¹ Ngot ko ki kong'eetak anyun Jehovah koboto Kristo, ocheng tuguk che mi barak, ole mi Kristo kotebche eng eutatab tai ne bo Jehovah. ² Obwati tuguk che mi barak, ma tuguk che mi ngweny. ³ Amu kiimei, ak kigiuny sobondang'ung koboto Kristo eng Jehovah. ⁴ Tun ngo took Kristo, ne inendet ko sobondang'ung, otoogu anyun ak akwe koboto inendet eng torornatet. ⁵ Obar anyun kebeberwekwok che mi ngweny-sokset, simdo, magutik che samisen, magutik che kimen, maget ne ya ak magetab tugun, noto ko saetab kanamonik. ⁶ Nyonjini nerekekab Jehovah werikab ngelelnatet amu tuguchuto. ⁷ Eng tuguchuto che kiobendote ak akwe eng tai, kingo ta omeng'isiei eng tuguchuto. ⁸ Ago omete ak akwe tuguchuto tugul; nyitatet, neregek, yaitiet, chemereret, ak morisiet eng kutuswekwok. ⁹ Amomwochige lembech, amu kioregu chito nebo keny koboto boisionikyi, ¹⁰ ak kiolaach chito ne leel, ne kiwalei koleelit eng naet kogergeit ak itondab inendet ne kiyae inendet, ¹¹ ole ma mi Yunanindet, nda ko Yahudiot, ne imuratanat ak ne ma imuratanat, bunotio, sitiaindet, ne otwogin, ne itiagat, ago Kristo ko tugul eng tugul. ¹² Noto anyun, amu oii che kilewen Jehovah, che tililen ak che chamotin, olaach muguleldo ne bo rirenetabge, talasiet, kamining'etabge, mutyonet ak muitaet. ¹³ Omuitochige. Oegu che rirege akwege eng akwege. Ngo tinye chi age tugul ngolyo akobe age, ko u yo kinyoiwok kaat Kiptaiyat, oyai ko u noto ak akwe. ¹⁴ Ne sirei tugul, otes eng tuguchuto tugul chamnyet, noto ratutiet ne bo kagesunetabge. ¹⁵ Ingoboywok kalyetab Kristo eng mugulelwekwok. Ki amu eng kalyet ko kigikurchok nito eng borto agenge. Ak omwae kongoi. ¹⁶ Ingomenyok ng'olyotab Kristo eng mogornatet eng ngomnatet tugul onetige ak oteechinige eng tienwogikab kalosunet ak tienwogik ak tienwogikab tamirmiriet, otienjini Jehovah ak wektaetab kongoi eng mugulelwekwok. ¹⁷ Ak kito age tugul ne oyae, eng ngolyot anan ko eng boisiet, oyai tugul eng kainetab Kiptaiyat Jeiso. Owekchi Jehovah Kwanda kongoi kobun inendet. ¹⁸ Osotichu, ogas it manongotoikwok, ko u ye nyolu eng Kiptaiyat. ¹⁹ Manongotaichu, ocham osotikwok, amogochi ng'wanindo icheget. ²⁰ Legochu, ogas it sigikwok eng tuguk tugul, amu iboiboi nito mising Kiptaiyat. ²¹ Kwanisiechu, amotachatachi legukwok, si mameiyo mugulelwekwai. ²² Otwogichu, ogas iit eng tuguk tugul icheget che kiptainikwok eng borwek, ama kityo yo keerok, ko u che iboiboi biko, ago eng muguleldo tugul. Oiywei Kiptaiyat. ²³ Kito age tugul ne oyae, oyai kobunu muguleldo, ko u yo oechini Kiptaiyat, ama ko yo oechini chi. ²⁴ Ongen ole otaache kobun Kiptaiyat melekto ne bo borotet. Oote Kiptaiyat Kristo. ²⁵ Amu inendet ne yaei ne ya, ko tun taachei agine ne bo yaitiet noto kiyai, ama mi kwelet (kalotunet).