¹ Seta Ia mantau uhang banyak, Ia nait katas gunung. Udah Ia duduk, padak muhid Ia datang ahung Ia. ² Ia alu mulai bandai seta ngajah sidak, jekuk Ia," ³ Di behekat meh sidak yang miskin alam Ruh, kehena sidak meh yang empu Kehajaan Surga, ⁴ Di behekat meh sidak yang agik besedih, kehena sidak jekak di hibuh. ⁵ Di behekat meh sidak yang bait ati ia, kehena sidak meh yang ngewahis dunia. ⁶ Di behekat meh sidak yang lapah dengan aus akan hal yang bait, kehena sidak akan di kenyang. ⁷ Di behekat meh sidak yang awas ati ia, kehena sidak akan bulih kemuhah. ⁸ Di behekat meh sidak yang muhah ati, kehena sidak akan ngeliat Allah. ⁹ Di behekat meh sudak yang ngemai damai, kehena sidak akan di jenang anak Allah. ¹⁰ Di behekat meh sidak yang aniyaya empadai utan yang benah, kkehena untuk sidak meh Kehajaan Surga. ¹¹ Di behekat meh nuan entik uhang ngehina nuan, seta nganiyaya nuan, dengan madah bemacam pengejat ahung nuan yang nda benah kehena Aku. ¹² Behambik behikah meh, kehena upah nuam besah di surga. Kehena dengan caha baka iyak uhang udah nganiyaya padak nabi yang idup senapan nuan. ¹³ Nuan meh gaham dunia, tapi entik gaham udah nda bisik asa, kati baka meh tau masin lagik? Gaham iyak udah nsik guna lagik, kecuali ia di buang alu di jijak-jijak uhang. ¹⁴ Nuan meh tehang dunia. Kuta yang behada datas bukit nda mungkin tau di labuk. ¹⁵ Baka iyak ugak meh, uhang nda ngidup lampu alu nh÷legak ia dibabah kulak, tapi dilegak ia datas tiang lampu pakai nehang alam humah. ¹⁶ Isak meh tehang nuan ngemansau ke semua uhang, sampai sidak tau mantau pebuat nuan yang bait seta muji Bapak nuan yang di Surga. ¹⁷ Anang bepikih Aku ituk datang jekak ngapus ukum Taurat atau padak Nabi. Aku datang ukan jekak ngapus iya, tapi pakai nhenap iya. ¹⁸ Kehena iyak meh dengan sebenah iya Aku bandai ahung nuan, sampai bumi dengan langit nisik lagik, nda sutik uhup senik atau sutik titit dengan caha apa magang akan lesi dahi ukum Taurat, sampai semua iyak tuntung jadi. ¹⁹ Kehena iyak sepa magang yang ngelanggah sutik magang dahi pehintah-pehintah ituk, alu ngajah uhang lain sepaya bebuat baka iyak, ia di sebut yang palin senik alam Kehajaan Surga. Tapi bagi sepa magang yang megang seta ngajah iya, ia di sebut sebagai yang besah alam Kehajaan Surga. ²⁰ Kehena iyak Aku bandai ahung nuan, kecuali pemenah nuan lebih tinggik dahi pemenah padak ahli Taurat seta uhang Farisi, nuan nda mungkin tamak alam Kehajaan Surga. ²¹ Nuan udah ninga apa yang udah dipadah ahung sidak pada jaman inik muyang,' anang munuh', alu, sepa yang munuh ngadap bahaya penghakiman. ²² Tapi Aku bandai ahung nuan bahwa entik uhang bihang dengan menyadik ia, ia ngadap bahaya penghakiman. Sepa magang yang bandai ahung menyadik ia,' Nuan iyak nisik behega!, ia ngadap bahaya Mahkamah Agama', sepa magang yang bandai,' nuan budu,' ia ngadap bahaya api nehaka. ²³ Kehena iyak entik nuan mehik pesembahan datas mesbah, alu nuan agik ngingat kaban nuan bisik yang ngelawan ati nuan, ²⁴ dudi magang pesembahan nuan iyak dadap mesbah, alu angkat. Bedamai meh duluk dengan kaban nuan, udah iyak datang lagik meh pakai mehik pesembahan nuan. ²⁵ Ligas meh bedamai dengan uhang