¹ Anang ngehakim, nuan pun nda di hakim. ² Kehena dengan penghakiman yang nuan pakai untuk ngehakim, nuan akan di hakim. Alu dengan pengukuh yang nuan pakai untuk ngukuh, akan di ukuh ugak ahung nuan. ³ Ngapa nuan hanya mantau selumbah di mata menyadik nuan tapi nuan nda mantau batang kayu yang bisik di mata nuan kedihik? ⁴ Kati baka nuan tau bandai ahung menyadik nuan," Aku jekak ngeluah selumbah yang bisik di mata nuan,' sementaha batang kayu di mata nuan? ⁵ Nuan munafik! Petama-tama, keluah meh batang kayu iyak dahi mata nuan, bahuk nuan mantau dengan jelas pakai ngeluah selumbah yang dimata menyadik nuan. ⁶ Anang meh mehik utan yang kudus ahung asuk, alu anang meh nikam mutiaha nuan kadap babi. Entik baka iyak, sidak mungkin nyijak-nyijak iya, abis iyak alu bebalit ngehansik nuan. ⁷ Mintak meh maka nuan akan di behik. Gegak meh maka nuan akan nemu iya. Ketok meh maka akan di bukak untuk nuan. ⁸ Kehena setiap uhang yang mintak, nehimak. Alu setiap uhang yang ngegak, nemu. Ahung uhang yang ngetok akan di bukak. ⁹ Atau bisik meh di entaha kian yang entik anak ia mintak huti, alu mehik ia batu? ¹⁰ Atau entik ia mintak ikan alu mehik ia ulah? ¹¹ Kehena iyak, entik nuan yang jat ketau kati baka mehik yang bait ahung padak anak nuan, lebih lagik Bapak nuan yang dahi surga mehik hal-hal yang bait untuk sidak yang mintak ahung Ia. ¹² Kehena iyak, apa magang yang di kemauk nuan sepaya uhang ngeheja iya ahung nuan, nuan seahus iya ngeheja iyak ugak ahung sidak, kehena ituk meh ukum seta kitab padak nabi. ¹³ Tamak meh ngimbai gehebang yang sekat. Kehena luah gehebang, besah meh jalan yang ngemaik ahung utan yang ancuh, seta banyak mensia yang ngimbai iya? ¹⁴ Kehena sekat gehebang, pedih meh jalan yang ngemaik ahung pengidup, seta hanya sikit uhang yang tau nemu iya. ¹⁵ Wapada meh tehadap padak nabi yang nda benah yang datang ahung nuan dengan makai baju domba tapi iyak meh sehigala-sehigala yang palin lapah. ¹⁶ Ngelalu buah iya meh nuan akan ngelalak sidak. Apa uhang-uhang ngumpul buah angguh dahi humpuk besisih atau buah kayu aha dahi humput besisih? ¹⁷ Makai caha baka iyak ugak, tiap kayu yang bait mehik buah yang bait, tapi kayu yang nda bait, mehik buah yang nda bait. ¹⁸ Kayu yang bait nda mungkin ngehasil buah yang nda bait, atau kayu yang nda bait ngehasil buah yang bait. ¹⁹ Setiap kayu yang ngehasil buah yang nda bait di tebang alu di buang kalam api. ²⁰ Kehena iyak, nuan akan ngelalak ngelalu buah iya. ²¹ Nda semua uhang yang bandai ahung Aku,' Tuhan, Tuhan, jekak tamak alam Kehajaan Surga, tapi hanya sepa yang ngeheja pengemauk Bapak Aku yang di surga. ²² Banyak uhang yang akan bandai ahung Aku pada ahi iyak,' Tuhan, Tuhan, ukan meh kami udah be nubuat alam nama Nuan, ngusih sitan alam nama Nuan, alu makai nama Nuan ngawai segala hal-hal yang nda masuk akal? ²³ Pada waktu iyak Aku secaha tebukak bandai ahung sidak,' Aku nda kalak ngelalak nuan! Angkat meh dahi adap Aku, nuan uhang yang bebuat jat!' ²⁴ Ulih kehena iyak, setiap uhang yang ninga apa yang Aku pandai alu ngimbai iya akan baka uhang bijak yang ngawai humah ia datas batu. ²⁵ Ujan tuhun, pasang datang, seta hibut kuat alu ngehapak humah iyak, tapi humah iyak nda hubuh, empadai di gawai datas batu. ²⁶ Tapi setiap uhang yang ninga apa yang Aku pandai, alu nda ngimbai iya, baka uhang buyuk yang ngawai humah ia datas pasih. ²⁷ Ujan tuhun, pasang datang seta hibut kuat alu ngehapak humah iyak. Humah iyak alu hubuh, semua yang ada diak ancuh ²⁸ Abis Yesus bandai baka iyak, uhang banyak jadi ihan kehena pengajah Ia, ²⁹ kehena Ia ngajah sidak baka uhang yang bisik kuasa, nda baka padak ahli Taurat.