¹ Ndati ku zira febe muqhonwe etu, yewe muvuya mwi kereke iyina mo Senkreya. ² Atikya umu pambure ku Shikati. Rasi zini mwi njira yiqa ya bayeyi babaqa wu Rezya, mi ni muyakye kwi chuto kocho shika ku shaka kunwe, mata yaka babenji mi indi kunwe akyopa. ³ Ni rawaya Prisila indi Akila, baya kuzi banga ku Jeso Keresite. ⁴ Ibatapa wuparo wawo. Ndati kambira kuwo, mi kamye ngaho, kono indizi kereke za mulyuvu. ⁵ Nira waya zi kereke izina muzi baka zawo. Nirawaya Epaineto ya shakuwa, yeye mutamuno iwa Asia koku Keresite. ⁶ Nirawa Maria, ya mata bberika nanyina shanwe. ⁷ Nirawaya Androniko indi Junyasi, bakwanga bara tire namye mwi torongo. iba yibahara indi kuma apositora, mi barana ku Keresite itandzi kume. ⁸ Rawaya Ampliasi, ya mati shakauwa sha Shikati. ⁹ Nirawaya Urbano, muyakuzi mu mubberuko a Keresite, indi Stakisi, ya mati shakuwa. ¹⁰ nirawaya Apele, yatishirwa ku Keresite. Nirawaya bapa wi njuwo Aristobulu. ¹¹ Nirawaya Herodioni, mukwanga. Nirawaya indi wi njuwo a narsiso ibana ku Shikati. ¹² Nirawaya Trifena indi Trifosa, bati bberika nanyina ku Shikati. Nirawaya Persida yamati shakuwa, yamati bberika nanyina ku Shikati. ¹³ Narawaya Rufusi, yamata sharuwa ku Shikati, indi nyina bama. ¹⁴ Narawaya Asinkrito, Flegono, Hermes, Patrobasi,Hermesi, indi bakwakye batyire nakye. ¹⁵ Narawaya Filologo indi Julia, Nerea indi muzatakye yushi rwakazi, indi Olimpa, indi kowo bayeyi wu Rezya baba chena ibana nakye. ¹⁶ nirumere kwenu shukuli xupita shuwu chena. Kozo zi kereke za Keresite ni rumere. ¹⁷ Nwe bakwanga, pani ndati zira, ku yanakana bapa ibati lyeta kuka wuhana indi kulyeta zezibbi. Batidzwa muzinata lituta. Ni dzwa kuwo. ¹⁸ Bayeyi bati fwana ni bapa amaba ku bberishira Shikati etu Keresite, kono mara awo ngaho. Shamayi ingati yuvusa wutuku indi ku kyezira kyezira kudzisa mitima iyaha yi zire. ¹⁹ Shumu tara enu iwu kuyuvusisa kaya kuyumwe nu yumwe. Ndatidze, cwarehe, nanga inwe, kono ndati shaka akya ni sawushire ze ziqa, indi kwaha yiba zezibbi. ²⁰ Urezya ikozo papani ngaho ishaku xapura Satani mwishi lya makondo enu. Shishemo sha Shikati etu Jeso Keresite shibe nanwe. ²¹ Timotea, Mbiyanga ku mubberiko, rumera, indi Lusiusi, Josani, indi Sosipatere, bakwenga. ²² Yemye, Tersiusi, yamata ñwara lyuñoro peshi, ndani waya ku Shikati. ²³ Geyusi, yamandi tandura indi kereke koyo, ni rumero. Erasto, mwi qawu-qawu umunzi, ni rumere, indi Kwarto mukura kye. ²⁴ Rusuno rwa Shikati Jeso Keresite rube nanwe. ²⁵ Pani ko kukye yama tikwana kuni gisa mu lyiyi indi wu kutazi wa Jeso Keresite, kwenda shuku zukura zu hweta zata bikuwa zizika kudzwa kantandzi. ²⁶ Kono pani zazukuruwa indi kuyibahara shuwu porofita ku ñwara lyuvu, shizi zira zu Rezya, ku lyeta kwisi naqa kwi tumero. ²⁷ Ku Rezya umunu uku sawuka, sha Jeso Keresite, kube akyopa. Amen.