¹ Noto anyun, che kitupche che tililen, yamdoik che bo kursetab kipsengwet, obwat mising' ne kiyoktoi ak tisiindet ne o ne bo ng'ang'enyo, inendet Jeiso . ² Ne kiek ne kiyani eng'Jehovah ne kileweni inendet, ko u ye kiyai Musa agine eng' gotab Jehovah kotugul. ³ Amu kigiit Jeiso kele nyoljini inendet torornatet ne o kosir Musa, ko u yo kiiti kele tinye teegisto inendet ne kiteeche got kosiir got. ⁴ Amu go age tugul ko teechei chito, ago Jehovah ne kiitechei tuguk tugul. ⁵ Ak eng' iman ko kiek Musa ne kiyani eng' gotab Jehovah tugul, ako baoriani agobo tuguk che tun kimwae eng betusiek che bwanii. ⁶ Ago Kristo ko ne kiyani ko Werit ne bou kotab Jehovah. Acheget ke ii gonyi ngot kenam mising' nyiganatennyo ak kamang'unet ne kiwolegei. ⁷ Noto anyun, ko u yo mwaei Tamirmiriet ne Tilil kole: "ngot ogas kutinyi rani ⁸ Koma to uuit mugulelwekwok ko u ngelelnatet, ak ko u eng' betutab tiemisiet eng' ong'atet. ⁹ Nito ko ye kingongelelso kwanisiekwok ak kotiema, nga nda kiagogeer boisionikchu ¹⁰ kenyisiek artam. Eng' noto anyun ko kianerekchi ebenoto. Ak kiamwa ale, 'ichilili kotugul eng mukulelwekwai. Tomo konai ortinwekchu.' ¹¹ Ko u ye kiamurte eng' neregekyu ale: 'Maite icheket kamuung'enyu.' ¹² Oripge anyun che kitupche si mabiit chi age tugul eng' akwe netinye muguleldo ne ya ne bo bistoet (ne matinye kayanet), muguleldo ne istoegei Jehovah ne sobe. ¹³ Ago oteechinigei betut age tugul, ko te ko ta kemwaei kele "rani,'' si ma kinach [kiuit] chi age tugul eng' akwe amu kenisietab tengekto. ¹⁴ Amu kigeegu yamdoikab Kristo ngot kenam mising' nyiganatennyo eng inendet kong'etee taunet agoi kagesunet. ¹⁵ Agobo nito ko kikemwa kele, "ngot ogas kutinyi rani, ko mat ouiit mugulelwekwok ko u eng' tagisiet". ¹⁶ 16 Amu ng'o che kingogas ko ki tagis? Tos ma icheket tugul che kimong'une Misiri kondochini Musa? ¹⁷ Ak ng'o che kinerekchi inendet kenyisiek artam? Tos ma icheket che kicholwogenso, che kibekyi muswekwai ong'atet? ¹⁸ Ak ng'o che kimurto inendet kole maite kamuung'enyi, tos, ma icheket che kiingelelji inendet? ¹⁹ Eng' noto anyun kegeere kele kima imuch icheket koit amu ma iyan.