¹ Yesus alu di ihin Ruh Kudus di baik ke padang guhun sepaya di cuba ulih iblis. ² Abis Ia bepuasa empat puluh ahi empat puluh malam, Ia tehasa lapah. ³ Yang jekak encuba datang, alu bandai ahung Ia," Entik Nuan Anak Allah, suhuh meh padak batu ituk jadi huti." ⁴ Tapi Yesus nyaut alu bandai ahung ia," Bisik tetulis, Mensia ukan idup hanya dahi huti magang, tapi dahi setiap firman yang keluah dahi mulut Allah." ⁵ Iblis alu ngemaik Ia ke Kuta Suci ngelegak Ia dipuncak palin atas dahi Bait Suci, ⁶ alu bandai ahung Ia,"Entik Nuan Anak Allah, jatuk meh dihik Nuan ke babah, kehena bisik tetulis,' Ia akan mehintah malaikat Ia pakai nyaga Nuan, sidak pun akan ngangkat Nuan makai tangan sidak sepaya kaki Nuan nda kenak batu. ⁷ Yesus bandai ahung ia," Sekali lagik, bisik tetulis," Anang nuan nguji Tuhan Allah mu." ⁸ Sekali lagik iblis ngemaik Ia ahung yang palin tinggik, alu madah ahung Ia semua kehajaan di bumi seta dengan pengaya iya. ⁹ Ia bandai ahung Ia," Semua ituk aku behik ahung Nuan, entik Nuan sujud seta nyembah aku." ¹⁰ Yesus pun alu nyaut ia," Anang dituk lagik, Sitan! kehena bisik tetulis,'Nuan ahus nyembah Tuhan Allah nuan dan nuan ahus ngelayan Ia magang." ¹¹ Iblis pun angkat dahi iyak nudi Ia, alu pantau meh padak malaikat datang ngelayan Ia. ¹² Seta Yesus ninga bahwa Yohanes udah ditangkap, Ia pun alu pindah ke Galilea. ¹³ Ia angkat dahi Nazaret alu diam di Kapernaum, dampin danau Galilea, di daehah Zebulon dengan Naftali. ¹⁴ Hal ituk pakai ngenap apa yang udah di padah nabi Yesaya," ¹⁵ Tanah Zebulon dengan tanah Naftali, ngadap ke laut, sebehang Yordan, Galilea dahi bansa-bansa ukan Yahudi. ¹⁶ Padak uhang yang lagik idup alam kangap, udah mantau tehang yang besah, seta bagi sidak yang agik ngehasa takut, bagi sidak udah keluah tehang." ¹⁷ Mulai ahi iyak Yesus mulai bekutbah, Ia bandai," Betubat meh kehena kehajaan Surga udah dampin." ¹⁸ Empak Ia tengah bejalan dampin danau Galilea, Ia ngeliat dua menyadik, Simon yang di jenang Petrus, seta Andreas menyadik ia, agik tengah nyala, kehena keheja sidak saja nelayan. ¹⁹ Yesus bandai ahung sidak dua," Kituk meh, ngimbai Aku, Aku jekak nyuhuh kian jadi penjala mensia." ²⁰ Sekini iyak ugak sidak alu nudi jala seta ngimbai Ia. ²¹ Waktu Ia nehus pejalan Ia, Ia mantau dua menyadik, Yakobus anak Zebedeus seta Yohanes menyadik ia. Sidak alam pehau ngimbai Zebedeus apang sidak, tengah nyembait jala. Ia ningkau sidak. ²² Sekini iyak ugak sidak angkat ngimbai Ia nudi pehau dengan apang sidak. ²³ Yesus ngelilin daehah Galilea, ngajah alam humah-humah ibadah, madah ke injil kehajaan Allah, seta nyembuh bemacam penyakit dengan pelemah di entaha uhang bamyak. ²⁴ Behita tentang dihik Ia udah tesebah sampai ke Siria,sidak ngemaik ahung Ia, semua uhang yang sakit, uhang yang kenak bemacam pemedih jehih, sidak yang kesahung ruh jat, gila babi, srta sidak yang lumpuh, Yesus nyembuh sidak. ²⁵ Uhang banyak ngimbai Ia dahi Galilea, Dekapolis, Yerusalem, seta dahi Yudea , dengan dahi sebehang Yordan.