¹ Cware putata bikuwa baba shiyama kwenda shi tumero, tina ikozo koku Shikati Jeso Keresite. ² Hape ishakye nanga taku shnangana itumero, ku shera ku shishemo shitina naccho, mitati lirumba shi sepo indi kanya yu Rezya. ³ Ama kwaku mena papa kono tishi lirumba indi shama shando, shuku tikya tiyi zire atikya mashando ngati lyeta ku gisiza. ⁴ Mi ku gisiza kwati lyeta ku sepahara, ku sepahara kuti lyeta isepo. ⁵ Mi sepo amaya ku lyeta maswabi, shuku tikya rusuno ru Rezya rwata tyeruwa mu mitima etu shu mupupo omu cena, iwata pewa kutswe. ⁶ Pukali tubaku iqumu mukakanda kati swanera Keresite mata tifwera shilibaka lyuwu gwezabbi. ⁷ Shuwu zuwo uyumwe ku fwera muyeyi yo mucena, takwa ku tikya uyumwe agise mutima afwere yo muqa. ⁸ Kono Urezya maraqe rusuno rwakye kutswe, shuku tikya putarana mushibe, Keresite mata tifwera. ⁹ Cware pushata ku bikuwa baba ruka shigazi akye, shati palisuwe shayeye ku wuqgu wu Rezya. ¹⁰ Ati, putali tizira, taku shusizwe ku Rezya shurufu rwa mana kye, kumana ku shusizwe kukye, shati palisuwe shu wuparo wa kye. ¹¹ Ka zopa ngaho, kono shati radze ku Rezya sha Jeso Keresite, shayeye pani tata mbura ku shwisizana. ¹² Cwarehe, shu muyeyi muxiki shibe shata njena mu lyuvu, shi njira yati fwana shibe shanjeni. Mi rufu rwayra ku bayeyi kowo, shuku tikya kwatu tapanga shibe. ¹³ Piri murawo, shibe sharana mu lyuvu, kono kuku kubara shibe koku ku murawo. ¹⁴ Nanga ndipakyo, shibe shata yendisa kudzwa ku Adama ku twara ku Mushe, nanga ibahata panga shibe tandi Adama shuku hasepahara, yishaba shu swaniso ku yopa ishaya. ¹⁵ Impo yamaye ku swana nokoti icuto ishataya shu mutu muxiki ya mata panga shibe. Shuku tikya murandu wu mutu muxiki wata lyetisa ikaturo yukupa babaenji murandu, kono impo shi shemo yatadzwa ku wubbi wumunji. ¹⁶ Impo amaya ku fwana shibe shu muyeyi muxiki. I katuro yati chera wubbi kowo mi indiku lyetuwa ku zibbi zizinji, yata mena kuku bika baba cena. ¹⁷ Shu murandu umutu muxiki, rufu rwatu wusa shu muyeyi yopa muxiki, su huru ibati tambura shi shemo muwu kuru wacho, indi mpo iyi kuba baba shiyama sheba yendise mu wuparo, shu muxiki yeye Jeso Keresite. ¹⁸ Cware, murandu umutu muxiki shina puwata lyeta i katuro ku bayeyi kowo, nanga ndipakyo kuruka ku muyeyi muxiki kwata lyetiswa atikya bayeyi kowo babe ni wuparo. ¹⁹ Shuku hasepahara ku muyeyi muxiki uwunji wati panga shibe, nanga ndipakyo ku sepahara ku muxiki kwati panga uwunji kuba naqa. ²⁰ Kono murawo wataya atikya ku fosa kube kukunji. Kono musharana shicinji, shishemo shibeko shicinji kubbara. ²¹ Shina shibe pushata wusa shilibaka lyu rufu, akyopa shishemo shuwuse kubika baba shiyama kutwara mamenisizi sha Jeso Keresite Shikati etu.