¹ Ali, tenjarilah, ba Ikonium, Paulus ali Barnabas sinop sesama pe sinagoge ulutn Yahudi ali bepander semayo lou mokone sesenu deo ulutn, maeh ulutn Yahudi nonepun ulutn Yunani, njari persaya. ² Leka, ulutn-ulutn Yahudi se doho persaya ngehasut ulutn-ulutn se doho Yahudi ali ngeracuni pikiran reo ngelawan ulutn-ulutn persaya. ³ Moko, reo duloi ba denan suakng wayah se ola sambil bepander ali ronu agitn Tuhan, se ngumi kesaksian tentang berita anugerah-Ne, serta ngaruniakan tanda-tanda ajaib ali mikjizat-mukjizat se tenjari nyendalo kayakng reo. ⁴ Leka, ulutn-ulutn ba kota sio tebagi-bagi, sepalihne berpihak ampe ulutn-ulutn Yahudi ali sepalih ampe para rasul. ⁵ Desukng erai usaha waulah, maeh koe ulutn-ulutn doho Yahudi maupun ulutn-ulutn Yahudi, ali para pemimpin reo, agitn ngeaniaya ali nimbai para rasul ali watu, ⁶ ukah Paulus ali Barnabas ngetauine ali monsit pe Listra ali Derbe, Kota-kota ba Likaonia, ali pe wilayah ba sekitarne. ⁷ Ali, ba denan, reo trus ngewarakatn Injil. Paulus ba Kota Listra ali Kota Derbe ⁸ Ba Listra, naan eraikulutn pentukng tungoh se lokoi po'one, lumpuh anjak inene wuntukng ali balupm suah malatn. ⁹ Ulutn sio pentukng krongoi Paulus desukng ise pentuk bepander, ukah Paulus mindane ali minda bahwa ulutn sio pu'utn iman agitn waradukan, ¹⁰ Paulus ngontuh ali nain se nyaring beta, Sekondokngdeh ali po'oko." Lalu, ulutn sio monjakng ali jape malatn. ¹¹ Desukng ulutn deo minda none se ukah Paulus gawi, reo ngangkat nain reo ali ngontuh suakng basa Likaonia," Dewa-dewa ukah mange pe nonga-nonga taapm ali njari sara ali mersia!" ¹² Ulutn -ulutn sio ngontuh Barnabas sebagai Zeus ali Paulus sebagai Hermes koe ise se mimpin pengontuhan. ¹³ Imam dewa Zeus, se kuilne naan ba kual kota, ngoit sapi-sapi upo ali rangkayatn nge pe jawokng gerbang kota. Ise ali ulutn deo sio kakatn mempersembahkatn kurban ampe Paulus ali Barnabas. ¹⁴ Leka, desukng rasul Barnabas ali rasul Paulus krongoi hal sio, reo ngerihat pakayatn reo ali monsit sinop pe nonga-nonga ulutn deo sio, sambil ngesiak, ¹⁵ ali ngontuh, "Erai untukng-Erai untukng, konone iko ngeulah ulep hal situ? Kaitn lou mersia biasa sama ka sara iko ali ngoit habar maeh ampe iko agar ikobepaling ante hal-hal se sia-sia situ ampe Allah se wolupm, se ngulah langit, ali bumi, ali laut, ali awisne sesuatu se naan ba suakngne. ¹⁶ Ba generasi-generasi se lalu, Ise ngebiarkan ulep bangsa malatn nurut lalatn-lalatnne dederai. ¹⁷ Leka, Ise doho ngebiarkan kompu-Ne beloh saksi. Koe, Ise ngelakukan se maeh ali ngumi ampe iko uran anjak langit ali musim-musim beruwa se memuaskatn ate ko ali pengokatn ali kesanangatn," ¹⁸ betapun ali ngontuh ulep hal sio, reo upal mesindroi ulutn deo sio agar doho mempersembahkan kurban ampe reo. ¹⁹ Leka, ulutn-ulutn Yahudi awi anjak Antiokhia ali Ikonium, ali ukah ngapi ulutn deo sio, reo nimbai Paulus ali watu ngenyeretne pe kual kota koe ngira bahwa Paulus ukah mate. ²⁰ Leka, desukng para murid ngeliungi Paulus, ise sekondrokng ali mulek sinop pe kota. pe ondro berikutne, ise tulak sesama ali Barnabas pe Derbe. mulek pe Kota Antiokhia ba wilayah Siria ²¹ Ukah reo ngewarakatn Injil ba kota sio ali ukah ngulah deo murid, reo mulek pe Listra, ali pe Ikonium, ali pe Antiokhia, ²² sambil ngekuatkan jiwa para murid, nunjul reo agitn betekun ba suakng iman, ali ngontuh bahwa taapm harus nyinopi Kerajaan Allah nyendalo deo penderitaan. ²³ Desukng Paulus ali Barnabas nunjuk penatua-penatua agitn reo ba stiap jemaat, ukah bedoa ali berpuasa, reo nyerahkan para penatuo sio ampe Tuhan, se ampe- Ise reo ukah persaya. ²⁴ Kemudian, reo nyendalo Pisidia ali ampe ba Pamfilia. ²⁵ lalu, desukng reo ukah ngewarakatn firman ba Perga, reo mange pe Atalia. ²⁶ Anjak badena, reo belayar pe Antiokhia, wadah reo ukah waunjuk ampe anugerah Allah agitn gawiatn se ukah reo ngukahkan. ²⁷ Desukng reo ampe ali bekumpul sesama ali jemaat, reo ngelaporkan ulep hal se ukah Allah ulah sesama ali reo ali semone Ise ukah mbuka jawokng iman agitn bangsa-bangsa laitn. ²⁸ Ali, reo duloi sesama para murid agitn wayah se ola.