¹ Yesus nait ke pehau, nyebehang, datang ke kuta Ia. ² Pantau meh, sidak ngemaik ahung Ia suhang lumpuh yang tegalai atas alas. Mantau iman sidak, Yesus bandai ahung uhang lumpuh iyak," Nak, besenang meh. Dosa nuan udah di ampun." ³ Pantau meh, bebehapa uhang di entaha sidak yang ahli Taurat bandai sesama sidak," Uhang ituk tengah ngehujat." ⁴ Yesus ketau apa yang sidak pikih alu bandai," Ngapa dik nuan mikih utan yang jat alam ati nuan? ⁵ Kehena mena yang lebih mudah di sebut,' Dosa-dosa nuan udah di ampun,' atau bandai,' Angkat alu bejalan meh? ⁶ Tapi sepaya nuan ketau bahwa Anak Mensia bisik kuasa di bumi pakai ngampun dosa,.. " Ia bandai ahung uhang lumpuh iyak," Angkat meh, angkat alas nuan, pulang meh kehumah nuan." ⁷ Uhang iyak pun angkat alu pulang ke humah ia. ⁸ Seta uhang banyak mantau hal ituk, sidak ihan alu ngemuji Tuhan, yang udah mehik kuasa baka iyak ahung mensia. ⁹ Udah Yesus angkat dahi iyak, Ia mantau suhang yang nama ia Matius, yang tengah duduk ahung penagik pajak. Ia bandai ahung ia," Ngimbai Aku." Ia pun alu angkat seta ngimbai Yesus. ¹⁰ EmpakYesus di humah jekak makan, keliat, banyak penagih pajak seta uhang bedosa datang alu makan besåma Yesus dengan padak muhid Ia. ¹¹ Seta uhang Farisi mantau hal baka iyak, sidak bandai ahung padak muhid Ia,"Ngapa dik guhu nuan makan besama dengan padak penagih pajak seta uhang bedosa?" ¹² Seta Yesus ninga hal baka iyak, Ia bandai," Uhang yang kuat tubuh ia nda mehelu tabib, hanya uhang yang sakit. ¹³ Nuan seahus iya belajah apa heti iya: ' Aku mauk mintak kegauk, ukan pesembahan." Kehena Aku datang, ukan pakai ningkau uhang yang benah sepaya betubat, tapi uhang yang bedosa." ¹⁴ Alu muhid-muhid Yohanes datang ahung Ia alu bandai," Ngapa kami dengan uhang Farisi bepuas nacah, tapi muhid-muhid Nuan nda bepuasa?" ¹⁵ Yesus bandai ahung sidak," Tau meh padak uhang yang di undang waktu pesta uhang nikah besedih, selagik mempelai laki besama sidak?" Tapi ada ahi iya mempelai laki di ambik dahi sidak, waktu iyak meh sidak bepuasa. ¹⁶ Nisik uhang yang nambal kain yang agik bahu ahung baju bahu dengan baju yang udah lamak, kehena yang pakai nambal iyak tau nyuhuh pesuk seta nambah pesuk iya besah. ¹⁷ Uhang pun nda mungkin nahuh angguh yang agik bahu kalam kantung kulit yang udah tua. Entik baka iyak, kulit iyak pasti pecah, angguh pun tumpah, kantung pasti husak. Tapi uhang nahuh angguh bahu alam kantung kulit yang agik bahu, sidak dua iyak pun aman. ¹⁸ Tengah Yesus bandai baka iyak, datang meh uhang pejabat alu nyembah Ia, ia bandai," anak aku bahu mati, datang meh Nuan ngelegak tangan Nuan katas ia, ia pasti idup." ¹⁹ Yesus dengan padak muhid Ia pun alu ngimbai ia. ²⁰ Pantau meh betinak yang setengah mati ngidap penyakit pendahah selemak dua belas taun, datang nampin Yesus alu neguk ujung jubah Ia dahi belakang. ²¹ Ia bandai dengan dihik ia kedihik," Entik aku neguk utan yang dipakai Ia, aku pasti sembuh." ²² Tapi Yesus ngeliat alu bandai," Anak Ku, kuat magang dihik nuan. Iman nuan udah nyembuh nuan." Sekini iyak betinak iyak alu sembuh. ²³ Seta Yesus datang kehumah pejabat iyak, Ia mantau padak peniup sulin seta uhang banyak hibut. ²⁴ Ia alu bandai," Angkat kian, anak daha ituk ukan mati, tapi ia tiduh." Tapi sidak ketawak kai Ia sambil nungak Ia. ²⁵ Udah uhang banyak keluah, Ia tamak kalam kamah alu nyamang tangan ia, betinak daha iyak pun alu angkat duduk. ²⁶ Behita kejadian iyak tesebah sampai ke semua daehah. ²⁷ Seta Yesus angkat dahi iyak, bisik dua uhang butak ngimbai Ia. Sidak dua bebingan kayah-kayah alu bandai," Gauk meh ke kami, Anak Daud." ²⁸ Empak Yesus tamak kehumah, uhang butak iyak datang ahung Ia. Yesus bandai ahung sidak," Apa kian pecayak kalau Aku tau ngeheja hal ituk?" Sidak nyaut Ia," Auk, Tuhan." ²⁹ Yesus pun alu megang mata sidak sambil bandai," Jadi meh ahung kian baka iman kian." ³⁰ Alu tebukak meh mata sidak. Alu dengan tegas Yesus mehintah sidak dengan bandai," Anang sampai ada uhang yang ketau hal ituk." ³¹ Tapi sidak dua iyak keluah alu madah behita iyak ke semua daehah diak. ³² Udah sidak dua iyak angkat, pantau, bisik suhang bisuk agik kehasuk sitan di baik ahung Yesus. ³³ Seta sitan iyak udah keluah, uhang bisuk iyak pun alu tau ngumung. Uhang banyak diak ihan alu bandai," Napan kalak hal baka ituk tejadi di Israel!" ³⁴ Tapi uhang Farisi bandai,"Kehena penguasa sitan,Ia ngusih sitan." ³⁵ Yesus udah datang ampih je semua kuta dengan desa. Ia ngajah tehus alam padak sinagoge sidak bekutbah ke injil Kehajaan Surga, seta nyembuh semua macam penatang penyakit dengan semua macam penyakit. ³⁶ Empak Ia mantau uhang banyak, timbul pengauk Ia pakai sidak, kehena sidak banyak masalah dengan pemedih. Sidak baka dumba yang nisik pengembala. ³⁷ Ia bandai ahung padak muhid Ia," Utan yang jekak di anyi mimang banyak, tapi yang bekeheja sikit. ³⁸ Kehena iyak pentin benah bedoa kuang yang empu utan yang jekak di anyi, isak Ia tau ngihin padak pekeheja ahung yang jekak Ia anyi.