomo konai, anan koityi koboisie komie ng'olyotab imanda, amu ta ko lekwet ne mining'[manyurut] inendet. ¹⁴ Ago amitwogik che uuen ko bo biko che eechen. Chuto ko amu kikosoiyo icheget, koboisie kaguiyeng'wai ak komuchi kobesio che kororon ak che yaachen.