¹ Kiptainichu, ogochini otwogikwok noto ne bo imanda, ak ne nyolu; ongen ole otinye ak akwe Kiptaiyat eng Kipsengwet. ² Ogiilige kotugul eng saet, oripse eng noto koboto kongoi, ³ osaiywech akiche kotugul, si koyatwech Jehovah kurget ne bo ng'olyot kemwaite ung'otietab Kristo; amu kigirata agobo noto. ⁴ Osaa si amuch abarta, ko u ole nyolundoi amwa. ⁵ Obendoti eng ng'omnatet eng taitab icheget che mi sang, ak orib saisiek komie. ⁶ Ingoek ngalekwok che nyiitat mieindo. Ngoanying munyuk, si kobiit onai ole kanyol owaljinde chi age tugul. ⁷ Ngalek tugul agobo ane, ko mwowok Tukiko, tupchet ne ingenot eng akwe. Inendet tupchet, otwogindet ne iyanat , ak keboisiei tuwai eng Kiptaiyat. ⁸ Ne koayakwok amu ng'olyondonito, si kobiit onai atebenyo, si kogaigai mugulelwekwok. ⁹ Koayoku koboto Onesimo, tupchet ne kiyani ak ko chamat, ne age eng akwe. Mwawok icheket tuguk tugul che kiyoogis eng olito. ¹⁰ Igatok Aristarko ne keratotin tuwai, koboto Mariko, ne tupchetab Barnaba, ( ne kionyoru ng'atut agobo inendet; ngo nyonjok, otaach inendet), ¹¹ ak Jeiso agine, ne kiguure Justo. Chuto ichegei che bo che imurotonotin kityo che keboisiei tugul agobo bounatetab Jehovah. Icheget che kigoek kagaigaet eng ane. ¹² Igatok Epapra, ne agenge eng akwe, otwogindetab Kristo Jeiso. Igiilige kotugul agobo akwe eng sautik, si kobiit otononye oii che igesunotinge ak ongen komie maget tugul ne bo Jehovah. ¹³ Amu abaoriani agobo inendet, ale tinye kaagiletabge ne o agobo icheget che mi Laodikia, ak icheget che mi Hierapoli. ¹⁴ Igatok Luka, chepkerichot ne chamanet ak Dema. ¹⁵ Ogat tupchosiek che mi Laodikia, ak Numpa, ak kaniset ne mi gonyi. ¹⁶ Ak ngo kagesoman baruani eng kwenung'wong, ogoite kesoman agine eng kanisetab Laodikia; ak osoman akwe baruan ne bo Laodikia. ¹⁷ Ak omwachi Arkipo oleji, "rib boisiet ne kiitaach eng Kiptaiyat, si kobiit iyai kosulda." ¹⁸ Ni ko kagatenyu ane Paulo eng eunyu. Obwat ratennyu. Ingotebi miendo kobotok.