¹ Empak Yesus tuhun dahi atas bukit, kehumun uhang banyak ngimbai Ia. ² Waktu iyak, datang meh uhang yang kenak kudung ahung Ia alu sujud dadap Ia, jekuk ia," Tuhan, entik Nuan mauk, Nuan tau nyembuh aku." ³ Yesus nguluh jahi Ia alu neguk ia, jekuk Ia," Aku mauk, jadi meh sembuh." Sekini iyak ugak ia sembuh dahi penyakit kudung iya. ⁴ Yesus bandai ahung ia,' anang madah ahung uhang lain. Angkat alu padah meh dihik nuan ahung imam, baik meh pesembahan baka yang di pehintah Musa, isak jadi saksi bagi sidak. ⁵ Empak Yesus masuk ke Kapernaum, suhang pewiha Romawi datang ahung Ia seta mintak, ⁶ jekuk ia," Tuhan pemantuk åku tegalai lumpuh di humah seta pedih benah." ⁷ Yesus bandai ahung ia," Aku akan datang seta nyembuh ia." ⁸ Pewiha iyak nyaut alu bandai," Tuhan, aku nda pantas entik Nuan ahus tamak alam humah aku, sebut magang apa yang tau disebut, pemantuk aku pasti sembuh. ⁹ Kehena aku ugak uhang yang behada di babah kuasa, aku bisik ugak phajuhit yang di babah aku. Entik aku bandai ahung yang suhang ' angkat,' ia pun angkat, alu dengan sidak lain ' datang,' ia pun datang, dengan pemantuk aku, ' keheja utan ituk' ia pun ngeheja iya. ¹⁰ Seta Yesus ninga iyak, Ia palin salut, alu bandai ahung sidak yang nambah Ia," Sesungguh iya Aku bandai ahung kian, Aku nisik nemu sepa pun dengan iman baka ituk di Israel. ¹¹ Aku bandai ahung nuan, banyak yang jekak datang dahi timuh dengan bahat, sidak jekak galai dampin mija besama Abraham, Ishak, seta Yakub, alam kehajaan surga. ¹² Tapi padak anak kehajaan iyak akan di tebak kalam pengangap yang palin kangap, diak akan bisik hatap dengan kehit gigi." ¹³ Yesus bandai ahung pewiha iyak," Angkat meh! Baka yang udah nuan pecayak." Pemantuk iyak sembuh sekini iyak ugak. ¹⁴ Empak Yesus datang ke humah Petrus, Ia mantau ibuk mentua ia tegalai demam. ¹⁵ Yesus neguk tangan ia, demam ia pun alu bait. Ia pun alu angkat seta mulai ngelayan Yesus. ¹⁶ Pas ahi malam, banyak uhang yang di hasuk iblis di baik ahung Yesus. Ia ngusih keluah ruh-ruh iyak makai Firman seta nyembuh semua yang sakit. ¹⁷ Dengan caha iyak, di genap meh apa yang udah di padah nabi Yesaya, jekuk ia," Ia kedihik yang udah ngambik pelemah kita seta nanggung penyakit kita." ¹⁸ Waktu Yesus mantau uhang banyak dampin Ia, Ia mehintah sepaya angkat nuju sebehang laut Galilea. ¹⁹ Alu datang meh suhang ahli Taurat ahung Ia alu ngumung," Guhu, aku jekak ngimbai Nuan kemenapun Nuan angkat." ²⁰ Yesus bandai ahung ia, " Padak sehigala bisik lubang, padak biuk di langit bisik sahang, tapi Anak Mensia nisik ahung pakai ngelegak kepala Ia." ²¹ Muhid yång lain bandai ahung Ia," Tuhan ijin meh aku lebih duluk pakai aku angkat seta ngubuh apang aku." ²² Tapi saut Yesus ahung ia," Imbai meh Aku, isak meh uhang mati ngubuh uhang-uhang mati sidak. ²³ Empak Yesus nait kalam pehau, padak muhid Ia pun tambah ngimbai Ia ugak. ²⁴ Nda lamak datang meh badai besah di laut, sampai pehau iyak tetutup ombak. Tapi Yesus tetiduh. ²⁵ Padak muhid Ia datang nguas Ia, alu bandai," Selamat meh kami, Tuhan, kita ampih mati!" ²⁶ Yesus bandai ahung sidak," ngapa dik kian takut, kian yang iman ia senik?" Ia pun alu angkat seta nyehegah hibut dengan laut. Abis iyak laut alu tenang benah. ²⁷ Uhang-uhang diak ihan alu bandai," Uhang apa Ia ituk, sampai-sampai hibut dengan laut nuhut ahung Ia?" ²⁸ Seta Yesus datang ke sebehang, iyak daehah uhang Gadara, dua laki yang kehasuk sitan datang ahung Ia. Sidak keluah dahi ahung uhang ngubuh seta palin bebahaya, sampai nda bisik uhang yang masuk daehah iyak. ²⁹ Nda lamak sidak betumbau alu bandai," Apa uhus Nuan dengan kami, Anak Allah? Apa Nuan datang pakai nyiksa kami senapan waktu yang udah ditentu?" ³⁰ Bisik bala babi yang banyak agik tengah makan, nda jauh dahi sidak. ³¹ Sitan-sitan iyak ngemuhun tehus ahung Yesus alu bandai," Entik Nuan ngusih kami keluah, usih meh kami ahung bala babi yang banyak iyak." ³² Yesus bandai ahung sidak," Angkat meh." Iblis-iblis iyak pun keluah alu tamak kalam padak babi iyak. Nda lamak bala babi yang banyakk iyak ligas-ligas nuhun bukit yang hibang nuju laut, sidak pun mati alam aik. ³³ Uhang yang miaha babi iyak hahi. Empak sidak tamak ke kuta, sidak madah semua iya, yang petama apa yang udah tejadi ahung uhang yang kehasuk sitan iyak. ³⁴ Sekini iyak ugak semua penduduk kuta keluah pakai betemu Yesus. Seta sidak mantau Ia, sidak ngehinuk ahung Ia sepaya Ia angkat dahi daehah sidak.