¹ Kirisiti ava tulukululyi kuti tu lukuluhe. Mukolye lyinu, hape kaanzi ni muvolyelyi mumasulye ku lawulwa kuunsi lye ijooko yo vuhiikana. ² Muvone, Iime, Paulusi, ni micho kuti chikuti ni muzumina kwinjira mumupato, Kirisiti kakwiina cheeti naa voolyerwa kweenu. ³ Ni shupera wumwi ne wumwi muuntu yo lyisiirira kwinjira mu mupato kuti ulukeere ku kwiichirira mulawo woonse. ⁴ Chi mwazwiswa kwa Kirisiti, wuunwe mweeti ni mujolozwa cho mulawo; keeti ni muvoolye mulyikolye mikoonde. ⁵ Mmi uuswe, tulyindire isepiso yishiyeeme cho Luhuho mu kuzumina. ⁶ Kwa Kirisiti Jeeso ku va mumupato kapa kusaava mumupato ka kutusa chimwi, mmi mbwiita kusepa ne kuchita cho kusunana. ⁷ Muvalyi kuyeenda neenza. Njeeni ya va muviindi kwichirira vusakusima? ⁸ Uuku kukutaza ka kuzwi kwaalyi ya va misuumpi! ⁹ Chiviriso chinini chizimbisa mukamu. ¹⁰ Nina isepo kwa Simwiine kuti keeti ni muzeze chiingi hape. Uyoozo yo miziyeza ikatulo kayive yaakwe, mane nangati njeeni kapa, iini. ¹¹ Vaakweetu,chikuti Nisi waamba ka zo mupato, chiinzi ha Nisi sukululwa? Chikwiina vulyo, chivalyi kuviinda kwiiza ku chifapano chivaazwiswa. ¹² Mane vana va valyi ku miziyeza, Ku sahanga valyi kosolye veene! ¹³ Mukuti mu va sumpirwa kusumunuka, vaakweetu. Mmi musiye kusandula kusumunuka kweenu kava ivaka lyo kusaka kuhala che inyama; kono, mulyisune ne ku teendinsana. ¹⁴ Mukuti mulawo woonse uve zuzirikizwa che itawulo iimwiina; iti " U sune mwaako molyisuni." ¹⁵ Mmi chikuti mulyisumona ne kulyilya, mutokomere kuti kaanzi mulyimani. ¹⁶ Mmi Nicho kuti, muyeende cho Luhuho mane keeti ni muchite kusuna kwe inyama. ¹⁷ Mukuti kusuna kwe inyama kulwinsana ne ko Luhuho, mane kusuna ko Luhuho kulwinsana ne kwe inyama. Mukuti iizi zilyilwiisa, kuti kaanzi u chiti ziintu zoosaka. ¹⁸ Mmi chikuti u hitiirwa ne Luhuho kawiina kuunsi lyo mulawo. ¹⁹ Lyinu miteendo ye inyama izivitwa: vuhulye, vuvilala, kunuungwa, vusangu, ²⁰ ve-ireeza valyichitirwa , vulozi, vulwavi, inkoondo, zitoyo, muna, vukalyi, iinkani, ikauhano, ²¹ inkulonkaando, vuchakolwa, kusunaminati, ne ziintu ziswana neezi. Ni mi kalyimera, moona mu ni vamikalyimeri, kuti aavo vachita iizi ziintu keeti ni vaheewa muvuso we Ireeza. ²² Mmi zihaantu zo Luhuho kusuna, kusanga, chisemo, inkulonde, kushiyama, ku koonda, itumero, ²³ kulyisanta, ne ku lyiwoonda; kuunde iizi ziintu ka kwiina mulawo. ²⁴ Avo veena kwa Kirisiti Jeeso vava kokoteri inyama ne zisunitwa zayo ne zinuungwa zaayo. ^{25 26} Chikuti tu hala cho Luhuho, naaswe tuyeede cho Luhuho. Tu siye ku lyinyemuna, kujakola vamwi, kulyifwiira muna.