¹ Magalata vaholo! Njeeni ya va milowi? Mu meenso eenu Jeeso ava chitwa siineeri cha vambulwa. ² Iichi nche chiintu chi Ni saka kulyituta kweenu: Aa muvatambulyi Luhuho che misevezi yo mulawo kapa cho kuzumina chimuvazuwi? ³ Muvaholo vulye? Muvataangi cho Luhuho, aa hanu chi mukamanisa che nyama? ⁴ A muvasukulukiri ziintu ziingi mahala-lyinu chikuti kana ziveena iituso? ⁵ Aa Iiye yo miha Luhuho mmi nachita miteendo ikomosa mukati keenu muchita vulyo che miteendo yo mulawo kapa cho kuzuwa cho vusakusima? ⁶ Moona Aburahama "mwa vazumini kwee Ireeza mane naa valyirwa kuti ushiyeeme," ⁷ che inzira iswana, muzuwisisa, lyinu, kuti vana vazumina mba vaana va Aburahama, ⁸ Liinzwi, liva voneni kuvusu kuti Ireeza ka joloza Valeuhi cho kuzumina, nilya ruta ivangeri ha vusu vwa Aburahama, nilyaati, "Chaako chisi choonse kachi waane mikoonde chaako. ⁹ Lyinu aaho, vazumina veena mikoonde hamwiina ne Aburahama, mukwaame yo zumina. ¹⁰ Voonse valyiviikite mumiteendo yo kuunsi lyo mulawo va kutitwa; mmi ku ng'olyetwa, "Ku kutitwa wumwi no wumwi ya se ichiriri ziintu zoonse zing'olyetwa mwiivuka yo mulawo, ne ku zichita." ¹¹ Lyinu kuzuwika kuti kakwiina ya vajolozwa hafusu vwe Ireeza cho mulawo, mukuti vashiyeeme ka va halye cho kuzumina. ¹² Mmi mulawo kaheena wo kuzumina, "Muuntu yo chita miteendo yo mulao ulukeere kuhala chaayo." ¹³ Kirisiti a va tusumununi muchikuto cho mulawo cho kuva yo kutitwa mu chiziimo cheetu- mukuti kung'olyetwa, " Ku kutitwa wumwi no wumwi yo hanzikwa hachisamu"- ¹⁴ kuti mikoonde ya Aburahama iwoolye ku va ku Haheedeni cha Kirisiti Jeeso, kuti cho kuzumina tu woolye kutambula isepiso yo Luhuho. ¹⁵ Vaakweetu, ime niwaambe che mikwa ya vaantu. Mu kuzuminzana kwa vaantu, kakwiina yo woola kuvuvikira hembalyi kapa kuweera chimwi, kuvona chi kwa zuminzanwa cho mulawo. ¹⁶ Lyinu isepiso i va waambwa kwa Aburahama ne luzuvo lwaakwe. Ka icho kuti, "ku luzuvo, "ni kuteewa vaangi, kono naalyi ku muuntu wumwiina vulyo, "ne kuluzuvo lwaako, " iiye Kirisiti. ¹⁷ Lyinu Ni cho kuti : Mulawo, wuuveeza mu masulye e zirimo ziina 430, ka wu viikiri mulawo kumbalyi we chilyikani che Ireeza. ¹⁸ Mukuti chikuti vuswa viiza cho mulawo, lyinu ka wusiiza che isepiso. Mmi Ireeza a va wuhi Aburahama che isepiso. ¹⁹ Vulye ylinu, mulawo utusanzi? Uva weerwa che ivaka lyo kuluta mulawo, mbwiita hakuti wo luzuvo lwa Aburahama heeza iiye ya va sepiswa. Mulawo u vavi hateni cha mang'iloyi o muzimanini. ²⁰ Muzimanini hanu kaheena wo muuntu umwiina, mmi Ireeza uumwiina. ²¹ Lyinu aa mulawo ka uzuminzani ne isepiso ye Ireeza? Naanta ising'i vulyo! Lyinu chikuti mulawo uvavi hateni kuti uhe vuhalo, lyinu kujolozwa cho vusakusima ni kuveeza ne mulawo. ²² Mmi liinzwi lyiva sumini chimwi ne chimwi mu chivi. Ireeza ava chiti iichi kuti isepiso ituhaza cho kuzumina mwa Jeeso Kirisiti iwoolye kuheewa vana vazumina. ²³ Lyinu kuzumina nikuseeni kuva hateni, tuvalyi tu va viikitwa kuunsi lyo mulawo, ni tu wondetwa mbiita hakuti kuzumina chi ku voneswa. ²⁴ Lyinu molawo nguvalyi ku tuyeenza mbwiita Kirisiti chingeeza, kuti tuwoolye kujolozwa cho kuzumina. ²⁵ Lyinu mukuti kuzumina chiku veeza, ka tusiina kunsi lyo muhitizi. ²⁶ Mukuti muvoonse muvaana ve Ireeza cha Kirisiti Jeeso. ²⁷ Cho vungi vweenu muva kolovezwa mwa Kirisiti, muva tambulyi Kirisiti. ²⁸ Ka kwiina Mujuta kapa Muhirika, ka kwiina muhikaana naandi yo sumunwiina, ka kwiina mukwaame naandi mukulwakazi, mukuti muvoonse muvamwiina mwa Kirisiti Jeeso. ²⁹ Mmi chi muv alyi va Kirisiti, lyinu mu voluzuvo lwa Aburahama, valya vuswa kuya che isepiso.