¹ Ndati shaka atikya ni yibe wukuru wa mashando ndisitye kunwe, ku bana mo Laodisea, indi babenji ibahata ndi mwana mwi nyama. ² Ndatisi atikya mi tima awo i susuwezwe shuku balyeta paxiki mu rusuno indi muku yanakyenwa kuba ni ku yuvusisa koku yire, mwi ngana iyi ku yiba wukuru wu Rezya wali zika, akya, i Keresite. ³ Moku kye shufumu shuwu sauka indi ingana izika. ⁴ Ndati hweta zopani atikya kusiye kaba niyama ni kwama shizi hweta. ⁵ Nanga ndali ndi muku nanwe shi nyama, ndina nanwe mu mupupo. Ndatidze kuni mwana nina naqa indi ku gipi kwi tumero ku Keresite. ⁶ Tandi shina tambura Keresite Shikati, nwendye nakye. ⁷ Ku mena ku kye, kwi xhini ku kye, ku panguwa mwi tumero tandi shinata rutuwa, indi kuba paxiki mukupa. ⁸ Ni mwene atikya ku njemwa yamati kwana kuni pata shingana yana nayo kapa ku kitaka. Kwenda shingana umuyeyi, ku tishira mi pupo yiminjii yu lyuvu, indi kwaha tishira ku Keresite. ⁹ Kakuli koku kye ku yire koko iku Rezya kwati para mushu wumbuwa shumu mbiri. ¹⁰ Ni bayire moku kye, yeye ndumu kuru kuba yendisi kowo indi murawo. ¹¹ Moku kye nata panguwa mupato shu mupato iwahati siwa ku bayeeyiiwu ku tsura shirama shumu mbiri kapa inyama, kono mu mupato a Keresite. ¹² Nata njena nakye mwikorobezo, shayeye nata kulyusuwa mwi tumero mu mata Urezya yamata muta mbusa ku bafu. ¹³ Pukali umufu shimi randu aye indi mupato umumbiri, mata ku tambusa uku para nakyeindi kuku patira mirandu aye. ¹⁴ mata manisa zisi zezi ñwara izishi koroti isharana natswe shuku shitwara pu shibambiro. ¹⁵ Mata yanga bayendisi zi rweniso zawo indi mata indi ku ywasa bayeyi kuku cera murawo awo, kuba fwera pu shibambiro. ¹⁶ Nduku tikya, siya ku yatura muyeyi muku lya kapa kunwa, kapa shi shangano, umwezi wo mupiya, kapa shi mayiba i sabata. ¹⁷ Yopani ndimi ndzire izuto zatiya, kono yamati yaka i Keresite. ¹⁸ Ku siye kuba ni muyeyi ya mati shaka milimo indi ku rapera manyiloi akya ani ya ture zisi zenu. Muyeyi ywa ngahopa mati njena mwi zuto za mata mwana indi ku dzwa mwazo muku rusuno shimi yanakano iyi nyama akye. ¹⁹ Yemwa aku pata ku mushoro akye. Mushoro ndiwati lyetisa atikya mu mbiri kowo mwikyo lyama ngwero ku nyangase ku kwanahare kupata paxiki; kwati kura kugipa ikwati dzwa ku Rezya. ²⁰ Ati natafwa paxiki indi Jeso ku mipupo iyi lyuvu, shikya punati para tand muyeyi yamata sharuwa mu lyuvu: ²¹ ''Siya kwisi, kwi qaba kapa ku pata''? ²² Kozo izuto zopa shezi mane ku musebezi, kwenda shi mirawo indi zututo zu muyeyi. ²³ Mirawo yopani yina shuku sauka, indi ku sauka shukuli panjira indi milyumo indi kwi suwa wubbi ku mumbiri. Kono zinjemwa ituso nuku njenuswa kwi nyama.