¹ Pada waktu iyak, Herodes haja wilayah iyak, ninga behita tentang Yesus. ² Ia bandai ahung padak pelayan ia," Ituk meh Yohanes pembaptis, ia udah mati tapi idup lagik, kehena iyak meh kuasa-kuasa iyak bekeja alam dihik Ia. ³ Kehena Yohanes udah nyuhuh nangkap Yohanes, ngikat ia, alu ngemasuk ia kalam penjaha kehena Herodias, bini Filipus menyadik ia. ⁴ Kehena Yohanes kalak bandai ahung ia," Nda pantas nuan ngambik Herodias jadi bini nuan." ⁵ Herodes jekak munuh Yohanes, tapi ia takut dengan uhang banyak, kehena uhang banyak iyak mantau Yohanes pembaptis suhang nabi. ⁶ Tapi empak Herodes ulang taun, anak betinak Herodias menahi di tengah-tengah sidak pakai nyenang ati Herodes. ⁷ Saking pehambik iya, Herodes bejanji jekak mehik uapah apa magang yang di pintak anak iyak. ⁸ Udah di pesan indai ia, ia bandai ahung Herodes," Berik aku ituk, kepala Yohanes pembaptis alam pinggan besah." ⁹ Haja Herodes alu jadi sedih kehena pemintak iyak, tapi kehena janji ia, de ngan uhang yang makan malam besama ia, janji iyak di laku. ¹⁰ Ia ngemasuk seta netak kepala Yohanes pembaptis alam penjaha. ¹¹ Kepala iyak dilegak datas pinggan besah alu di behik ahung betinak daha iyak udah iyak di behik ahung indai ia. ¹² Padak muhid Yohanes alu datang ngambik mayat Yohanes alu ngubuh iya. Abis iyak sidak angkat sambil madah kuang Yesus. ¹³ Seta Yesus ninga behita iyak, Ia angkat dahi iyak makai pehau ngegak ahung yang sunyik. Empak uhang banyak ninga hal iyak, sidak ngimbai Yesus dengan bejalan kaki dahi padak kuta sidak. ¹⁴ Yesus datang lebih duluk dahi sidak. Ia ngeliat abis pemanyak uhang yang bekumpul. Yesus gauk ati kesidak. Ia alu nyembuh sidak yang sakit. ¹⁵ Ahi udah tengah ahi, padak muhid Ia datang ahung Ia alu bandai," Ahung ituk sunyik benah, ahi jekak malam. Bubah magang sidak, sepaya sidak tau angkat ke desa-desa dampin ituk pakai meli utan dimakan pakai sidak." ¹⁶ Tapi Yesus bandai ahung sidak," Anang nyuhuh sidak bejalan jauh-jauh. Nuan meh yang mehik sidak utan yang tau dimakan. ¹⁷ Sidak bandai ahung Ia," Dituk kita hanya bisik lima huti dengan dua ikan." ¹⁸ Yesus bandai," Behik iyak ahung Aku." ¹⁹ Yesus alu mehintah duduk di humput. Ia ambik lima huti dengan dua ikuk ikan. Mantau kelangit, di behekat Ia huti iyak seta mecah-mecah iya lalu si behik ahung padak muhid Ia. Muhid-muhid magi makanan iyak ahung kehumun uhang banyak. ²⁰ Sidak semua makan sampai kenyang. Sidak pun ngumpul sisa yang lagik tedudi dahi makanan iyak dua belas kehanjang penuh. ²¹ Sidak yang makan diak bisik lima hibu laki di luah padak betinak dengan padak biak. ²² Abis iyak Ia nyuhuh muhid-muhid Ia tamak kalam pehau, nyuhuh sidak angkat ke sebehang duluk dahi Ia, empadai Ia kedihik agik nyuhuh uhang banyak iyak pulang. ²³ Udah uhang banyak iyak di suhuh Ia pulang, Yesus nait katas bukit kedihik pakai bedoa. Empak ahi jekak kangap, Ia diak kedihik. ²⁴ Tapi pehau tedik agik di tengah laut., ampih jekak kaham kenak gelombang,kehena hibut yang datang belawan ahah. ²⁵ Sekitah jam tiga subuh Yesus nampin sidak, bejalan datas laut. ²⁶ Seta padak muhid mantau Yesus bejalan datas laut, sidak takut setengah mati alu bandai," Iyak Antu," sidak pun betumbau belalau kehena sidak takut. ²⁷ Tapi ligas-ligas Yesus bandai ahung sidak,"Behanikan dihik nuan! ituk Aku! anang takut." ²⁸ Petrus nyaut Ia," Tuhan, entik iyak Nuan, suhuh meh aku datang ahung Nuan datas aik." ²⁹ Yesus bandai," Kituk meh." Petrus pun alu keluah dahi pehau alu bejalan datas aik nuju Yesus. ³⁰ Tapi seta Petrus kenak tiup hibut yang kuat, ia alu takut. Waktu ia jekak tegelam ia betumbau alu bandai," Tuhan, selamat meh aku!' ³¹ Ligas-ligas Yesus nguluh tangan Ia ngenggam Petrus alu bandai ahung ia," Nuan yang kuhang pecayak, ngapa dik hagu-hagu?" ³² Seta Yesus dengan Petrus tamak kalam pehau, hibut pun udah mulai tenang. ³³ Padak muhid yang datas pehau nyembah seta bandai," Sesungguh iya Nuan Anak Allah." ³⁴ Seta sidak udah nyebehang ke Genesaret, ³⁵ Uhang-uhang diak yang ngelalak Yesus, sidak nyebah behita kiak kituk di sekelilin wilayah iyak, sidak pun ngemaik ahung Ia semua yang sakit. ³⁶ Sidak ngehinuk Ia sepaya tau nyamang sisi jubah Ia, alu semua uhang yang nyamang iya jadi sembuh.