¹ Yesus alu bandai ahung uhang banyak dengan muhid-muhid Ia," ² Jekuk Ia," Padak ahlu Taurat dengan uhang Farisi duduk di kuhsi Musa. ³ Kehena iyak meh apa magang yang sidak pehintah suhuh keheja, keheja meh, pantau sidak. Tapi anang meh nihu gaya kelakun sidak, kehena sidak hanya tau bandai magang tapi sidak kedihik nda ngeheja iya. ⁴ Benah, sidak ngikat beban yang behat dengan pedih sepaya di baik alu di legak di bau uhang. Tapi sidak kedihik nda mauk ngemaik iya. ⁵ Semua yang sidak keheja sepaya mintak di keliat uhang. Kehena sidak ngawai tali pakai semayang yang besah, sidak pun ngemanjang sisi jumbai utan dipakai ia. ⁶ Sidak saja hambik mintak puji alam bejamu dengan duduk nda mauk nda dadap kalau alam sinagoge, ⁷ dengan bahasa-bahasa yang digawai-gawai dadap uhang., sidak pun palin hambik di tingkau uhang ' Habbi' ⁸ Tapi nuan, anang mauk di tingkau habbi, kehehna nuan hanya bisik suhang guhu, kian semua pun menyadik. ⁹ Anang ningkau sepa magang Bapak di bumi ituk, kehena nuan hanya bisik suhang Bapak, Ia ada di surga. ¹⁰ Baka iyak ugak anang meh nuan du tingkau guhu, kehena nuan hanya bisik suhang guhu, Mesias iyak meh guhu nuan. ¹¹ Tapi bahang sepa yang tebesah di entaha kian ia ahus jadi pelayan nuan. ¹² Sepa yang ninggik dihik, ia akan di hendah. Sepa yang ngehendah dihik akan di tinggik ¹³ Tapi celaka meh nuan padak ahli Taurat dengan uhang-uhang Farisi, munafik! nuan nutup Kehajaan Surga dahi semua uhang. ¹⁴ Empadai nuan nda tamak kiak nuan pun nda nyuhuh suhang pun yang tamak. ¹⁵ Celaka meh nuan padak ahli Taurat dengan uhang-uhang Farisi, celaka meh uhang-uhang munafik! kehena nuan nyebehang laut dengan dahat pakai ngemaik uhang betubat. Entik ia udah betubat, nuan ngawai ia dua kali lebih jat dahi nuan kedihik. ¹⁶ Celaka meh nuan, padak pembimbing butak, nuan handai, sepa magang yang besumpah demi bait Allah, nisik heti. Tapi sepa yang besumpah demi emas di bait Allah, ia tehikat dengan sumpah ia. ¹⁷ Nuan uhang butak dengan budu! Apa meh yang lebih besah, emas meh atau bait Allah yang udah ngudus emas untuk Allah? ¹⁸ Alu, sepa yang besumpah demi altar, nisik beheti. Tapi sepa yang besumpah demi bahang pesembah datas altar, ia tehikat ulih sumpah ia. ¹⁹ Nuan uhang butak, mena meh yang tebesah, pesembah iya atau altar yang udah ngudus pesembahan ahung Allah? ²⁰ Ulih kehena iyak, sepa magang yang besumpah demi altar, ia besumpah demi altar dengan semua bahang yang ada datas iyak. ²¹ Sepa yang besumpah demi bait Allah, ia besumpah demi bait Allah seta sepa magang yang idup alam iya, ²² sepa yang besumpah demi surga, ia besumpah demi tahta Kehajaan Allah dan Allah kedihik meh yang duduk datas tahta iyak. ²³ Celaka meh nuan, padak ahli Taurat dengan uhang-uhang munafik! kehena nuan mayah persepuluh dahi daun mints adas dengan jintan tapi hal yang lebih besah dahi iyak, macam ukum- keadilan, pengampunan seta kepecayak nuan, nda pakai nuan. Ituk meh yang ahus nuan keheja anang diabai lagik yang lain, ²⁴ Nuan padak pembimbing butak, nyamuk alus nuan buang tapi unta nuan telan!. ²⁵ Celaka meh nuan, padak ahli Taurat dengan uhang-uhang Farisi, uhang-uhang munafik! Kehena nuan mehesih cawan dengan pingan nuan hanya bagian luah magang, tapi bagian dalam iya penuh dengan pemehasan seta hangkak. ²⁶ Nuan uhang Farisi yang butak, behesih meh duluk bagian dalam cawan dengan pinggan nuan, maka bagian luah iya pun behesih ugak. ²⁷ Celaka meh nuan padak ahli Taurat dengan uhang-uhang Farisi, uhang-uhang munafik! Kehena nuan baka kubuh yang dicat putih, yang dipantau dahi luah abis pemait, tapi dalam iya di penuh dengan tulang belulang seta najis. ²⁸ Baka iyak ugak meh nuan yang baka benah di pantau uhang lain tapi didalam nuan penuh dengan kemunafikan seta nda adil. ²⁹ Celaka meh nuan padak ahli Taurat dengan uhang-uhang Farisim uhang-uhang munafik! Kehena nuqn ngawai kubuh padak nabi seta ngehias kubuh uhang- uhang benah. ³⁰ Jekuk nuan, Entik kami idup di jaman inik muyang kami, kami nda akan nambah sidak numpah dahah padak nabi iyak. ³¹ Kehena nuan besaksi dengan nuan kedihik kalau nuan iyak lagik kentuhun sidak yang munuh padak nabi. ³² Nuan pun udah menuh ugak penakah dahi inik muyang nuan. ³³ Oi nuan padak ulah, kentuhun ulah bisa, kati baka nuan ngehahi dihik dahi ukum nehaka? ³⁴ Kehena iyak, pantau meh, Aku ngihin ahung nuan padak nabi, uhang-uhang bijak dengan padak ahliTaurat. Sebagian dahi sidak jekak dibunuh seta disalib kian. Sebagian dahi sidak lagik kian sipat alam sinagoge, sidak pun kian kejah dahi kuta sutik ke kuta sutik lagik. ³⁵ Dan atas nuan akan di timpak kan dahah uhang-uhang benah yang tetumpah katas bumi, mulai dahi Habel uhang benah iyak sampai ahung Zakharia anak Berekhya, yang nuan bunuh entaha ahung kudus dengan mezbah. ³⁶ Aku bandai ahung nuan, sesungguh iya semua ituk akan ditimpakan ahung genehasi ituk. ³⁷ Yerusalem, Yerusalem, nuan munuh padak nabi iyak seta nikam uhang-uhang yang Aku kihin ahung nuan! Aku ituk puas padak anak nuan besama-sama baka induk manuk yang ngumpul anak ia di babah sayap ia. Tapi nuan nda mauk! ³⁸ Pantau meh humah nuan yang nuan dudi. ³⁹ Kehena iyak Aku bandai ahung nuan, nuan nda akan mantau Aku lagik mulai dahi pituk, sampai nuan bandai," Di behekat meh Ia yang datang alam nama Tuhan."