¹ Seta mata ahi bahuk di keliat, semua imam kepala dengan tua-tua bansa Yahudi bepekat jekak ngelawan Yesus pakai munuh Ia. ² Sidak ngikat Ia, nahit Ia, alu ngenjuk Ia ahung gubernur Pontius Pilatus. ³ Seta Yudas yang udah ngehianat Ia mantau Yesus udah kenak ukum, ia nyesal alu mulang duit yang tiga puluh kipin pihak ahung padak imam kepala seta padak tua-tua bansa Yahudi, sambil bandai," ⁴ Aku udah bebuat dosa dengan nyehah dahah uhang yang nda besalah." Tapi sidak nyaut ia," Apa masalah kami dengan ituk? iyak masalah nuan kedihik." ⁵ Ia pun nebak kipin-kipin pihak iyak kalam bait Allah, alu angkat dahi iyak abis iyak ngantung dihik. ⁶ Imam kepala alu ngambik kipin-kipin pihak iyak sambil bandai," Nda tau ngemasuk duit ituk ahung pesembahan kehena ituk duit dahah." ⁷ Sidak alu bepekat dengan hal iyak alu makai duit iyak pakai meli uma tukang tembikah pakai ngubuh uhang penatang. ⁸ Kehena iyak meh uma iyak di jenang," Tanah Dahah," sampai pituk. ⁹ Dengan baka iyak digenap meh apa yang di padah nabi Yeremia, yang bunyi iya baka ituk," Sidak nehimak tiga puluh kipin pihak, hega yang udah ditetap ulih bansa Israel, ¹⁰ sidak mehik duit iyak ahung tukang tembikah, baka yang Tuhan pehintah ahung aku. ¹¹ Yesus alu dadap ahung gubernur, gubernur betanyak dengan Ia," Nuan meh haja uhang Yahudi?" Yesus nyaut ia," Nuan meh yang bandai baka iyak." ¹² Tapi empak Yesus ditanyak imam kepala dengan padak tua-tua bansa iyak, Ia saja nda nyaut. ¹³ Pilatus alu bandai ahung Ia," Nda meh Nuan ninga apa yang udah dituduh ahung Nuan ituk? ¹⁴ Tapi Yesus saja nda bandai sepatah kata pun, gubernur alu jadi ihan. ¹⁵ Udah jadi kebiasa bagi gubernur ngelepas suhang tahanan yang udah dipilih uhang banyak. ¹⁶ Waktu iyak sidak bisik suhang yang ditahan yang tekenal palin jat nama ia Barabas. ¹⁷ Waktu sidak bekumpul, Pilatus bandai ahung sidak," Sepa meh yang di kemauk kian yang ahus aku lepas untuk kian?" Barabas atau Yesus yang di tingkau Mesias?" ¹⁸ Ia ketau kalau sidak iyak nyehah Yesus kehena dengki. ¹⁹ Sementaha ia duduk ngeheja tugas ia, bini ia ngihin pesan ahung ia, jekuk bini ia," Anang meh nuan ngeheja uhang yang nisik salah iyak, kehena aku udah palin mendehita ahi ituk alam mimpi empadai Ia." ²⁰ Padak imam kepala dengan padak tua-tua bansa Yahudi alu ngehasut uhang banyak iyak sepaya ngelepas Barabas, milih Yesus untuk dibunuh. ²¹ Gubernur betanyak ahung sidak," Yang mena dahi sidak dua ituk yang aku lepas menuhut kemauk kian?" Sidak bandai," Barabas," ²² Pilatus bandai ahung sidak," Apa yang ahus aku pebuat ahung Yesus yang disebut Mesias ituk?" sidak semua nyaut," Salib magang Ia." ²³ Ia alu bandai," Apa nacah, kejahatan apa meh yang udah di gawai Ia?" Tapi sidak bebingan makin kayah," Salib magang Ia." ²⁴ Seta Pilatus mantau, ia nda dapat bebuat apa-apa, apa lagik jekak tejadi husuh, ia ngambik aik, alu masuk tangan ia dadap uhang banyak, ia alu bandai," Aku nisik besalah atas dahah uhang yang nda besalah ituk, timpak magang penyalah ituk katas nuan kedihik." ²⁵ Semua uhang yang ada diak bandai," Isak meh dahah Ia ditanggung katas kami dengan padak anak kami." ²⁶ Ia alu ngelepas Barabas ahung sidak, tapi ia nyipat Yesus alu nyehah Ia sepaya di salib. ²⁷ Abis iyak padak tentaha gubernur ngambik Yesus ngemaik Ia kalam gedung pengadilan, semua tentaha alu bekumpul. ²⁸ Sidak ngelesik baju Ia alu mehik jubah mihah ahung Ia. ²⁹ Sidak ngawai mahkuta dahi kawat beduhik, alu ngelegak iya datas kepala Ia, mehik tungkat di tangan kanan Ia. Sidak belutut dadap Ia sambil ngehina Ia, jekuk sidak," Hidup, Haja uhang Yahudi!" ³⁰ Sidak nampah Ia, alu ngambik tungkat pakai mangkung kepala Ia. ³¹ Abis sidak ngehina Ia, sidak ngambik jubah dahi Ia, nganti pakai baju Ia tedik, alu nahit Ia pakai di salib. ³² Seta sidak keluah, sidak mantau uhang Kirene yang benama