¹ Kamulek, uki kiite malaikat duloi teke surga, ngoit kunsi jurang maut dan erang kaua rantai idu gi longonne. ² Io nyama naga iro, hi Nipo Muntuo, iyo iro Setan dan Iblis, dan nyurukne saohang saribu taun, ³ numukne mpah huang jurang maut, nutupne, dan nyegelne pakai io bakoi tau nyantawang bangsa-bangsa kia, hampe saribu taun iro baakhir. Ukah iro, io sagar nongkosit sementara. ⁴ Balalu, uki kiite takhta-takhta dan gi bawo ne maharung ulun-ulun sa na undru kuasa neo menghakimi. Uki kiite jiwa ulun-ulun sa na tuhi ulokne ket kasaksian Yesus dan ket firman Allah, dan reo sa bakoi nyamah satua iro atau sampatungne dan bakoi narime tanda satua iro gi raine atau longon reo. Reo wolum mulek dan mamarentah ibaya Kristus sa ohang saribu taun. ⁵ Kude, ulun-ulun mate salainne bakoi wolum kia amun mete masa saribu taun iro baakhir. Ituleh kebangkitan sa pertama. ⁶ Naberkati dan barasisleh ulun-ulun sa kaiyuh bagian huang kebangkitan* sa pertama iro. Nadap ulun-ulun itu, pampate sakaruo bakoi bakuasa, kude reo sagar jari imam-imam Allah dan Kristus, dan sagar mamarentah andri Io saohang saribu taun. Panalau Iblis ⁷ Ukah masa saribu taun baakhir, Iblis sagar na tongkosit teke panjarane. ⁸ Io sagar tulak neo nyantawang bangsa-bangsa gi koopat penjuru bumi, Gok dan Magok, dan ngumpul reo neo berperang. Jumlah reo iyalah pasir gi laut. ⁹ Reo ngabai mpah dataran bumi dan ngepung perkemahan ulun-ulun barasis dan kota sa nakalelu. Kude, apui duloi teke langit dan ngampietong reo. ¹⁰ Balalu, setan sa haut nyantawang reo na lampi mpah huang lautan apui dan balerang, gi rahalah satua dan nabi palsu pada na lampi. Reo sagar na siksa koondro kamalom sa kangohang ne. Penghakiman gi Hadapan Takhta Wura ¹¹ Ukah iro, uki kiite takhta wura sa idu dan Io sa maharung gi bawone, sa teke hadapan-Ne bumi dan langit jawoh dan bakoi na tangkahong kia duoi mpah reo. ¹² Dan, uki kiite ulun-ulun mate, idu dan odik, sokondrong gi hadapan takhta iro, balalu na ukalah kitab-kitab dan erang kaua kitab sa lain, iyoiro Kitab Pamolum, dan ulun-ulun mate iro nahakimi badasarkan inun sa natulis huang kitab-kitab iro, sasuai perbuatan reo. ¹³ Laut manyarahkan ulun-ulun mate sa naan gi huang ne, maut dan Hades pada manyarahkan ulun-ulun mate sa naan gi huang ne dan reo na hakimi, masing-masing manurut gawianne. ¹⁴ Balalu, maut dan Hades na lampi mpah huang lautan apui. Ituleh pampate sa karuo -- lautan apui. ¹⁵ Apabila erang kaulun ngranne tatulis huang Kitab Pamolum, io sagar nalampi mpah huang lautan apui iro.