Pasal 13

1 Ahi iyak, Yesus keluah humah alu duduk di tepi laut. 2 Abis pemanyak uhang bekumpul ngelilin Ia, Ia pun alu tamak kalam pehau sambil duduk datas iya. Semua uhang yang bekumpul diak bedihi di pantai. 3 Yesus pun banyak bandai ahung sidak makai pehumpama. Jekuk Ia," Pantau meh, bisik suhang penabuh benih yang jekak nabuh benih. 4 Waktu ia nabuh benih, bisik benih yang jatuk di sisi jalan, nda lamak padak biuk makan iya. 5 Ada ugak yang jatuk ahung tanah yang banyak batu, yang nda banyak tanah pakai ngidup benih tedik. Alu idup meh benih iyak. Empadai tanah iyak nda dalam. 6 Empak mata ahi idup, padak benih iyak alu alak, kehena nda banyak uhat, abis iyak layuk. 7 Ada ugak benih yang jatuk ahung humput yang besisih. Padak humput yang besisih iyak ngempit benih tedik. 8 Alu bisik benih yang jatuk ahung tanah yang subuh alu ngehasil gandum, ada yang sehatus kali lipat banyak iya, ada yang lima puluh kali lipat, ada ugak yang tiga puluh kali lipat. 9 Sepa yang bisik kelindang ia ahus ninga." 10 Padak muhid Ia datang alu bandai ahung Yesus," Apa nacah Nuan bandai ahung sidak makai pehumpama?" 11 Yesus nyaut alu ngumung ahung sidak," nuan udah di behik hak istimiwa pakai ngeheti rahasia kehajaan Surga, tapi sidak nisik di behik. 12 Kehena sepa yang udah ada, ia akan di behik lagik. Tapi sepa yang napan bisik, dahi ia semua iyak akan di ambik. 13 Jadi Aku bandai ahung sidak makai pehumpama, kehena sidak kehena walaupun sidak ngeliat, sidak nda benah-benah ngeliat. Alu sekalipun sidak ninga, sidak nda benah-benah ninga, piak nda ngeheti. 14 Ahung sidak nebuat nabi Yesaya udah di genap, yang madah, Tengah ninga nuan akan ninga, tapi nuan nda akan ngeheti; Tengah nuan ngeliat seta yang nuan jekak keliat, tapi nuan nda akan ngeheti dengan yang tejadi. 15 Kehena ati uhang-uhang ituk udah jadi tumpul, sidak pun susah ninga, sidak udah nutup mata sidak, jadi sidak nda nyahuk ngeliat pakai mata sidak, atau ninga makai kelindang sidak, atau ngeheti makai ati sidak, sidak pun jekak bebalit ke belakang, maka Aku akan nyembuh sidak. 16 Tapi di behekat meh tiap mata yang ngeliat, seta kelindang yang ninga. 17 Sesungguh iya Aku bandai ahung nuan, bahwa banyak nabi seta uhang-uhang yang benah yang jekak mantau apa yang nuan pantau alu sidak nda dapat mantau. Sidak jekak ninga apa yang nuan dinga, tapi sidak nda dapat ninga. 18 Dinga meh pehumpama tentang petani yang nabuh benih ia. 19 Empak suhang mensia ninga firman tentang kehajaan surga, tapi nda ngeheti firman iyak, si jat alu datang ngambik apa yang udah ditabuh alam ati ia. Ituk meh benih yang ditabuh di tepi jalan. 20 Benih yang ditabuh di tanah yång banyak batu, iyak meh uhang yang ninga firman seta ligas nehimak iya dengan hambik, 21 abis iyak, kehena firman iyak nisik akah alam dihik ia tapi betahan sekejit magang. Empak pemedih seta penganiyaya empadai firman iyak, ia ligas tejugul. 22 Benih yang ditabuh di tengah humput besisih, iyak uhang yang udah ninga firman Tuhan, tapi kehena kuatih seta di akal ulih pengaya dunia, datang ngehempit ia, ia pun alu nda bebuah. 23 Benih yang ditabuh datas tanah yang subuh, iyak uhang yang ninga firman Tuhan seta paham firman iyak. Ia ngehasil buah, seta dilakun ia, ada yang sehatus kali lipat banyak iya, ada yang lima puluh, seta ada yang tiga puluh. 24 Yesus madah pehumpama lain àhung sidak. Jekuk Ia," Kehajaan surga iyak baka uhang nabuh benih yang bait di uma ia. 25 Tapi empak semua uhang telelap tiduh, musuh ia datang alu nabuh benih lalang dampin gandum udah iyak ia angkat. 26 Seta jekak tumbuh alu jekak ngeluah igik, lalang puan piak ugak. 27 Alu datang meh padak kuli tuan tanah iyak alu bandai ahung tuan ia, Tuan, ukan meh tuan nabuh benih yang bait di uma tuan? kati baka pituk tau bisik lalang? 28 Jekuk tuan tanah iyak ahung sidak, suhang musuh yang ngeheja iyak. Jekuk padak kuli iyak ahung ia, jadi mauk nda tuan nyuhuh kami nyabut padak lalang iyak?' 29 Tuan tanah iyak bandai, Anang, nanak entik kian nyabut padak lalang iyak, anang-anang kian tecabut dengan gandum ugak. 30 Isak meh sidak tumbuh besama sampai tau udah di anyi. Waktu nganyi, Aku jekak madah ahung sidak yang nganyi," Petama, cabut meh duluk padak lalang iyak alu di ikat sikat-sikat sepaya di tunu, tapi kumpul meh gandum alu baik ke gudang gandum." 