¹ Ni cho kuti swaana, cho siri muhwiire, ka kwiina ha kauhene ne muhikaana, nangati nje nfumwe inkanda. ² Mmi wiina kuunsi lyi va muhitire ne vamutokomera mbwiita che inako ya va viiki iisi. ³ Vulyo cho kuswana, naaswe ha tuvasiri tu vahwiire, tu veena mu vuhikaana vwe ituto zo munkaanda. ⁴ Mmi inako iva viikitwa chinga ya sika, Ireeza na tumina Mwaane, ya vazaalwa ne mukulwakazi, ya vazaalwa kunsi lyo mulawo. ⁵ Ava chiti bulyo kuti a hululye vana veena kunsi lyo mulawo, kuti tuwoolye ku ang'ulwa siina vaanaswisu. ⁶ Mmi mukuti mu vaanaswisu, Ireeza ava tumini Luhuho lo Mwaane munkulo zeetu, luhuwereza kuti, "Aba, Taayo." ⁷ Lyinu ko siri u muhikana, mmi u mwaana, mmi chikuti u mwaana, lyinu mulya vuswa che Ireeza. ⁸ Mmi cheyeyo inako, ha musana mu veezi Ireeza, mu va chitwa vahikaana va vana va veezi, che ziho zisalyi zo vusakusima, vasalyi ve ireeza. ⁹ Mmi hanu ha chimuvezivi Ireeza, kapa kuti mwizivitwa ne Ireeza, chiinzi ha chimuvolyera kumasulye ku milao zifosaheere iseena ituso? Musaka kusuminwa naazo hape? ¹⁰ Mukuteka mazuva ne mwezi ne inako ne zirimo! ¹¹ Ni tiite cheenu kuti kuti mweendi muteendo waangu naanwe u valyi wa mahala. ¹² Ni mirapeere , vaakweetu, muswane naame, mukuti Naame chiniswana naanwe. Ka kwiina chi muva nifosekeza. ¹³ Mmi mwiizi kuti avalyi cho kulwala kwaangu kuti ni rute liinzwi kweenu lwe ntaanzi. ¹⁴ Nangati chiziimo chaangu cho vuholye chiva miviiki mu mulyiko, kana muva ni nyanyi kapa ku nikaana. Kono mu va nitambulyi siina ing'iloi lye Ireeza, sineeri njeme Kirisiti Jeeso iye mwiine. ¹⁵ Lyinu, hanu, mikoonde yeenu iinahi? Lyinu Ni milwiira vusakusima kuti, kalyi kuwoolyeka, ni muva nongomona meenso eenu cho ku aniha. ¹⁶ Lyinu chikwiina vulyo, aa Ni vavi ni chira cheenu mukuti Ni milwiira vusakusima? ¹⁷ Va lyikayerere ku mi zuunda, mmi che inzira isa shiyeeme. Va saka ku mizwisa kweetu, kuti mu woolye ku nuungwa avo. ¹⁸ Aaho heene kushiyeeme kusuna ahulu chiintu chikwiina ivaka, mmi ising'i vulyo chi Nina naanwe. ¹⁹ vaangu vanini, hape Niina muzitavi zo ku mi huzumuka mbwiita Kirisiti chiina na vumbirwa mweenu. ²⁰ Ni nungitwa ku va naanwe hahanu ne sandula mwambiro kwaangu, mukuti Ni ziyerehete cheenu. ²¹ Muni lwiire, uunwe musaka ku va kuunsi lyo mulawo, ka mu teeki mulawo? ²² Mukuti ku vang'olwa kuti Aburahama a veena vaana swisu vo vere, umwi a valyi wo mukazana wo muhikaana wumwi nalyi wo mukulwakazi yo sumunukite. ²³ Mmi wuumwi a va zwaalwa ne mukazana wo muhikaana ku ya che nyama, lyinu wumwi a va zalwa ne mukulwakazi yo sumunukite ku ya che isepiso. ²⁴ Iizi ziintu ziwoolwa ku taluswa siina ingulyi, mukuti aava vakulwakazi va zimanine ikulahano. Wuumwi waavo uza kwi Iruundu lya Sinayi hape ava huzumuki vaana va vahikaana. Njeye Hagayi. ²⁵ Lyinu hanu Hagayi u zimanine Iruundu lya Sinayi lyiina mwa Arabiya; mane u zimanine Jerusalema ya suunu, mukuti wiina mu vuhikaana ne vaane. ²⁶ Mmi Jerusalema iina kwiwulu ilukuluhite, nje nyineetu. ²⁷ Mukuti ku ng'olyetwa kuti, "U saange, uuwe uchitwatwa yo sa huzumuki. U lyilyire kwi iwulu cho kusaanga, uuwe yo sa sasamiswa zitavi zo kuhuzumuka. Mukuti vaana vo mukulwakazi ya va kaanwa vaangi kuzamba vo mukulwakazi wiina mukwaame." ²⁸ Mmi uunwe, vakweetu, muswana ne Isaka, muvaana ve isepiso, ²⁹ Che yina inako ya vazalwa kuya che nyama ava sukululyi zuna ya vazalwa kuya cho Luhuho. Kuswana ne suunu. ³⁰ Mmi liinzwi litiinzi? "Hindike mukazana wo muhikaana ne mwaane. Mukuti mwaana wo mukazana wo muhikaana keeti na kauhane vuswa ne mwaana wo mukulwakazi yo sumunukite." ³¹ Chikwiina vulyo, vakweetu, kaheena tu vaana vo mukazana wo muhikaana, kono tuvo mukulwakazi yo sumunukite.