¹ Kamulek, uki kiite langit sa wayu dan bumi sa wayu. Sabab, langit sa pertama dan bumi sa pertama haut jawoh; dan laut pada haut koi oeng. ² Balalu, uki kiite kota sa kudus, Yerusalem Wayu, dolui teke langit, teke Allah, dan haut nasiap yalah pangantin wawe badandan neo huongne. ³ Uki korongoi lengan sa mehet teke takhta sawada, "Iteleh,kemah Allah naan gi suan murunsia. Io sagar duoi gi suan reo dan reo sagar jari umat-Ne. Allah raerai sagar naan gi suan reo dan jari Allah reo. ⁴ Io sagar muhut satiap ranu mato teke mato reo dan maut bakoi sagar naan kia, bakoi sagar naan kia perkabungan, tungkau atau hanang ket sa ohang haut metah.'' ⁵ Io sa maharung gi takhta iro sawada, "Iteleh, Uki nyanyari kahai ne wayu!"Wada-Ne kia,tulislah itu ket papaneran-papaneran itu tau na harap dan uah.'' ⁶ Kamulek, Io sawada mpah uki, "Haut luput! Uki adalah Alfa dan Omega, Sa Awal dan Sa Akhir. Uki sagar ngundru minum mpah satiap ulun sa kakan minum teke mato ranu pamolum secara cuma-cuma. ⁷ Io sa manang sagar mewarisi kahaine itu; Uki sagar jari Allahne dan io sagar jari pea-Ku. ⁸ Kude, reo sa takut, bakoi harap, dan keji; tukang wunu, ulun-ulun sundal, tukang sihir,* kawan panyamah berhala,* dan kahai tukang ojo, sagar kaiyuh bagian reo huang lautan sa malelap et apui dan balerang. Ituleh pampate karuo.'' Yerusalem Wayu ⁹ Kamulek, erai teke pitu malaikat sa ngepot pitu cawan sa ponu andri pitu bencana terakhir iro hawi dan iwada mpah uki, "Hayuleh, uki sagar nutui mpah iko pangantin wawe, wawen Pea Domba iro." ¹⁰ Balalu, io ngoit uki huang Roh nuju mpah gunung sa tuu idu dan obo, nelang nutui mpah uki kota suci iro, Yerusalem, sa duloi teke langit, teke Allah, ¹¹ ponu andri kamuliaen Allah dan raai ne yalah permata sa tuu rarang, yalah permata yaspis, tanang yalah kristal. ¹² Kota iro naan tembok sa idu dan obo andri ruo walas manamang gerbang. Gi manamang-manamang gerbang iro naan ruo walas malaikat dan ngaran-ngaran sa tatulis gi bawo ne, iyoiro ngaran karuo walas suku Israel.* ¹³ Naan tolu manamang gerbang gi hila timur, tolu manamang gerbang gi hila utara, tolu manamang gerbang gi hila selatan, dan tolu manamang gerbang gi hila barat. ¹⁴ Tembok kota iro naan ruo walas watu fondasi dan gi bawo watu-watu fondasi iro tatulis ngaran karuo walas rasul* Pea Domba. ¹⁵ Malaikat sa bapaner mpah uki iro ngepot erang kaua tungkeh pangukur sa naulah teke amas neo ngukur kota iro, manamang-manamang gerbang ne, dan tembokne. ¹⁶ Kota iro babentuk sagi opat, panyangne sameh andri lebarne. Io ngukur kota iro andri tungkehne, ruo walas ribu stadia; panyang, lebar, dan obone sameh. ¹⁷ Balalu, io ngukur tembok kota iro, jatuh opat pulu opat hasta, manurut ukuran murunsia, sa pada merupakan ukuran malaikat. ¹⁸ Tembok kota iro na ulah teke permata yaspis dan kota iro na ulah teke amas murni, sabening kaca. ¹⁹ Fondasi tembok kota iro terdiri bawo kahai jenis permata sa rarang. Watu fondasi sa pertama iyoiro watu yaspis, sa karuo watu safir, sa katolu watu mirah, sa kaopat adalah watu zamrut, ²⁰ sa kadimo watu unam, sa kaonom watu sardis, sa kapitu watu ratna cempaka, sa kawalu watu beril, sa kasuei watu krisolit, sa kasapuluh watu krisopras, sa ka sawalas watu lazuardi, dan sa karuo walas adalah watu kecubung. ²¹ Karuo walas manamang gerbang ne adalah ruo walas mutiara, masing-masing manamang gerbang naulah teke mutiara. Lalan kota iro na ulah teke amas murni, sabening kaca. ²² Uki bakoi kiite Bait Allah*gi huang kota iro ket Tuhan, Allah Sa Maha Kuasa, dan Pea Dombalah jari Bait Allah kota iro. ²³ Kota iro bakoi perlu mato ondro atau wulan neo nyandraaine ket kamuliaan Allah nyandraai kota iro dan Pea Domba adalah lampu ne. ²⁴ Bangsa-bangsa sagar malan huang piraai kota iro dan raja-raja gi bumi sagar ngoit kamuliaen reo mpah huang ne. ²⁵ Manamang-manamang gerbang ne bakoi sagar suah na tutup gi suan ondro, dan bakoi sagar naan kamalom gi raha. ²⁶ Reo sagar ngoit kamuliaen dan hormat bangsa-bangsa mpah huang kota iro. ²⁷ Kude, koi oeng eraipun sa najis sagar masuk mpah huang kota iro, pada ulun-ulun ngulah hal-hal keji atau ngulah ojo, melinkan ekat sa ngaran ne tatulis huang Kitab Pamolum Pea Domba.