¹ Hal kehajaan surga iyak baka sepuluh uhang daha yang ngemaik lampu iya jekak angkat ahung mempelai laki. ² Lima dahi sidak iyak budu, yang lima lagik bijaksana. ³ Waktu kelima daha buyuk iyak ngambik lampu, sidak nda ngemaik minyak pakai lampu sidak. ⁴ Tapi kelima daha yang bijaksana ngemaik penantai pakai nantai minyak sidak besama dengan lampu-lampu iya. ⁵ Mepelai laki datang telat, sidak semua pun alu ngantuk nda lamak tetiduh. ⁶ Tengah malam kedinga uhang betumbau, Pantau, mempelai datang, keluah alu datang meh ahung ia. ⁷ Alu semua daha iyak uas sambil ngatuh lampu-lampu sidak. ⁸ Kelima daha yang budu bandai ahung kelima daha yang bijaksana, Behik meh ahung kami sikit dahi minyak nuan kehena lampu kami jekak pusak. ⁹ Tapi kelima daha yang bijaksana iyak nyaut, Kehena nda cukup pakai kami dengan pakai kian, angkat meh ahung penjual minyak, beli meh pakai kian kedihik. ¹⁰ Sementaha sidak angkat meli minyak, mempelai datang, sidak pun udah siap tamak besama ke pejamuan kawin, pintu pun di tutup. ¹¹ Nda lamak bala daha iyak tedik datang alu bandai, Tuan, tuan, buka meh pintu pakai kami.' ¹² Tapi ia nyaut," Sesungguh iya aku bandai ahung nuan, aku nda ngelalak nuan." ¹³ Kehena iyak pantau meh, sebab nuan nda ketau ahi dengan waktu iya. ¹⁴ Kehena kehajaan surga iyak baka uhang yang jekak angkat ke negehi lain. Ia ningkau padak hamba ia alu mehik heta benda iya ahung sidak. ¹⁵ Ahung yang suhang ia behik lima talenta, ahung yang lain ia behik dua talenta, ahung yang lain lagik ia behik setalenta. Tiap sidak nehimak sesuai kemampu sidak, udah iyak angkat meh uhang iyak. ¹⁶ Abis iyak, hamba yang nehimak lima talenta angkat bedagang nyual talenta ia, alu bulih lima talenta lagik. ¹⁷ Baka iyak ugak hamba yang nehimak dua talenta, ia nyual talenta ia alu bulih dua talenta lagik. ¹⁸ Tapi hamba yang nehimak setalenta, angkat ngali lubang alam tanah pakai ngelabuk duit tuan ia. ¹⁹ Udah kelamak-lamak tuan iyak datang jekak behitung dengan padak pelayan ia. ²⁰ Hamba yang nehimak lima talenta datang ngemaik hasil yang lima talenta alu bandai, Tuan, nuan mehik aku lima talenta, pantau, aku bulih lima talenta lagik. ²¹ Jekuk tuan ahung hamba iyak, Keheja yang bait, pelayan yang bait seta setia! nuan udah setia ngelaku hal-hal yang senik, aku jekak mehik hal-hal yang besah yang jadi tanggung jawab nuan. Tamak meh kalam pembahagia tuan nuan. ²² Hamba yang nehimak dua talenta datang ahung tuan ia alu bandai," Tuan, nuan mehik aku dua talenta. Pantau, aku bulih dua talenta lagik.' ²³ Jekuk tuan ahung hamba iyak,' keheja yang bait, hamba yang bait seta setia! nuan udah ngelaku hal-hal yang senik, aku jekak mehik nuan hal-hal besah yang jadi tanggung jawab nuan. Tamak meh alam pembahagia tuan nuan. ²⁴ Alu hamba yang nehimak setalenta datang, alu bandai," Tuan, aku ketau nuan uhang yang kehas. Nuan nganyi ahung yang nda tabuh seta manen ahung yang nda nuan sebah. ²⁵ Aku palin takut maka iyak aku ngelabuk talenta yang nuan behik kalam tanah. Pantau, tehimak