Simon, ia di paksa suhuh ngesan salib. ³³ Alu datang meh sidak ke ahung yang nama iya Golgota, yang heti iya," Tempat tengkuhak." ³⁴ Sidak mehik Ia minum angguh yang udah dicampuh dengan empedu. Tapi seta Yesus ngasa iya, Ia nda mauk minum. ³⁵ waktu sidak jekak nyalib Ia, sidak magi baju Ia dengan caha nyabut undi. ³⁶ Sidak alu duduk mantau Ia. ³⁷ Datas kepala Ia sidak ngelegak tulisan yang dibaca," Ituk meh Yesus Haja uhang Yahudi." ³⁸ Bisik dua uhang penyamun yang disalib behimbai dengan Ia, suhang disepiak kanan suhang lagik disepiak kibak Ia. ³⁹ Padak uhang yang lalu diak ngehujat Ia sambil bekisai kepala alu bandai," ⁴⁰ Oi, Nuan, uhang yang jekak ngancuh bait Allah, alu jekak ngawai iya lagik alam tiga ahi, selamat meh dihik kedihik! entik Nuan Anak Allah, tuhun meh dahi salib iyak!" ⁴¹ Baka iyak ugak meh sidak padak imam kepala dengan sidak ahli Taurat, seta padak tua-tua bansa Yahudi, sidak ngehina Ia, jekuk sidak," ⁴² Ia nyelamat uhang lain, tapi nda nyahuk nyelamat dihik Ia kedihik. Ia meh Haja uhang Israel. Cuba meh Ia tuhun dahi salib Ia, sepaya kami tau pecayak ke Ia. ⁴³ Ia pecayak ke Allah, isak meh Allah nyelamat Ia, entik Allah mauk, kehena Ia bandai," Aku meh Anak Allah." ⁴⁴ Penyamun yang disalib behimbai dengan Ia pun bandai baka iyak ugak ahung Ia. ⁴⁵ Mulai dahi jam dua belas tengah ahi semua tanah diak tejadi kangap sampai jam tiga gemai. ⁴⁶ Sekitah jam tiga gemai Yesus betumbau dengan kayah, bandai," Eli, Eli, Lamasabaktani." yang heti ia," Allah Aku, Allah Aku, ngapa Nuan nudi Aku?" ⁴⁷ Seta padak uhang yang bedihi diak ninga, sidak alu bandai," Ia ningkau Elia." ⁴⁸ Nda lamak suhang dahi sidak ngambik bunga kahang, nyelup iya kalam angguh yang udah masam, ngelegak iya ahung batang galah alu mehik Ia minum. ⁴⁹ Sidak lain bandai," Isak meh Ia kedihik. Isak kita ngeliat entik Elia datang pakai nyelamat Ia." ⁵⁰ Yesus alu betumbau dengan suaha kayah, nyehah nyawa Ia. ⁵¹ Pantau, tihai bait Allah tebelah jadi dua dahi atas sampai kebabah. Tanah beguyu, padak batu kahang tebelah. ⁵² Padak kubuh tebukak, tubuh dahi banyak uhang kudus yang tetiduk angkat. ⁵³ Sidak keluah dahi kubuh, udah Yesus bangkit, sidak tamak kalam kuta suci, alu ngenampak dihik ahung uhang banyak. ⁵⁴ Kepala pasukan dengan semua phajuhit yang bejaga diak, mantau gempa bumi dengan semua yang tejadi, sidak palin takut, alu bandai," Sesungguh iya Ia meh Anak Allah." ⁵⁵ Banyak bala betinak yang ngimbai Yesus dahi Galilea yang datang ngelayan Ia, mantau dahi jauh. ⁵⁶ Di entaha sidak bisik Maria Magdalena, Maria indai Yakobus dengan Yusuf seta indai dahi padak anak Zebedeus. ⁵⁷ Pas ahi jekak malam, datang meh uhang kaya dahi Arimatea, benama Yusuf, ia muhid Yesus ugak. ⁵⁸ Ia datang ahung Pilatus pakai mintak tubuh Yesus. Pilatus pun alu mehintah sepaya tubuh Yesus di behik ahung Yusuf. ⁵⁹ Yusuf ngambik tubuh Yesus, mungkus Ia pakai kain lenan yang behesih, ⁶⁰ alu ngelegak iya alam kubuh ia yang bahu, yang bahuk di kali ia alam bukit batu. Ia ngulin batu besah pakai nutup pintu kubuh, alu angkat dahi iyak. ⁶¹ Maria Magdalena dengan Maria yang lain ada diak, duduk ngadap kubuh. ⁶² Ahi sutik lagik, ahi besiap-siap, padak imam kepala dengan uhang-uhang Farisi datang ahung Pilatus, ⁶³ jekuk sidak," Tuan, kami ingat kalau pengakal iyak semasa idup Ia kalak bandai," Setelah tiga ahi jekak bangkit lagik." ⁶⁴ Kehena iyak pehintah meh sepaya kubuh iyak di jaga sampai ahi yang ketiga. Sebab kalau nda, padak muhid Ia datang alu nyuhi Ia, alu madah uhang banyak," Ia udah bangkit dahi entaha uhang mati. Maka penyesatan yang pengabis akan lebih buhuk dahi yang petama." ⁶⁵ Pilatus bandai ahung sidak," Baik meh penyaga. Angkat alu jaga meh kubuh iyak menuhut yang kian aman. ⁶⁶ Sidak pun alu angkat pakai ngaman kubuh iyak, nyegel batu kubuh seta nyuhuh penyaga nyaga diak.