yang nuntut nuan, kalau nuan betemu ia alam pejalan ke ahung sidang.' kalau nda baka iyak, ia yang nuntut nuan iyak mungkin jekak nyehah nuan ahung hakim, hakim nyehah nuan ahung petugas, udah iyak nuan di masuk alam penjaha. ²⁶ Dengan sebenah iyak Aku bandai ahung nuan, nuan nda akan keluah dahi iyak, sampai nuan ngelunas utang nuan. ²⁷ Nuan udah ninga apa yang udah dipadah,' Anang bebuat jinah' ²⁸ Tapi Aku madah nuan, entik uhang mantau betinak, alu timbul pemikih yang nda bait, ia udah bebuat jinah dengan betinak iyak alam ati ia. ²⁹ Entik mata kanan nuan yang nyuhuh nuan bedosa, cungkil magang mata nuan iyak. Kehena lebih bait untuk nuan entik sutik magang dahi tubuh nuan nisik, dahi pada semua tubuh nuan di tebak kalam nehaka. ³⁰ Entik tangan kanan nuan yang nyuhuh nuan bedosa, tetak magang alu buang jauh-jauh dahi nuan, kehena lebih bait untuk nuan, sutik magang bagian dahi tubuh nuan nisik, dahi pada semua tubuh nuan tamak kalam nehaka. ³¹ Udah di padah ugak,' Sepa yang ngusih bini ia, ia ahus mehik suhat cehai.' ³² Tapi Aku bandai ahung nuan, entik uhang nyehai bini ia, kecuali kalau bini ia bejinah, ia nyuhuh bini ia jadi pejinah, alu sepa yang jadi ke bini ia udah di cehai, ia bebuat jinah. ³³ Sekali lagik, nuan udah ninga apa yang dipadah ahung sidak waktu jaman inik muyang,' Anang besumpah ngakal, tapi baik magang sumpah nuan kadap Tuhan.' ³⁴ Tapi Aku madah nuan, anang sekali-sekali besumpah, bait demi langit, kehena iyak ahung Allah betahta.' ³⁵ atau demi bumi, kehena iyak ahung Allah bejijak, nda ugak tau demi Yerusalem, kehena kuta iyak kuta Haja Besah. ³⁶ Anang ugak besumpah demi kepala nuan, kehena nuan nda tau nyuhuh buk nuan putih atau itam. ³⁷ Tapi sebut meh, auk entik auk, atau , nda entik nda, apa magang yang nyimpang dahi iyak, iyak dahi si yang jat. ³⁸ Nuan udah ninga apa yang dipadah, mata di ganti dengan mata, gigi di ganti dengan gigi.' ³⁹ Tapi Aku bandai ahung nuan, anang ngusih uhang yang jat. Tapi sepa yang nampah pipi kanan nuan, behik ahung ia pipi yang sepiak lagik. ⁴⁰ Entik bisik uhang yang jekak ngemaik nuan ke pengadilan pakai ngambik baju nuan, behik ugak ahung ia jubah nuan. ⁴¹ Entik bisik uhang yang maksa nuan bejalan sejauh semil, bejalan meh himbai ia sejauh dua mil. ⁴² Behik uhang yang mintak ahung nuan, anang nda mauk entik sepa magang yang jekak minjau utan ahung nuan. ⁴³ Nuan udah ninga apa yang udah di padah,' Kita ahus bebait sesama dihik alu suhuh bencik dengan musuh kita. ⁴⁴ Tapi Aku bandai ahung nuan, bebait meh ahung musuh kita, bedoa meh ahung sidak yang nganiyaya nuan, ⁴⁵ sepaya nuan tau jadi padak anak Bapak nuan yang di surga. Kehena Ia meh yang nyuhuh mata ahi tumbuh bagi uhang yang jat dengan yang bait, seta nuhun ujan bagi uhang-uhang yang di benah dengan yang nda benah. ⁴⁶ Entik nuan hanya gauk dengan uhang yang gauk ke nuan magang, apa nuan bulih upah? Ukan meh penagih pajak bebuat piak ugak? ⁴⁷ Entik nuan hanya mehik salam ahung menyadik nuan magang, apa yang udah nuan keheja yang tau lebih dahi uhang lain? Ukan meh uhang Yahudi bebuat piak ugak? ⁴⁸ Ulih kehena iyak, nuan ahus sempuhna baka Bapak nuan yang di surga yang sempuhna.