meh empu tuan. ²⁶ Tapi tuan iyak nyaut, Nuan pelayan yang jat seta lunggung, nuan ketau bahwa aku nganyi ahung yang nda aku tabuh seta manen ahung yang nda aku sebah. ²⁷ Kehena iyak nuan ahus mehik duit aku ahung pedagang duit, sepaya entik aku datang,aku nehimak duit aku dengan bunga iya. ²⁸ Kehena iyak ambik meh talenta dahi ia, alu behik ahung pelayan yang bulih sepuluh talenta. ²⁹ Sebab bagi sepa magang yang bisik, ahung ia akan di behik lebih bahkan belimpah-limpah. Tapi bagi sepa magang yang nda bisik apa-apa, dahi ia akan di ambik semua iya, bahkan yang nisik ada ahung ia sekalipun. ³⁰ Buang meh hamba yang nisik beguna iyak kalam pengangap yang palin dalam, diak meh bisik hatap seta kehit gigi. ³¹ Empak Anak Mensia datang alam kemuliaan Ia, semua malaikat besama dengan Ia, Ia akan duduk datas tahta kemuliaan Ia. ³² Dadap mata Ia di kumpul semua bansa, Ia akan ngemisah uhang dahi uhang lain, baka gembala ngemisah bala dumba dahi bala kambin. ³³ Ia akan ngelegak dumba di sepiak kanan tangan Ia, tapi kambin di sepiak kibak Ia. ³⁴ Haja iyak alu bandai ahung sidak yang di sepiak kanan tangan Ia! Aboh, nuan yang udah di behekat ulih Bapak Aku, tehimak meh wahis yang udah di siap untuk nuan, mulai dahi dunia ituk digawai. ³⁵ Kehena waktu Aku lapah, nuan mehik Aku makan, waktu Aku aus, nuan mehik Aku minum, empak Aku uhang asing, nuan ngemaik Aku tamak, ³⁶ Empak Aku nisik utan di pakai, nuan mehik Aku baju selawah, empak Aku pedih jehih, nuang ngehawat Aku, empak Aku di penjaha, nuan ngabas Aku. ³⁷ Alu padak uhang benah akan nyaut, jekuk ia, ' Tuhan, bila,kami mantau Nuan lapah, alu mehik Nuan makan? atau aus alu mehik Nuan minum? ³⁸ bila meh kami ngeliat Nuan baka uhang asing, alu ngemaik Nuan tamak? atau nisik utan dipakai alu mehik Nuan baju selawah? ³⁹ Bila meh kami ngeliat Nuan pedih jehih atau alam penjaha, kami alu ngabas Nuan? ⁴⁰ Haja iyak akan bandai alu nyaut sidak,' Sesungguh iya Aku bandai ahung nuan, apa yang nuan gawai ahung suhang dahi bala menyadik Aku yang palin hina ituk, nuan udah ngeheja iya pakai Aku. ⁴¹ Ia pun alu bandai ahung sidak yang disepiak kibak tangan Ia, Angkat meh dahi Aku ituk, nuan tekutuk, tamak meh kalam api kekal yang udah disiap pakai iblis seta dengan padak malaikat iya, ⁴² kehena empak Aku lapah, nuan nda mehik Aku makan, empak Aku aus, nuan nda mehik Aku minum, ⁴³ empak Aku uhang asing, nuan nda mehik Aku pakai numpang, nisik utan dipakai,tapi nuan nda mehik Aku baju selawah, pedih jehih seta di penjaha, tapi nuan nda peduli dengan Aku. ⁴⁴ Sidak pun nyaut ugak, jekuk ia, Tuhan, bila kami mantau Nuan lapah atau aus atau baka uhang asing, atau nisik utan di pakai atau pedih jehih atau di penjaha alu nisik ngelayan Nuan? ⁴⁵ Ia alu nyaut sidak, jekuk Ia, Aku bandai ahung nuan, sesungguh iya apa yang nda nuan lakun unruk suhang dahi yang palin hina ituk, nuan nda ngeheja iya ahung Aku. ⁴⁶ Sidak ituk akan tamak kalam hukuman yang kekal, tapi uhang-uhang benah akan tamak kalam idup yang kekal."