¹ Papani yetswe babagi tati swanera ku kambika miziyo ya baba tweli, indi kwaha yima kuzati tabisa tswe abwenwe. ² siya yuyumwe apatswe atabise umbakye pu chito sheshiqa, atikya amu koture. ³ Nanga i Keresite amali tabise yumunwe. Nanga ndipakyo, kaku kwata ñwaruwa, ''Matuka abapa ibati kutuka shanga ndi wulye pwi lyiiro.'' ⁴ Kocho ishata ñoruwa mulyuqo shata ñoruwa shuku zirwa ku kyezira kugisa indi gisizwa kwenda shama ñoro atikya tibe ni sepo. ⁵ Pani Urezya yeye umunu izuto kozo anipe ku gisuwa akya nibe ni ngana yati fwana kwenda sha Jeso Keresite. ⁶ Mata panga zopani shuku tikya shamano maxili ni tyembe shu muromo muxiki Urezya indi Shee aShikati etu Jeso Keresite. ⁷ Cwarehe, nili yamuhere kwenu, tandi shi Keresite amani ya muheri, shuku rumba Urezya. ⁸ Ndatikya Keresite mata panga bavuya wu mupato ku mwenisa injahamu Urezya, atikya agisize zi sepiso zata panjirwa bana kurubetu, ⁹ mi indi wu lyuvu akya ba tyembe Urezya shi shemo shakye. Tandi shukwata ñoruwa, ''Cwarehe shandipe kurumba kunwe mwikyo lyu wu lyuvu indi ku yimba kulina lywe.'' ¹⁰ Nangweza kwatikya, ''Radze, nwe wulyuvu, ni bayeyi bakye.'' ¹¹ Nangweza, ''Ni rumbe shikati, kwenu wu lyuvu; ni siye bayeyi kowo bamu rumbe.'' ¹² Nangweza, Isaya matikya, ''Runzi rwa Jese sharuye, yeye ku kuswa kwendisa lyuvu; shaye lyuvu shalibe ni sepo.'' ¹³ Pani Urezya i sepo ani tyere kwidze indi kuli keta muku tishira, atikya shi qumu umupupo omu chena nibe ni sepo. ¹⁴ Indimye ndati tishiri shanwe, Ba kwanga, Ndati shiri shuku tikya indinwe abwene ni yire wuqa, niyere ingana. Ndati shiri akya indinwe abwene nati kwana kuli zwarara. ¹⁵ Kono Ndati ñara shumu ñoro wamu kuru kuwe shizuto zizimwe atikya uyana kanwe hape, shi shishemo shindata pewa ku Rezya. ¹⁶ shipewa shopani atikya ndibe muvuya Jeso Keresite tumuwa mulyuvu, kupa akya mupurisita yuliyi lyu Rezya, atikya zitapero zu lyuvu ziti shirwe, akya zi chenusuwe shu mupupo wo muchena. ¹⁷ Ku Jeso keresite ndina libaka lindati kwana kuli kakura shalyo ku Rezya. ¹⁸ Akya kamuni ishendi likye ku hweta ichuto tana isha Keresite isha hweta kume shuku tikya iwu lyuvu bayuvwe izuto zopani zata panguwa shiliyi indi shizisi. ¹⁹ Shi qumu indi shiziqe izati bbemukisa, indi shi qumu iyi mupupo. Zopani kuliku tikya kudzwa ko Jerusalema, indi kuzungura wure wa Iliriko, Ndati kwana kuyisa liyi lya Keresite. ²⁰ Mwi njira yopani, itakazo anga ku tikya ndi hwetye liyi, kono kaku Keresite ayibahara shilina, atikya ndisiye kwi xhini makalyero umuyeyi. ²¹ Ingahopa tandi shukwa ñoruwa: ''Bapa ibahata ziruwa sha bamu mwenwe, indi bapa ibahata yuvwa zikye sheba yuvwe.'' ²² Shuku tikya indimye ndata qhapurwa kwi zuto zizinji kuya ku kyee. ²³ Kono pani, ndimuku shibaka muni, mi ndina imwaka yi minjii kwi qaba kuya kunwe. ²⁴ Ndati sepa kuya kuni mwana pu shanda ku tsura kwenda spain, indi kuya ku tusuwa kunwe njira anga, putaru kuya kuba paxiki ndata radze. ²⁵ Kono pani ndatyenda ko Jerusalema, ku lyeta kuya kuwa ku bayeyi wu Rezya baba chena. ²⁶ Cware kali kuqa ko Masodonia indi Akaya indi kuya ku panga ichumwe ku bayeyi wu Rezya baba hungwe ibana jerusalema. ²⁷ Eyee, kali kakanda kakaqa kuwo, mi bata bika shukoroti kuwo. Ati wu lyuvu batalipa kwizuto zu mupupo, batazi korota ku Majuda kuba ziseberezo zawo ni zuto zu lyuvu. ²⁸ Cwarehe, pundaru ku mana zindata pewa mi ndaku mwana akya bashangana kozo zubata yisa, Ndatyenda Spain mi indi kuya kuni pwetira muru kito rwanga. ²⁹ Ndi yizire akya ndishiya kunwe ndati swenera kuya ni zi mbuyoti za Keresite. ³⁰ Pani ndati ni rungira, bakwanga, sha Shikati etu Jeso Keresite, indi shuru suno ru mupupo, atikya turwanwe paxiki name muzi patero zenu ku Rezya kume. ³¹ Ni rapere atikya ndiya kuwe kuba hati tishira mo Judeaakya misebezi anga mo Jerusalema yi tishirwe ku bayeyi baba chena wu Rezya. ³² Ni rapera atikya ndiye kunwe mwi kwidze shuku shaka ku Rezya, Ati ndibe, paxiki nanwe, tishangane ku tsutsuruka. ³³ Urezya ywi kozo abe nanwe kwenu. Amen.