¹ Udah ahi sabat, empak mata ahi bahuk idup, ahi petama pada minggu iyak, Maria Magdalena dengan Maria yang datang ke kubuh, ² Pantau, alu tejadi gempa besah, kehena malaikat Tuhan tuhun dahi langit, ngulin batu penutup kubuh alu duduk datas iya. ³ Penatang ia baka engkelatan, makai baju putih baka salju. ⁴ Sidak yang nyaga diak begetah begitit takut, udah baka uhang mati. ⁵ Malaikat iyak bandai ahung bala betinak diak," Anang takut,kehena aku ketau kian ngegak Yesus yang udah disalib iyak. ⁶ Ia nda bisik dituk, tapi udah bangkit, baka yang udah dipadah Ia. Aboh mantau ahung Tuhan di legak. ⁷ Ligas meh angkat alu padah dengan padak muhid Ia, Ia udah bangkit dahi kematian. Pantau meh, Ia udah lebih duluk dahi nuan angkat ke Galilea. Diak nuan akan betemu dengan Ia. Sesungguh iya udah Aku padah ahung nuan," ⁸ Padak betinak iyak dengan takut seta palin hambik angkat dahi kubuh iyak, alu be-embuang madah ahung padak muhid Ia. ⁹ Pantau meh, Yesus betemu dengan sidak alu bandai," Salam bagi kian semua," Padak betinak iyak alu datang kuang Yesus ngehengkuk kaki Ia sambil nyembah. ¹⁰ Yesus alu bandai ahung sidak," Anang takut, angkat meh madah ahung bala menyadik Aku suhuh ke Galilea. Diak sidak betemu dengan Aku." ¹¹ Empak bala betinak iyak tengah bejalan, sidak yang bejaga alu datang ke kuta, madah semua yang tehadi ahung padak imam kepala. ¹² Waktu padak imam kepala betemu dengan padak tua-tua bansa Yahudi, sidak alu bepekat, sidak mehik duit ahung padak phajuhit, ¹³ alu madah sidak," Padah ahung uhang lain bahwa padak muhid Yesus datang pada malam ahi encuhi tubuh Ia, empak kami tengah tetiduh. ¹⁴ Entik lapuhan ituk udah datang ahung gubernur, kami akan madah ia hal yang udah pasti, sehingga nuan nda pehelu kuatih." ¹⁵ Padak phajuhit alu ngambik duit iyak, abis iyak bebuat baka yang udah dipehintah ahung sidak. Nda lamak behita iyak alu tesebah secaha cepat di entaha bansa Yahudi, alu belanjut sampai ahi ituk. ¹⁶ Tapi kesebelas muhid iyak angkat ke Galilea, ke gunung yang udah di padah Yesus ahung sidak. ¹⁷ Seta sidak mantau Yesus, sidak nyembah Ia, tapi ada ugak yang lagik hagu-hagu, ¹⁸ Yesus datang ahung sidak sambil bandai,"Semua kuasa udah di behik ahung Aku di surga seta di bumi. ¹⁹ Kehena iyak angkat meh, jadi kan semua bansa muhid-muhid. Baptis sidak alam nama Bapak, Putha dengan Ruh Kudus. ²⁰ Ajah ahung sidak semua yang udah Aku pehintah ahung nuan. Pantau meh, Aku selalu besama dengan nuan, bahkan sampai pengabis dunia ituk.