Pasal 24

1 Yesus keluah dahi bait Allah ngejauh dihik dahi iyak. Muhid-muhid datang ahung Ia madah ahung Ia padak bangunan bait Allah. 2 Tapi Ia nyaut sidak," Nda meh kian mantau semua ituk? Aku madah kian, sesungguh iya nda ada sigik batupun yang akan dibiah datas batu lain yang nda di hubuh." 3 Sambil Ia duduk datas gunung Zaitun muhid-muhid datang ahung Yesus empak Yesus kedihik alu madah ahung Ia," Padah ahung kami, bila hal iyak tejadi? Apa yang jadi tanda penatang Nuan dengan pengabis dunia ituk? 4 Saut Yesus ahung sidak," Ati-ati magang meh sepaya nisik suhangpun yang tau ngemaik nuan alam penyesat. 5 Kehena banyak uhang yang jekak datang alam nama Aku. Sidak akan bandai, Aku ituk meh Mesias, ia akan nyesat uhang bayak. 6 Nuan akan ninga pehang dengan behita pehang. Anang meh nuan susah ati, kehena hal-hal iyak ahus tehadi, tapi,pengabis iya napan, datang. 7 Kehena bansa akan angkat ngelawan bansa, seta kehajaan akan angkat ngelawan kehajaan. Akan bisik gempa bumi seta tejadi musim lapah di mena-mena. 8 Tapi semua iyak hanya awal iya magang, baka yang diasa betinak yang jekak behanak. 9 Sidak akan ngemaik kian kalam pemedih alu munuh kian. Nuan akan di bencik semua bansa kehena nama Aku. 10 Banyak yang tejatuk, ngehianat, seta saling mencik. 11 Banyak nabi-nabi yang nda benah jekak datang alu ngemaik uhang kalam hal yang salah. 12 Kehena hal-hal yang nda benah akan semakin banyak, pengauk mensia banyak jadi nisik heti. 13 Tapi sepa yang mampu betan sampai abis akan di selamat. 14 Injil kehajaan ituk aka diajah ke semua uhang di dunia sebagai kesaksian untuk semua bansa, abis iyak bahuk meh pengabis dunia ituk datang. 15 Kehena iyak, entik nuan mantau, Pembinasa Keji udah bedihi ahung yang kudus, baka yang udah di nebuat nabi Daniel,( isak meh padak pemaca maham iya kedihik), 16 Padak uhang yang bisik di Yudea ahus ngehahi dihik ke gunung-gunung, 17 uhang-uhang yang lagik datas atap humah anang tuhun kebabah pakai ngenaik bahang ia keluah dahi alan humah, 18 uhang yang lagik di uma anang pulang pakai ngambik padak baju selawah ia. 19 Tapi celaka meh sidak yang agik bisik anak senik seta padak indai yang agik tengah nyusu anak ia pada ahi-ahi iyak! 20 Bedoa meh, sepaya waktu nuan ngehahi dihik anang meh tekenak ke musin ujan atau ahi sabat. 21 Kehena akan bisik sensaha yang palin besah baka yang napan kalak tejadi dahi dunia ituk dijadi sampai pituk, dan nda akan tejadi lagik. 22 Kalau ahi-ahi baka iyak nda di pandak, maka semua yang idup nda dapat di selamat. Tapi demi uhang- uhang tepilih, ahi-ahi iyak di pandak. 23 Alu ada bisik uhang yang bandai ahung nuan, Pantau, Mesias ada dituk! atau Mesias ada diun! anang meh nuan pecayak ke iyak. 24 Kehena Mesias-mesias nda benah seta padak nabi yang nda benah datang, alu madah ke tanda-tanda besah seta ajaib, kalau talah jekak nyesat uhang-uhang yang udah di pilih ugak. 25 Pantau, Aku udah madah ahung nuan hal-hal yang jekak tejadi. 