¹ Desukng sio , buhan rasul ali eraiuntukng-eraiuntukng seiman se na'ant ba Yudea krongoi bahwa ulunt-ulunt laint Yahudi lou ukah nerima firman Allah. ² Koe sio, lau Petrus mongket ampe Yerusalem, ulunt-ulunt se besunat beselisih pemikiran ali ise, ³ Ali montuh, "Iko tulak ampe ulunt-ulunt doho besunat ali kuman sesama reo." ⁴ Anta leka, Petrus mulai njelaskanne sesara urut ampe reo, ontuhne, ⁵ " Aku lau bedoa ba kota Yope, ali suakng keadaan doho sadar, aku kotau erai pengotau, sesuatu sara selambar kain lebar mange, se juntai ali keopat sudutne ante langit, ali benda sio ngiriyet ampeku. ⁶ Seukah aku mindane, aku meperhatikan ali kotau benatang-benatang liar, benatang-benatang melata, ali pumpulu-pumpulu ba udara. ⁷ Aku lou krongoi na'ant naint montuh ampeku, "Kuat, Petrus, sembalis ali kumanlah!" ⁸ Namun, aku montuh," doho, Tuhan. Ena, doho na'ant se haram atau najis suah sinop ampe suakng wowaku." ⁹ Anta leka, naint sio njawab ante langit," nyone se ukah allah maradu, ai eraikali iko ngontuh haram!" ¹⁰ Hal sina tejari tolu kali, lalu awisne sio wa tarik murek ampe langit. ¹¹ Pindalah, desukng sio lou, na'ant tolu ulunt se wakirimp ampeku awi ampe lowu wadah aku na'ant, ante Kaisarea. ¹² Desukng, Roh montuh ampeku agin tulak sesama reo ali doho ragu-ragu. Keonom eraiuntukng seiman sina lou tulak sesamaku ali kaint sinop ampe lowu ulunt sio. ¹³ Gane, ise mekampe ampe kaint saraone ise ukah kotau malaikat sekondrokng ba lowune ali montuh," Suyulah ulunt ampe Yope ali tindulah Simon se waontuh Petrus awi ampe itu, ¹⁴ Ali ise anta montuh pesan sio iko anta waselamatkan, iko ali awis ulunt se duloi ba lowuko." ¹⁵ Pentukng aku mulai sundro, Roh Kudus mange ampe ombo reo, sama sara se ampe mulane tejari mundan ta'amp. ¹⁶ Moko,aku kingat ampe pengontuh Tuhan, lau Ise montuh, "Yohanes membaptis ali ranu, leka iko anta wabaptis ali Roh Kudus." ¹⁷ Jari, jaka Allah ngumi karunia se sama ampe reo sara se Ise umi lou ampe ta'amp seukah pesaya ba suakng Tuhan Yesus Kristus, isekah aku hingga aku kate ngehalangi Allah?" ¹⁸ Lau reo krongoi hal-hal sio, reo njari tenang ali memuji Allah ali montuh," Jaka semayo, Allah lou ukah mengaruniakan ampe ulunt-ulunt doho Yahudi petobatan se menuju ampe wolump. Injil Ampe ke Antiokhia ¹⁹ Pentukng, ulunt-ulunt se tahambur koe penganiayaan se tejari tehadap Stefanus, menyebar ampe pe Fenisia,Siprus ,ali doho ngumiberita firman Tuhan ampe isepun kecuali ampe ulunt-ulunt Yahudi. ²⁰ Namun, na'ant sesenu ulunt ante reo, sesio ulunt-ulunt Siprus ali Kirene, ali awi ampe Antiokhia ali lou sundroa,ampe ulunt-ulunt Helenis, sambil ngumiberita tentang Tuhan Yesus ²¹ Kayakng Tuhan baya reo, sejumlah deo ulunt se njari pesaya bebalik ampe Tuhan. ²² Habar tentakng reo ampe ke telingo jemaat ba Yerusalem, ali reo ngrim Barnabas ampe Antiokhia. ²³ Lau Barnabas awi ali minda tuasi karunia Allah, ise besukacita ali menesehati reo awis agin tatap setia ampe Tuhan ali ate se teguh, ²⁴ Koe Barnabas siolah ulunt se maeh ,ponu ali Roh Kudus ali iman, sejumlah olai ulunt waowit ampe Tuhan. ²⁵ Pentukng , Barnabas tulak ampe Tarsus agin meto Saulus. ²⁶ Ali, ukah ise nengkawokngne ampe Antiokhia . Seola erai taon, reo kawokng ali jemaat ali ngajar deo ulunt, Ali, ba Antiokhia, murid-murid agin pertama kaline waontuh" Ulunt Kristen". ²⁷ Wayah ondro-ondro sio, sesenu nabi mange tanjak Yerusalem awi pe Antiokhia. ²⁸ Sala eraiulunt ante reo bengarant Agabus sekondrokng ali meramal ali pertolongan Roh bahwa anta tejari melau se harat ba gawis denia. Ali, melau sio tejari ba masa pemerintahan Klaudius. ²⁹ Moko, buhan murid memutuskan agin ngirim sumbangan, sesuai ali kemampuan reo masing-masing, ampe eraiuntukng-eraiuntukng seiman se duloi ba Yudea. ³⁰ Ali, se lou reo lakukan, ngirim sumbangan sio ampe buhan penetua nyendalo kayakng Barnabas ali Saulus.