¹ Mashikati, nipe bavuya sheshiqa, indi shati swanera ni yibe atikya indinwe nina Shikati kwi liiro. ² Nidzere ku wuso ni ku rapera. Nira qowo amina mo shuku litumera. ³ Niti rapere ko inditswe, Akya Urezya aya zure mumbero uliyi, ku hweta injahamu yizika ya Keresite. Shilibaka lyopa, ndumuli shimina. ⁴ Ni rapere atikya ndikwene kuyi chenisa, mwi njira yati swanera ku hwetuwa. ⁵ Ni yendye shuku sauka ni bapyenje, ni yake inako naqa. ⁶ Mayi enu ngabe ni shishemo. Niba kwazire bapange zizi shiyama, atikya ni yibe shina ku bara taba. ⁷ Tandi shizuto zandi yama, Tachicus mbwazi yiba haze kunwe. Imbiyanga yamati shakuwa, muvuya ya mati sepahara, muvuya a Shikati. ⁸ Ndamu tumu kunwe sha chini, atikya ni yibe shati shakahara kwamana natswe, atkya a susuweze mitima enu. ⁹ Ndamu tumu paxiki ni Onasumusi yamati sepahara indi ku shakuwa, yuyumwe akunwe. Mbobaye kuni zira kozo zatara sisini koni ¹⁰ Aristachus, itarana nakye mwi torongo, mani waya, akyopa indi Mareka, muqhene a Banabasi (yamati yamuhera murawo; ati akuya kunwe, ni mutambure). ¹¹ indi Jeso yamati beruwa Jusitasi. Bapa ngaho wu mupato bambiya banga mu musebezi umu wuso wu Rezya. Batandi wusa mutima. ¹² Epafrasi mani waya, muvuya a Jeso Keresite. Yamani rwena muzi tapero, ni yime nali ni bashiyama indi kuli bika kubbelira kuku shaka koko ku Rezya. ¹³ Ndati mupaka, akya mata bberika nanyina shenu, indi ba Laodisea, indi ba Yerapolisi. ¹⁴ Luka uñaka yamati shakuwa, indi Demasi, bani waya. ¹⁵ Ni waya bakwetu mo Laodisea, indi Nimfasi, indi kereke iyani mwi njuwo akye. ¹⁶ Liñoro lyopani pulyaku baruwa mwikyo enu, libe ruwe indi mwi kereke a Laodisea, ni mwene atikya nati bara indi liñoro kudzwa Laodisea. ¹⁷ Nangweza ni zire Arkipo, ni kikya, ''Lyaya musebezi wuma tambura ku Shikati, atikya uwu manee.'' ¹⁸ Kwi wayiwa uku lyanja lyanga, mye -Paulusi. Ni yanakane zi shimina zanga. Shishemo shibe nanwe.