¹ Ingat, anang ngelaku kewajiban agama nuan dadap uhang,isak nuan di pantau sidak, kehena nuan nda akan nehimak upah dahi Bapak nuan yang di Surga entik nuan bebuat baka ² iyak.Jadi entik nuan mehik sedekah, anang nuan muji dihik kedihik baka yang gawai uhang yang munafik alam padak humah ibadah, padak di jalan, isak uhang muji sidak. Sesungguh iya Aku madah ahung nuan, sidak udah nehimak upah iya. ³ Tapi entik nuan mehik sedekah, anang nyuhuh tangan kibak nuan ketau apa yang udah di keheja tangan kanan nuan, ⁴ dengan baka iyak sedekah nuan di behik secaha rahasia. Alu Bapak nuan yang mantau yang rahasia, akan mehik upah ahung nuan. ⁵ Alu entik nuan bedoa, anang baka uhang munafik, kehena sidak palin mauk bedihi dengan bedoa alam padak ahung ibadah seta padak simpang jalan, isak sidak tau di pantau uhang. Yang sebenah iya Aku bandai ahung nuan, sidak udah nehimak upah sidak. ⁶ Tapi nuan, entik nuan bedoa, tamak meh alam kamah nuan. Tutup meh pintu, bedoa meh ahung Bapak nuan yang nisik di keliat. Alu Bapak nuan mantau nuan belabuk, akan mehik upah ahung nuan. ⁷ Entik nuan bedoa anang ngulang kata-kata yang nda beguna baka padak bansa yang ukan Yahudi keheja, kehena sidak bepikih bahwa sidak jekak di dinga kehena banyak iya kata-kata sidak. ⁸ Kehena iyak meh anang baka sidak, kehena Bapak nuan ketau hal-hal apa yang nuan pehelu senapan nuan mintak ahung Ia. ⁹ Ulih kehena iyak bedoa meh baka ituk:' Bapak kami di surga, di kudus meh nama Nuan. ¹⁰ Datang meh kehajaan Nuan. Isak meh kemauk Nuan magang yang tejadi di bumi baka di surga. ¹¹ Behik meh kami pada ahi ituk utan di makan kami. ¹² Ampun meh penyalah kami, baka kami yang udah ngampun uhang yang udah besalah ahung kami. ¹³ Anang ngemaik kami kalam pencubaan, tapi lepas meh kami dahi yang jat." ¹⁴ Jadi entik nuan ngampun penyalah uhang, Bapak nuan yang di surga pun akan ngampun nuan ugak. ¹⁵ Tapi entik nuan nda ngampun penyalah sidak, Bapak nuan pun nda akan ngampun penyalah nuan. ¹⁶ Apa lagik entik nuan tengah bepuasa, anang madah mua sedih baka yang di gawai bala uhang-uhang munafik, sidak ngehubah haut mua sidak isak di pantau uhang sidak agik puasa. Sebenah iya Aku bandai ahung nuan, sidak udah nehimak upah iya. ¹⁷ Tapi nuan, entik nuan bepuasa, behik minyak kepala nuan, basuk meh mua nuan. ¹⁸ Isak nuan nda di keliat uhang nuan lagik bepuasa, tapi hanya Bapak nuan yang nisik keliat yang mantau. Alu Bapak nuan yang nda keliat mantau, akan mehik upah ahung nuan. ¹⁹ Anang ngumpul pakai nuan heta alam dunia ituk, ahung hengat dengan kahat ngehusak iya, seta pencuhi tau tamak alu nyuhi iya. ²⁰ Tapi kumpul meh untuk nuan heta di Surga, ngengat atau pun kahat nda ngehusak iya, seta pencuhi nda tau tamak pakai nyuhi iya. ²¹ Empadai di mena heta nuan behada, diak magang meh ati nuan. ²² Mata meh pelita tubuh. Kehena iyak, entik mata nuan bait, semua tubuh di penuh tehang. ²³ Tapi entik mata nuan jat, seluhuh tubuh nuan penuh dengan pengangap. Kehena iyak, entik tehang yang bisik alam nuan iyak sebenah iya pengangap, luah biasa hibat pengangap iyak! ²⁴ Nda ada uhang yang tau ngelakun dua tuan, kehena ia akan bencik dengan yang suhang, alu gauk dengan yang sikuk, ia pun akan ngabdi ahung yang suhang alu ngehendah yang sikuk. Nuan nda mungkin ngelakun Allah, alu ngelakun heta. ²⁵ Maka dahi iyak meh Aku madah ahung nuan, anang kuatih dengan pengidup nuan,, apa yang jekak nuan makan atau apa yang jekak nuan minum- atau mengenai tubuh nuan, apa yang jekak nuan pakai. Kehena ukan meh pengidup lebih dahi hanya makan, alu tubuh lebih dahi utan di pakai? ²⁶ Pantau meh bala biuk yang tehebang. Sidak nisik menih atau nganyi,atau ngumpul utan dimakan alam tibang.Tapi Bapak nuan yang di surga yang mehik sidak makan. Nda meh nuan lebih behega dahi sidak? ²⁷ Mena dahi kian yang empadai ia kuatih alu tau nambah sehasta manjang ke umuh ia? ²⁸ Ngapa nuan kuatih tentang utan dipakai? Pikih magang bunga bakung yang di padang, kati baka sidak idup. Sidak nda bekeheja, sidak nda nenun utan di pakai. ²⁹ Tapi Aku bandai ahung nuan, walaupun Salomo alam semua kemuliaan ia, nda bepakai pemait baka sutik dahi bunga-bunga ituk. ³⁰ Entik Allah mehik utan di pakai ahung humput di padang, yang ada hanya ahi ituk alu pagi iya di buang kalam api, lebih lagik Ia akan ndandan nuan, nuan yang kuhang beiman? ³¹ Kehena iyak meh anang meh kuatih seta bandai,' Apa yang jekak kami makan? atau' Apa yang jekak kami minum? atau' Baju apa yang jekak kami pakai?' ³² Kehena bansa-bansa yang ukan Yahudi ngegak hal-hal baka iyak, seta Bapak nuan yang di surga ketau kalau nuan mehelu iya. ³³ Tapi gegak meh duluk Kehajaan Ia seta kebenahan Ia, dan hal ituk akan di behik ahung nuan. ³⁴ Kehena iyak anang meh kuatih akan ahi pagi, kehena ahi pagi bisik penyusah ia kedihik. Semua ahi bisik penyusah ia kedihik.