¹ Bebehapa uhang Farisi dengan padak ahli Taurat dahi Yerusalem datang ahung Yesus. Sidak bandai," ² Apa nacah padak muhid Nuan ngelanggah kebiasa inik muyang? kehena sidak nda masuk jahi empak sidak makan." ³ Yesus nyaut alu bandai ahung sidak," Alu apa nacah nuan ngelanggah ukum Taurat kehena thadisi nuan. ⁴ Kehena Allah bepirman," Humat meh apang nuan dengan indai nuan," alu " sepa magang yang bandai jat ahung apang ia atau indai ia, di ukum mati." ⁵ Tapi nuan bandai, Sepa magang yang bandai ahung apang ia atau indai ia," Apa magang yang bisik ahung aku tau di tehimak dahi aku pituk udah ku behik jadi pesembah ahung Allah," ⁶ uhang iyak nda ahus ngehumat apang ia. Dengan baka iyak nuan udah bebuat ngelanggah pirman Allah pakai thadisi nuan. ⁷ Oi nuan uhang-uhang munafik, tejadi meh nebuat nabi Yesaya atas nuan empak ia bandai," ⁸ Uhang-uhang ituk ngehumat Aku di mulut magang, tapi ati sidak jauh dahi Aku. ⁹ Sidak nyembah Aku hanya sia-sia, kehena sidak ngajah pehintah-pehintah mensia." ¹⁰ Ia pun ningkau kehumun uhang banyak iyak alu bandai ahung sidak," Dinga seta paham meh- ¹¹ Ukan apa yang masuk yang nyuhuh mensia najis tapi sebalit iya apa yang keluah dahi mulut, iyak yang nyuhuh uhang najis." ¹² Nda lamak datang meh padak muhid Ia alu bandai," Tau nda Nuan bahwa umung Nuan iyak udah nyuhuh uhang-uhang Farisi dengan padak ahli Taurat tesinggung? ¹³ Yesus nyaut sidak, jekuk Ia," Tiap entanam yang nda di tanam Bapak Aku di surga akan di cabut dahi akah iya. ¹⁴ Isak meh sidak iyak, sidak tukang ihin uhang butak. Entik uhang butak ngihin uhang butak, sidak dua iyak jatuk kalam lubang." ¹⁵ Petrus nanggap hal iyak alu bandai ahung Yesus," Padah meh heti pehumpama iyak ahung kami." ¹⁶ Yesus bandai," Napan ugak meh nuan paham hal iyak? ¹⁷ Nda mantau meh nuan apa yang masuk alam mulut ngelalu pehut alu di buang alam jamban? ¹⁸ Tapi apa yang keluah dahi mulut datang iya dahi ati. Iyak meh yang nyuhuh uhang najis. ¹⁹ Kehena dahi ati banyak pemikih-pemikih jat, munuh, bejinah, bahang yang nisik senonoh, nyuhi, sumpah yang nda benah seta ngehujat. ²⁰ Iyak meh yang nyuhuh uhang najis. Tapi kalau makan nda bebasuk jahi, nda nyuhuh uhang najis. ²¹ Yesus alu angkat dahi iyak bejalan nuju daehah-daehah di kuta Tirus dengan Sidon. ²² Alu datang meh suhang betinak Kanaan dari daehah iyak. Ia betumbau kayah-kayah sambil bandai," Gauk meh ke aku, Tuhan, Anak Daud, Anak betinak aku abis pemedih kenak ruh jat." ²³ Tapi Yesus saja nda nyaut ia. Muhid-muhid Ia datang ngehinuk Ia alu bandai," Usih magang ia, kehena ia betumbau belalau sambil ngimbai kita." ²⁴ Tapi Yesus nyaut," Aku ituk diutus ukan untuk sepa-sepa kalau nda ahung domba yang lesi dahi humah Israel. ²⁵ Tapi betinak iyak datang alu belutut dadap Yesus sambil ngomong," Tuhan, tolong meh aku." ²⁶ Ia nyaut," Nda bait ngambik huti dahi padak biak alu nikam iya ahung anak asuk." ²⁷ Jekuk betinak iyak," Auk, Tuhan, tapi anak asuk iyak makan dahi sisa-sisa yang jatuk dahi mija tuak ia." ²⁸ Yesus pun alu nyaut," Oi, betinak, besah iman nuan. Jadi meh baka yang di kemauk nuan." Sekini iyak ugak anak betinak ia sembuh. ²⁹ Yesus pulang dahi iyak alu angkat ahung dampin laut Galilea. Ia nait katas bukit alu duduk diak. ³⁰ Kehumun uhang yang palin banyak datang ahung Ia. Sidak ngemaik uhang lumpuh, uhang butak, uhang bisuk dengan uhang timpang hapik, seta banyak lagik sidak yang sakit. Sidak ngelegak uhang-uhang iyak dampin kaki Yesus, ia pun nyembuh sidak. ³¹ Uhang banyak diak jadi te ihan-ihan empak mantau uhang bisuk tau bandai, uhang timpang sembuh, uhang lumpuh bejalan, seta uhang butak ngeliat. Sidak ngemulia Allah Israel. ³² Yesus ningkau padak muhid Ia alu bandai ahung sidak," Aku sedih mantau uhang banyak iyak, kehena udah tiga ahi sidak besama dengan Aku, sedang kan utan di makan nisik. Aku nda mauk nyuhuh sidak angkat kalau nda mehik sidak makan, kehena tau suham jamau alam pejalan." ³³ Muhid-muhid bandai ahung Ia," Dahi mena kami tau bulih huti pakai sidak ahung yang sunyik baka ituk yang tau nyuhuh uhang sebanyak ituk kenyang?" ³⁴ Yesus bandai ahung sidak," Apa pemanyak huti yang bisik ahung kian? Jekuk sidak," Kami hanya bisik tujuh huti dengan ikan yang senik-senik sikit." ³⁵ Yesus alu nyuhuh kehumun uhang banyak iyaj duduk di tanah. ³⁶ Ia ngambik tujuh huti dengan ikan tedik, udah ngucap sukuh, Ia mecah-mecah huti alu di behik ahung padak muhid. Muhid-muhid mehik iya ahung kehumun uhang banyak. ³⁷ Semua uhang makan sampai kenyang. Sidak pun alu ngumpul sisa dahi putung-putung huti iyak, tujuh bakul penuh. ³⁸ Sidak yang makan waktu iyak sebanyak empat hibu uhang laki di tambah padak betinak dengan padak anak biak. ³⁹ Yesus alu nyuhuh sidak pulang, Yesus pun alu tamak kalam pehau angkat ke daehah Magadan.