¹ Ati Urezya mani tambusa ni Keresite, ni shake izuto za kwi liiro, ku Keresite sise ku lyanja lima khamu Urezya. ² Yanakana izuto za kwi liiro, ka zuto za peshi. ³ Shuku tikya matafwa, mi wuparo wee mizika ni Keresite ku Rezya. ⁴ Pushi Keresite aku mwanahara, yeye wuparo wenu, indinwe shani mwanahare mu kanya. ⁵ Ni bike kurufu, zirama za mulyuvu - wuhure, zamasira, ku fuma, zitakazo zezbbi, likono. ⁶ Zopa ndizuto zu wuqyu wu Rezya watiyera kwa bana bahati yuvwa. ⁷ Mi indi nwe zopa ndizinaru kwenda nazo kare. Hane musa pira ku zona. ⁸ Kono pani nati swanera kudzwa kuzo kozo- wuqyu, indi ku menga, kwaha shaka babamwe, indi mayi ingati xorosini kawo ngasiye kudzwa mi milomo enu. ⁹ Ni siye kuli kyitaka, shuku tikya nata chutura umutu ya kare indi misebezi akye. ¹⁰ Mi kali narara umutu yo muyo mupiya kwenda shishi swaniso shaya mata ni wumba. ¹¹ Kali kuku Mugerike kapa Mujuda, wu mupato haka nju mupato, yo mukelira kapa Sitiya, muvuya kapa yahali muv uya, Keresite ikozo, indi muzo kozo. ¹² Cware, ni shiba bata sharuwa, baba chena, bati shakuwa, ni rare miyanakano yuzu xuma, musa, kuli shusa mwishi, wutwere-twere indi mutima wo mure. ¹³ Ni lipange naqa. Ati kuna shuyumwe amati nchiyaka, nili patire mwi njira yati fwana shi Shikati amata ni patira. ¹⁴ Kuzopa kozo izuto, rusuno ndishati panga kuba naqa. ¹⁵ Ni siye i kozo a Keresite iyendise mi tima enu. Isha yopa ikozo nanga nata beruwa mumbiri mixiki. Mi nikambire. ¹⁶ Ni siye liyi lya Keresite lyati para kunwe lira xhini wufumu. Linipe wusauka kowo ni lirutye indi kuli kutaza sha lisamu, shuku rumba indi zunjumbo zu mupupo. Ni yimbe shuku kambira mu mitima enu ku Rezya. ¹⁷ Kocho shina tisi, muku hweta indi muzisi, nirasi kozo mulina lya Shikati Jeso. Nipe kuli tumera ku Rezya She shayeye. ¹⁸ Barwakazi, nili bike kwishi lyaba banu, kakuli kakwati swanera ku Shikati. ¹⁹ Barwa, ni shake barwakazi benu, mi nisiye kuba qyupira. ²⁰ Abana ni yuvwe bashemuzi benu moni zuto kozo, kakuli ndishati dzekawo Shikati. ²¹ Tatye, ni siye ku qyusa abana benu, atikya basiye ku mana mitima. ²² Bavuya, mizuto kozo ni kutyekye mashikati enu ba bayeyi, ni siye kuba bberishira bakuni lyayira ngaho, nokoti nati shaka ku tabisa bayeyi, kono ni kyezire shu mutima wo muchena. Ni ywepe Shikati. ²³ Kocho shina tisi, ni bberike shuru pupo tandi ku Shikati mi kanokoti bayeyi. ²⁴ Ni yizire atikya mboni tambure ku Shikati kusharuwa ku jowura. I Shikati Keresite yina ti bberishira. ²⁵ Kwekye yamatisi wubbi shata mbure murandu ku wubbi wamata rasi, mi njemwa iketururo.