¹ Amu amache onai ole kiacheretitege mising agobo akwe, ak icheget che mi Laodikia, ak alak tugul che tomo kogeero togoch eng borto. ² Aboisiei si kobiit kigaigai mugulelwekwai ak kemut kobwa tugul eng chamnyet ak eng magornatosiek tugul che bo nyiietab kaguiyet, si kobiit konai icheget ung'otietab Jehovah, noto ko Kristo. ³ Kigiuny eng inendet konoraik tugul che bo ng'omnatet ak naet. ⁴ Amwae nito si magenak chi age tugul eng ngalek che bo kagengenet. ⁵ Amu mbo nda mami ane eng borto, ami kobotok eng tamirmiriet. Abaibai eng atebeng'wong ak kimnatetab kayaneng'wong eng Kristo. ⁶ Kou yo kiotaach anyun Kristo Jeiso Kiptaiyat, obendate eng inendet. ⁷ Olumdege eng inendet, oteegogisie eng inendet, okimegitu eng kayaneng'wong ko u yo kiginetak, ak konyiiak mwaetab kongoi. ⁸ Oripge si ma iluulok chi age eng ngomnatenyi ak kaberberisiet ne bo buch, eng bitonwekab biko, eng konetisiosiek che bo tamirmirik che bo ngwenyuni, ako ma eng Kristo. ⁹ Amu menye eng inendet eng borto nyieet tugul ne bo Jehovah. ¹⁰ Ako ki oegu che nyitotin eng inendet, ne metitab bounatet ak kimnatet tugul. ¹¹ Kigimuratanak eng inendet eng kamuratanet ne kima kiyae eunek, eng istoetab bortab banyek, ako eng kamuratanetab Kristo. ¹² Kigitubok koboto inendet eng kabatisanet, ak kiging'etaak eng noto koboto inendet amu kayanet eng yaet ne yaei Jehovah, ne kiing'eet inendet komong eng che kibek. ¹³ Ak akwe che kia omeiye eng yaitwogikwok ak borwekwok, che ki ma kigimuratan, kiisobok akwe koboto inendet ak konyoiwech kaat cholwogikyo tugul. ¹⁴ Kibuuch siret ne bo arorutik ne kiga kogikyech koboto rangeiwekchi. Ak kigoisto kobirji kimurtoiyot. ¹⁵ Kisare bounik ak kimnatosiek ak kobor kotook, koterteri icheget eng kimurtoiyot. ¹⁶ Noto anyun, amat koruokun chi age tugul agobo amitwogik nda ko che kieei, nda ko betutab igorta, nda ko arawet ne leel anan ko betusiekab Sabato. ¹⁷ Chuto tugul ko uruetab tuguk che bwani, ago ne bo kamanut ko Kristo. ¹⁸ Amat okany kosarenak chi melektong'wong eng oret ne bo kamining'etabge ak kalosunetab malaikaisiek. Chito ne u nito kogimitege tuguk che kigogeer, ak komenee kabwatutkyi che bo borto. ¹⁹ Ama name metit komie. Ako bunu metit tuguk chebo borto tugul agoi koityi rotionikchi koboto maisik, ak konamatge kebeberwek tugul ak tigitik; ak koet eng etunet ne konu Jehovah. ²⁰ Ngot ko kiomeye koboto Kristo ak omongune konetisiosiek che bo tai che bo oikab ngweny, ko amu nee anyun si ogas iit kogeny, ko u yo to sopsoti eng ngweny: ²¹ "Amonam, amochamcham nda kole, amotwa?" ²² Begu tuguchuto tugul ngetestai keboisie, ko u ngatutik ak konetisiosiekab biko. ²³ Tinyei tuguchuto kaborunet ne bo ng'omnatet, eng kayanet ne kichapchinige ak kamining'inatetabge, ak nyalilda ne kinyalili borto. Ako matoreti kiy age tugul chuto eng katerteretab magutikab borto.