¹ Eng' noto anyun kanyoljech kenam mising kosiir tuguchuto kigegas, si ma kichuchuge. ² Amu ngot ko ki tononot ng'olyot ne kigimwaei kobun malaikaisiek, ago age tugul ne kiginyorji bistoet ak ngelelnatet konyoru melektonnyi ne emegei eng imanda, ³ kichilildoi ano anyun ngeleste yetunet ne o ne te ni? Ni ko sigunet ne kitoi kobarasta Kiptaiyat ak kiigimitwech icheket che kigas. ⁴ Ak eng' kasarata ko kibaorian agine Jehovah koboto icheget eng kaborunoik, ak kwong'utik che ter ter, koboto kamugosiek che terotin, ak eng' kagoitosiekab Tamirmiriet ne Tilil ko u magenyi. ⁵ Amu maigochi Jehovah malaikaisiek koboi ng'wenyut ne chonii, ne noto anyun kimwae ago bo. ⁶ Ako baoriani chito age eng' komasta age kole, "Nee chi, ne tos ibwat? Anan ko weritab chi ne tos image kiy? ⁷ Kiyai inendet komining'it ng'atigin eng' malaikaisiek; ilaakchi inendet kutwetab torornatet ak tegisto. ⁸ Kiindene tuguk tugul kogas it inendet eng' keldebesaikab kelyekchi." Amu ki eng inendet anyun ne kiindeno Jehovah tuguk tugul kogas it inendet. Maituch kiy ne ma kase it inendet. Ago ra kotomo kegeer kogase it tuguk tugul inendet. ⁹ Ago kigeere inendet (Jeiso) ne kigiyai eng kasarta kitigin komining'it kosir malaikaisiek ko kigilaakyi kutwet ne bo torornatet ak teegisto amu nyalilda ne bo meet, si kobiit kochamcham meet eng mieindab Jehovah agobo chi age tugul. ¹⁰ Amu kinyolji inendet ne mi tuguk tugul amu inendet ak kora kobunu tuguk tugul inendet, koek ne imutyini werik che chang' torornatet. Si koyai koek taunindetab yetuneng'wai ne igesunotge eng' nyalilwogik. ¹¹ Amu inendet ne itililisie ak icheget che kitilili kobunu orit agenge. Eng' noto anyun ko ma ililani inendet koguure icheket che kitupche. ¹² Ak kole, "Amwachini kaineng'ung' tupchosiekchu, atieni kalosuneng'ung' eng' kwenutab tuiyet." ¹³ Ak kogeny, ''amang'u inendet''. Ak kogeny, "keer ami yu ak leguk che kigogona Jehovah". ¹⁴ Ak ko u yo emdoi anyun leguk korotik ak borto, koginam agine inendet borto nebo chito ko u noto, si kobiit kong'em eng' oretab meet inendet ne tinye kimnatetab meet, noto ko chesawil. ¹⁵ Si kobiit kotiach icheget tugul che ki ratotin eng' betusiekwai tugul amu kaiyweisietab meet. ¹⁶ Amu eng' iman ko kimakotoreti malaikaisiek, ago ki kitoreti kesuwekab Abraham. ¹⁷ Eng' noto anyun ko kinyolji keyai inendet eng' tuguk tugul kogergeit ak tupchosiekyi, si kobiit koek tisiindet ne o ne bo rirenetabge ak ko bo iman eng' tuguk che tokyinge Jehovah, ak koyai tisisiet agobo tengekwogikab biko. ¹⁸ Amu ko u yo kinyalil inendet ye kigitieme, komuchi agine kotoret icheket che bune tiemutik.