¹ Kani yi zire, bakwanga ( ndati hweta ni bayeyi iba yi zire murawo), murawo wa tyendisa muyeyi mu kakanda ka mati para? ² Ku murwakazi ya rowuruwa mushimi nuwa ku murawo kmuchutuka ku murawou mwana bakye ashi para, kono bakye ashifwa, muchutuka ku murawo umarowura. ³ Cwarehe, bakye ati ashipara, ashi rowuruwa ku murwa yuyumwe, she beruwe ya matiwuka. Kono bakye ashifwa, muchutuka ku murawo, cware kashi beruwa mubuki aku para ni murwa yuyumwe. ⁴ Cware, bakwanga, natafwa ku rutati ru murawo shu mumbiri a Keresite. zopani atikya ni njene ku yumwe, ku tikya, kukye yamata tambuka ku bafu, atikya yiraqe zipata ku Rezya. ⁵ Putarana mwi nyama, zitakazo zi shibe, izata kulyuswe ku murawo, zaru ku sebeza mumbiri etu ku bika zipata zu kufwa. ⁶ Kono pani kali tata dzisuwa ku murawo. Tatafwa ku zitara patire. Zopani ku tikya ti bberike mu zuhweta zu mupupo wo mucena, mi kaku mañoro akare. ⁷ Cware shikya taku hweta? Murawo wo halinwe shibe? Kusiye kuba akyo. nanga ndipakyo, kambe kandi yi zire shibe, kambe ka shu murawo. Kambe amandi yibe ku rakaza tana murawo pu waru ku tikya, ''Usiye ku rakaza.'' ⁸ Kono shibe shata shangana shibaka mushata shu murawo mi shata lyeta itakazo kume. Ati kuku murawo, shibe shifu. ⁹ Kakanda kakamwe ndaru ku para kuku murawo, kono pu murawo waru kuya, shibe shaku shangana ku para, mi myendifwa. ¹⁰ Murawo iwaru ku lyeta wuparo wata yaru muka kuba rufu kumye. ¹¹ Shibe shata shangana shibaka shu murawo mi indi kundi yisa. Shu murwao wati ndibbura. ¹² Murawo muchena, mi ndizizira zi chena, wuruka, indi wuqa. ¹³ Sheshiqa shalyeta rufu ku mye? Ku siye kuba akyo. Kono shibe, atikya shiraqe kuba shibe, ku lyeta rufu ku me shi chuto sheshiqa, shizi ziira shibe shati kwana kuba shibe nanyina kubbara. ¹⁴ Tiyi zire atikya murawo mupupo, kono yemye jwi nyama. Ndata wulyusuwa kuba muvuya ku shibe. ¹⁵ Zindatisi, amanda ku zi yuvusisa. Zindati shaka kwisi, amanda ku zisi, mi zinda twaya ndizi ndatisi. ¹⁶ Kono ati ndatisi zinda hati shaka, ndati tishira ku murawo atikya muqa. ¹⁷ Kono pani kali kame ndati zisi, kono shibe shati para kume. ¹⁸ Ndiyi zire akya kume, mwi nyama, kuku zeziqa zati paramo. Zitabera zeziqa kumye, kono amanda ku kwana kwizisi. ¹⁹ Izuto zeziqa zindati shaka, amanda ku zisi, kono zezibbi zindahati shaka, ndizi ndatisi. ²⁰ Pani ati ndatisi zi ndahati shaka, sheri imye indati zisi, kono shibe ishitire ku mye. ²¹ Cware, ndata shangana murawo: ndishi shaka ku panga wuqa, wubbi wuna namye. ²² Ndati shaka murawo Urezya shu muyeyi yana mwikyo. ²³ Kono ndati mwana mirawo yahati fwana muziyemba zu mumbiri anga. Zati rwenisa murawo womupiya wuna mwa mano anga. Yati panga muvuya shu murawo ushibe iwuna shiyemba shu mumbiri anga ²⁴ Ndu muyeyi yo mushwamana! I yani ishandi kusa ku mumbiri wuni iwati fwa? ²⁵ Kono ndatili kambira ku Rezya sha Jeso Keresite Shikati etu! Cwarehe, yemye ndati panga murawo Urezya na mano anga. Nanga tipakyo, shi nyama ndati bberishira murawo ushibe.