¹ weno teererenu kovyo ana kuamba Yahweh," Sapukenu ntani tantenu vinka vyenu kumeho yo ndundu; mposi ndundu ngadiyuva maywi enu. ² Yuva, ove ndundu, darunyeenyo rwaYahweh, ove ntateko yolikarerepo lyoudjuni. Ene ngoli Yahweh akara no mpangera yendi kuvantu vendi, ntani uye nga rwanenapo vaIsrael mumpanguro. ³ Vantu vande, vinke namudjona? Weni mo namurorora? Ame ko namuupa musirongo sa Egypt ntani namuyovora mundjuwo youpika. ⁴ Ame natumina vaMoses, Aaron ntani na Miriam. ⁵ Vantu vande vurukenu ovyo aamba Hompa Balak wo muMoab, ntani weni Balaam mona Beor omo alimbuilire opo mwatundire kuShittim muyende kuGilgal, mpo ngoli muyivira uuhungami wo viruwana vyaYahweh," ⁶ Vinke niyita kwaYahweh, omu nakutongamena kwa Karunga wokuwiru? Ndi nidjambe ndjambo yositana so mwaka umwe? ⁷ Ngo Yahweh nga vura kupanda mayovi wo vindjwi evi vadira kutuka, ndipo mayovi dimurongo domukuro do maholi? Ndi nidjambe mbeli yande mora ulimbindongo wande, nyango yo rutu ro ndjo do mwenyo wande? ⁸ Uye atantera vantu asi vinke vya hungamo ntani ovyo ana kutaterera Yahweh koye: Ruwana uhunga, hora unongo, ntani kuyenda nalikudidipito na Karunga. ⁹ Liywi lya Yahweh kuna kukodoka mu nkurumbara- nampili weno ukonentu watjira lidina lyoye:" Teererenu kuruwodi, ntani no kowo avituro mulivango. ¹⁰ Mpouli ungawo mundjuwo do vantu wovadona nokupira usili, ntani ndjira dovimpempa doliswau. ¹¹ Ame kuvura nitwikire kutwenya muntu asi munandjo ntjene uye kuruwanita sivihito sovimpempa, no mukumo wo ndjato dokukonga? ¹² Vangavo vayura nyanya, vatungimo kuaamba vimpempa, ntani maraka wo mutunwa twavo vyovi mpempa. ¹³ Mpo ngoli ngani muvelita, kumutura palivu, ngani musuvilira mukonda yo ndjo denu. ¹⁴ Anwe ngomulya ene ngoli nokukutasi; Muporongwa wenu ngaukara mwenu. Anwe ngomupungura mauwa ene ngoli kapi ngomuvipopera, ntani ovyo ngamupopera ame ngani vitapa kuvarwi. ¹⁵ Anwe ngomu kuna ene ngoli kapi ngomuyangura; anwe ngomu puma ndjwe ene ngoli kapi ngomuverura naumwenu nomaghadi; Anwe ngomutavaura mandjembere ene ngoli kapi ngomunwa vinyu. ¹⁶ Anwe mwakengire viukarunga vyo vimpempa vyaOmri, ntani noviruwana navintje vyo ndjuwo yaAhab. Anwe mwayendire mulikevererero lyavo, mpo ngoli ame ngani mupa lidjonauko ntani ngani komberera vatungimo venu, ntani anwe ngomuyitapo lisweneno lyo vantu vande.