1 Yo ta komi kayomiset ne bo keit kamuungenyi, ongiywei anyun, si mabiit chi age tugul eng akwe ne mwae kole matanyoru. 2 Amu kigiamwech iman logoiywek che tililen ko u icheget. Ago eng' kaset ko ma toret ng'olyot icheget che kima ing'ol ak kayanet, kou icheget che kigas iit eng tai. 3 Amu ache che kigeyan keite kamuung'enoto kou yo kigomwa inendet kole, "Ko u ye kiamurte eng' neregekchu ale, maite icheket kamuung'enyu, nganda kiga kogesgei boisionichoto kong'ete ngab kelumda ng'weny. 4 Amu kigomwa eng orit age agobo betutab tisab kole: "Ak kiimuny Jehovah eng' betutab tisab eng' boisionikchi tugul". 5 Ak eng' yu komwa kokeny kole, "Maite icheket kamuung'enyu." 6 Eng' noto anyun, kegeere kele mito boroindo ne bo alak koit kamung'enoto, ago icheget che kinyor boroindo ak keamji logoiywek che tililen ko kimata koit amu ng'elelnatet. 7 Ak kogeny komwa Jehovah agobo betut age, ne kiguure "Rani" kingong'alal kobun Daudi ko kagobata betusiek alak kole: "Rani ko u ye kisib kemwa kele, ngot ogas tugenyi rani ko mat ouuit mugulelwekwok." 8 Amu nda kigaa kogochi Josua icheket kamuung'et, nda kima ta komwae eng' let Jehovah agobo betut age. 9 Ara ng'etunot anyun kamung'etab sabato agobo bikab Jehovah. 10 Amu inendet ne kagoit kamuung'etab Jehovah, kogagomuuny eng' boisionokyi, ko u ye kimuuny Jehovah agine eng chechi. 11 Ongegilge anyun si keit kamuung'enoto, si maibutyi chi age tugul kergeindab ngelelnateng'wai ne kiyai. 12 Amu sobe ng'olyotab Jehovah ak ko serser, ak ko ng'atip kosir rotwetab chok ne ng'atiben komoswek tuwai. Ak toorei agoi kobesio sobondo ak tamirmiriet, ak ole tuiyechini kowoik ak amset, ak komuchi koguiyo kabwatutik ak magutikab muguleldo. 13 Ama mi kiy age tugul ne kigiyai ne ung'at eng' taitab konyekab Jehovah, ako sulotin tuguk tugul eng taitab konyek che bo inendet ne tun kitetyini atebosiekcho. 14 Amu kitinye tisiindet ne o ne kigochut ak komanda kipsengwetisiek, noto Jeiso Weritab Jehovah, ko ongenam anyun mising' ng'ang'enyo. 15 Amu magitinye tisiindet ne o ne maimuchi korirenech eng ny'alulnatosiekcho, ago kitinye ne kigityem inendet ko u ache eng' tuguk tugul, kobate matinyei tengek. 16 Ongetenden anyun kerikchi ng'echeretab riranet eng nyiganatet, asi ketaach mieindo ak kenyoru rirenet netoretech eng' kasarta ne mi nyalilda.