31 Yesus alu madah pehumpama lain ahung sidak. Jekuk Ia," Hal kehajaan surga ituk baka benih ensawi yang di ambik uhang alu di tabuh di uma ia. 32 Benih iyak mimang senik dahi semua benih. Tapi seta benih iyak udah tumbuh, ensawi ituk lebih besah dahi semua entanam yang ada diak. Ensawi jadi kayu, hingga padak biuk datang ngawai sahang ahung padak cabang iya. 33 Yesus alu ngisah pehumpama lain lagik ahung sidak. Hal kehajaan surga iyak baka hagi yang di ambik betinak alu dicampuh ia dengan tiga takah tepung sampai kembang." 34 Semua iyak Yesus padah ahung uhang banyak makai pehumpama. Kalau nda makai pehumpama Ia nda bandai apa-apa ahung sidak. 35 Ituk tejadi sepaya apa yang udah di nebuat padak nabi jadi nyata, empak Ia bandai," Aku akan bandai makai pehumpama. Aku akan bandai tentang pekaha-pekaha yang napan di ketau dahi awal dunia ituk di gawai." 36 Yesus pun alu nudi kehumun uhang banyak iyak alu tamak kalam humah. Muhid-muhid Ia datang alu bandai ahung Ia," Jelas meh ahung kami tentang pehumpama benih gandum yang di uma iyak." 37 Yesus nyaut alu bandai," Uhang yang nabuh benih yang bait, iyak Anak Mensia. 38 Uma iyak dunia ituk; benih yang bait iyak padak anak kehajaan, alu lalang iyak padak anak dahi si jat, 39 musuh yang nabuh lalang iyak iblis. Waktu nganyi iyak pengabis jaman, sedangkan padak penganyi iyak padak malaikat. 40 Kehena iyak, baka lalang yang dikumpul alu ditunu dengan api, baka iyak ugak meh yang tejadi waktu pengabis dunia ituk. 41 Anak Mensia akan ngihin padak malaikat Ia, sidak akan keluah dahi kehajaan Ia, ngumpul semua yang nyuhuh bedosa, seta semua uhang yang bebuat jat. 42 Sidak akan di tebak kalam dapuh yang tengah menyala, diak meh ahung penangis seta kehit gigi. 43 Alu semua uhang yang benah akan becehaya baka mata ahi alam kehajaan dahi Bapak sidak. Sepa yang bisik kelindang, ia ahus ninga. 44 Hal kehajaan surga iyak baka heta kahun yang tekubuh di uma. Bisik uhang nemu iya alu ngelabuk iya lagik. Dengan abis pehambik ia pulang, nyual semua bahang ia, alu meli uma iyak tedik. 45 Sekali lagik, hal kehajaan surga iyak baka pedagang yang tengah ngegak mutiaha yang behega. 46 Seta ia nemu mutiaha yang palin behega, ia angkat nyual semua heta ia alu meli mutiaha iyak. 47 Lagik, hal kehajaan surga iyak baka pukat yang udah di tan kalam laut, pukat iyak nangkap dahi bemacam jenis mahkluk. 48 Seta pukat iyak udah penuh, nelayan iyak nahit pukat ia ke tepi pantai. Sidak alu duduk, alu mulai milih yang bait alu tapuk alam tempayan, tapi yang nisik beguna sidak buang. 49 Baka iyak meh yang tejadi waktu dunia ituk abis. Pada malaikat akan datang pakai ngemisah uhang yang jat di entaha uhang benah. 50 Sidak akan nebak uhang yang jat iyak kalam dapuh yang tengan menyala, ahung tangis seta kehit gigi. 51 Udah ngeheti meh nuan tentang semua hal iyak?" padak muhid nyaut Ia," Auk, kami ngeheti. " 52 Yesus alu bandai ahung sidak," Kehena iyak semua ahli Taurat yang jadi muhid dahi kehajaan surga baka uhang yang empu humah yang ngemaik keluah heta yang bahu dengan heta yang lamak dahi alam penahuh heta 53 ia.Udah tuntung Yesus ngisah pehumpama-pehumpama iyak, Ia angkat dahi iyak. 54 Yesus alu tamak kalam wilayah Ia kedhik sambil ngajah padak uhang alam sinagoge. Hasil iya sidak ihan alu bandai," Dahi mena uhang ituk bulih hikmat seta mujisat-mujisat iyak? 55 Ukan meh uhang ituk anak tukang kayu? Ukan meh indai Ia Maria? Ukan meh bala menyadik Ia iyak Yakobus, Yusuf, Simon seta Yudas? 56 Ukan meh bala menyadik betinak Ia bisik besama kita? Dahi mena uhang ituk bulih semua iyak?" 57 Sidak alu tesinggung seta nda nehimak Ia. Tapi Yesus bandai ahung sidak," Suhang nabi ditehima seta di humat diak dituk, kecuali di kampung halaman seta alam humah tanggak ia kedihik.Nda 58 banyak mujisat yang digawai Ia diak kehena sidak nda pecaya ke Ia.