¹ Ni yamuhere yamati shushira peshi mitumero, ni kwaha muyatura shizi kani. ² Yuyumwe matiti shira ukulya izulyuwa kozo, yo mushushira peshi matilya ngaho miroho. ³ Yama tilya kozo asiye kwiñxa yamati zilya; mi yahati zilya asiye ku yatura yamatilya ichimwe ni chimwe. Shuku tikya Urezya mamu chinjiri. ⁴ Wendi yani, atikya uranxa muvuya yuyumwe yamati wulya ku yumwe? Ipu maso a shikati akye kapa matiwa kapa ku gipa. Kono mbwa gipe, Shikati ati kwana ku magisa. ⁵ Muyeyi uyumwe mati lyaya akya liba lilimwe likuru kunga ngamwe. Uyumwe mati ngayisa akya ngati fwena. Kowo bati shire shumu yanakano awo. ⁶ Yamati kutyeka liba, kuli kutyeka sha Shikati; indi yama tilya, Kulya sha Shikati, Yamati kambira ku Rezya. Yeye yahatilya, mati panga akyo sha Shikati; matili tumera ku Rezya. ⁷ Ku njemwa kutswe yamati para shayeye, mi kuku yamatafwa. ⁸ Tati para, tatira sha Shikati, mi tishifwa, tatifwa sha Shikati. Kapa tatira kapa kufwa, imba Shikati. ⁹ Shilibaka yopani Keresite matafwa indi ku para nangweza, atikya abe Shikati awo kowo batafwa indi baba yimi ¹⁰ Kono yenwe, shikya punati yatura bakwenu? Indinwe, shikya punatinxa bakwenu? Tishi kayima kwetu pushuro shikaturo shu Rezya. ¹¹ Kweta ñworuwa, ''Shame yamati para,'' ku hweta Shikati, ''Madzi kongo shanga kubame, mi showo koyo shayilipe ku Rezya.'' ¹² Nangandi pakyo, muyeyi kwekye shali tabama halinwe ku Rezya. ¹³ Cwarehe, tisiye kuli ya tura tswebalinwe, kono ni pange zini, akya uyumwe asiye kubika shibbi kapa kutyera mukwekye. ¹⁴ Ndiyi zire indi ku tishira ku Shikati Jeso atikya ku njemwa shali shichena chohalinwe ngaho. Tana yeye yamati shimwana kwaha chena, kukye shina masira. ¹⁵ Ati mati yuvusa mukwe wubbi shushu lyuwa, amu kwenda murusuno. Siya ku bbura uyumwe shushu lyuwa yamata fwerwe ku Keresite. ¹⁶ Siya ku tishira zumati mwana wuqa ku panga wubbi. ¹⁷ Muwuso Urezya kangu zulyuwa kapa kunwa, kono ingu wuchena, kozo, indi kwidze mu mupupo wo muchena. ¹⁸ Yamati bberi shira Keresite mwi njira yopani mati tishirwa ku Rezya mi indi bayeyi. ¹⁹ Cwarehe, tishakye izuto zi kozo izuto zatiqhini kwetu. ²⁰ Siya ku bbura mubberiko Urezya shushu lyuwa. Izuto kozo zi chena, kono wubbi muyeyi kulya kocho ngaho shati lyeta yuyumwe kuwa. ²¹ Wuqa kwahalya inyama, ni siye kunwa i waine, nanga ishati wusa mukwenu. ²² I tumero ini sitye, niyi bikye pakati lyenu indi Urezya. Ku fuyorwa iku muyeyi yahati guniwa kwi zuto zamata liti shirwa. ²³ Yeye yana zuntongo wuzi ku zulyuwa, shuku tikya kazu dzwa kwi tumero. Mi kocho shahati dzwa kwi tumero shibe.