¹ Shikya taku hweta hee? Tidzere ku wuso mushibe akya shishemo shumwana hara shuwunji? ² Kusiye kuba akyo. Tifwe kushibe, ingahare tishi para mucho? ³ Niyi zire akya uwunji wata korobezwa ku Jeso Keresite bata korobezwa murufu rwakye? ⁴ Tata bikuwa, hape, nakye shi korobezo murufu. Zopani zarasisini akya tandi Keresite shamata tambuswa ku bafu shuku chena kwa Shee, inditswe tyendye mu wuparo wo muchena. ⁵ Ati tatiba paxiki nakye muku fwana murufu rwakye, shati kabe paxiki muku tambuka kwakye. ⁶ Ti ziyi zire, mukurukome etu mata bambirwa nakye akya mumbiri ushibe wubburuwe.Zata rasisini akya sitye kuba bavuya ku shibe. ⁷ Yeye yamatafwa mata kusuwa kuku panga naqa shibe. ⁸ Kono ati tatafwa ni Keresite, tati tishira atikya shati kapare paxiki nakye. ⁹ Ti yi zire akya kudzwa pu Keresite amata tambushira ku bafu, kamuni shafwe nangweza; rufu karu shiba ni qumu kukye. ¹⁰ Shukwenda shurufu rwama tafwa ku shibe, matafwa kaxiki kwee. nanga ndipakyo, wuparo wamata para, mata pera Urezya. ¹¹ Mwinjira yati fwena, ni yanakanwe indinwe kufwa ku shibe, kono ku para ku Rezya sha Jeso Keresite. ¹² Cware nisiye ku tishira shibe kwendisa mi mbiri enu kwandi suwa kusho. ¹³ Nisiye kupa shirama shenu ku shibe, kuba shisebeliso shiwubbi. Kono niliqe ku Rezya tandi bata kusuwa ku rufu kulyetuwa ku wuparo, indi kupa zirama zumu mbiri enu kuba zi sebeliso zeziqa ku Rezya. ¹⁴ Ni siye ku tishira wubbi kuni yendisa. Nibaku mwishi li murawo, kono mwishi lirusuno. ¹⁵ Shikya hee? Tipange shibe shuku tikya tubaku mwishi li murawo, kono mwishi lirusuno? kusiye kuba akyo ¹⁶ Kani yizire akya nakulipa ku wuvuya, niba vuya kuyinati ku tyeka? Kapa niba vuya ku shibe, shati twara ku rufu, kapa bavuyakuku chera, kwati twara ku wuqa. ¹⁷ Kono ku kambira ku Rezya! Kali niba vuya wu shibe, kono nata rachere ku mutima yata chinjira zu toto zinata pewa. ¹⁸ Nata kusuwa ku shibe, indi kubikuwa bavuya wuwu shiyama. ¹⁹ Ndati hweta tandi muyeyi shuwu toli wumi mbiri enu. Tandi shinapa zizimwe zu mumbiri enu ku wuvuya kuzahali zi chena indi wubbi, mwinjira yati fwana, nizipe kuwu vuya womu shiyama wuku chenusuwa. ²⁰ Punali niba vuya wushibe, kali niba njemwa ku wuchena. ²¹ Mukakanda kapana, zipata zinaru kubika kuzinati sobiswa kuzo apani? Mi mamenisizi azo zopa rufu. ²² Kono pani puna kusuwa ku shibe indi zoromuka bavuya wu Rezya, nina zipata zuku chenusuwa. ²³ Kusharuwa ku shibe rufu, kono zipewa zu Rezya wuparo waha mana ku Jeso Keresite Shikati Etu.