26 Kehena iyak, entik bisik yang bandai ahung nuan, Pantau, Mesias ada di padang guhun, anang angkat ke padang guhun. Atau, Pantau, Ia agik alam huang, anang pecayak ke hal iyak. 27 Kehena baka cahaya engkelatan yang ngemancah dahi timuh, nda lamak nuju ke bahat, baka iyak meh penatang Anak Mensia. 28 Di mena bisik binatang yang mati, diak meh biuk nazah bekumpul. 29 Tapi seta abis masa penyusah besah pada waktu iyak mata ahi alu jadi kangap, bulan nda becehaya, padak bintang jatuk dahi langit seta padak kuasa di langit akan di guyu. 30 Nda lamak tanda dahi Anak Mensia akan keluah di langit seta semua suku bansa yang ada di bumi akan besedih. Sidak akan ngeliat Anak Mensia datang datas awan-awan di langit dengan semua kuasa seta kemuliaan Ia. 31 Ia akan ngihin padak malaikat Ia makai suaha sangkkala, sidak pun akan ngumpul uhang-uhang yang di pilih Ia dahi empat penjuhu mata angin, dahi ujung langit sutik ke ujung langit yang sutik lagik. 32 Belajah meh dahi pehumpama kayu aha. Udah padak cabang ia lemah alu mulai tumbuh tunas iya, nuan pun ketau kalau musin kemahau udah dampin. 33 Jadi baka iyak ugak meh, entik nuan udah mantau semua iyak, nuan ahus ketau bahwa Ia udah dampin, udah dampin pintu. 34 Aku bandai ahung nuan, sesungguh iya angkatan ituk nda akan belalu, sampai semua utan dahi semua ituk akan tejadi. 35 Langit dengan bumi akan belalu tapi apa yang Aku padah nda akan belalu. 36 Tapi tentang ahi dengan waktu iya, nisik suhangpun yang ketau, bahkan padak malaikat di surga, temasuk ugak Anak, tapi hanya Bapak yang ketau. 37 Baka ahi-ahi Nuh, baka iyak ugak meh penatang Anak Mensia. 38 Kehena ahi-ahi senapan aik bah sidak makan minum, bebini belaki sampai ahung ahi Nuh tamak kalam bahteha, 39 sidak pun nisik ketau apa-apa sampai aik bah iyak datang alu ngemaik sidak semua-- baka iyak ugak meh penatang Anak Mensia. 40 Entik bisik dua uhang di uma, yang suhang di ambik, suhang lagik di dudi. 41 Dua uhang betinak agik numbuk padi, yang suhang di ambik suhang lagik di dudi. 42 Kehena iyak bejaga-jaga meh, kehena nuan nda ketau, ahi apa Tuhan nuan akan datang. 43 Tapi tipan meh ituk, entik tuan humah ketau jam behapa pencuhi datang, ia pasti bejaga-jaga, ia nda akan nyuhuh humah ia dihusak. 44 Kehena iyak nuan ahus besiap-siap, kehena Anak Mensia datang pas ahung waktu yang nda di kemauk nuan. 45 Jadi sepa meh hamba yang setia seta bijaksana, yang udah ditetap tuan ia pakai mehik sidak makan pas pada waktu iya? 46 Di behekat meh hamba yang ditemu tuan ia agik tengah bekeheja entik tuan ia datang. 47 Aku bandai ahung nuan sesungguh iya tuan iyak akan nyuhuh ia jadi kepala atas semua bahang empu tuan ia iyak. 48 Tapi entik hamba yang jat, bandai alam ati ia, Tuan aku lat datang, 49 alu mulai melasah padak pelayan yang lain, seta alu makan dengan minum himbai padak pemabuk. 50 Nda lamak tuan ia datang dengan nda di sangka-sangka, ia nda ketau waktu ia datang. 51 Tuan ia ngukum ia ngawai nasip ia baka uhang-uhang munapik, diak meh bisik penangis seta kehit gigi.