¹ Kamulek, malaikat iro nutui mpah uki sunge ranu pamolum, sa tanang iyalah kristal, mareh teke takhta Allah dan Pea Domba ² gi suan lalan kota iro. Gi karuo hila sunge, wolum kakau pamolum sa menghasilkan ruo walas jenis ua dan menghasilkan uane satiap wulan. Raon-raon kakau kayu iro nagunakan neo nyamare bangsa-bangsa. ³ Bakoi oeng kia kutuk, kude takhta Allah dan Pea Domba sagar naan gi huang kota iro. Walah-walah-Ne sagar nyamah Io. ⁴ Reo sagar kiite rowawa-Ne dan ngaran-Ne sagar na tulis gi rai reo. ⁵ Malom sagar bakoi oeng kia sehingga reo bakoi memerlukan raai lampu atau mato ondro ket Tuhan Allah sagar nyandraai reo, dan reo sagar mamarentah ma kangohangne. Pihawian Yesus Kristus ⁶ Malaikat iro sawada mpah uki, "Kahai papaneran itu iyuh na harap dan uah. Tuhan, Allah teke roh kawan nabi,* nyuyu malaikat-Ne neo nutui mpah walah-walah-Ne inun sa harus segera terjadi. ⁷ Rongoileh, Uki segera hawi! Naberkatileh ulun sa mentaati papaneran-papaneran nubuat* kitab itu." ⁸ Uki, Yohanes, sa haut korongoi dan kiite kahai itu. Hantek uki korongoi dan kiite kahane, uki isudu neo nyamah gi poo malaikat sa haut nutui kahai iro mpah uki. ⁹ Kude, io sawada mpah uki, "Ada ngulah iro! Uki adalah walah sameh iyalah iko dan pulaksanai-pulaksanaiko kawan nabi, pada iyalah reo sa mentaati papaneran-papaneran huang kitab itu. Samahleh Allah!" ¹⁰ Kamulek malaikat iro sawada mpah uki, "Ada nyegel papaneran-papaneran nubuat huang kitab itu ket waktune haut riet. " ¹¹ Ingkeh ulun sa ngulah jahat tatap ngulah jahat, ulun sa bakoi suci tatap bakoi suci, ulun sa ngulah uah tatap ngulah hal sa uah, dan ulun sa kudus tatap menguduskan tonga ne." ¹² "Rongoileh, Uki segera hawi! Dan, Uki ngoit upa-Ku, neo mambalas satiap ulun manurut perbuatanne. ¹³ Uki adalah Alfa dan Omega, Sa Pertama dan sa Paling Terakhir, Sa Awal dan Sa Akhir. ¹⁴ Naberkatilah reo sa nuhun jubah reo sehingga reo kaampun kakau pamolum dan masuk mpah kota iro metah manamang-manamang gerbangne. ¹⁵ Sa giluar kota iro adalah eteng-eteng, ulun sa ngulah sihir, ulun-ulun cabul, kawan tukang wunu, kawan panyamah berhala, dan ulun-ulun sa sanang andri ojo. ¹⁶ Uki, Yesus, haut nyuyu malaikat-Ku neo basaksi mpah iko neo kahai itu mpah jemaat-jemaat. Ukilah tunas dan katurunan Daud*, Sang wiwihiang Timur sa maraai." ¹⁷ Roh* dan pangantin wawe iro sawada, "Hayu!" ingkehleh ulun-ulun sa korongoi itu sawada, "Hayu"Ingkehleh ulun sa kakan minum hawi; ingkehleh ulun sa basadia ngepo ranu pamolum secara cuma-cuma." Panutup ¹⁸ Uki basaksi mpah kahai ulun sa korongoi papaneran nubuat kitab itu: "Amun naan sa namoh sesuatu gi papaneran-papaneran itu, Allah sagar namoh mpah io kahai bencana sa tatulis huang kitab itu. ¹⁹ Dan, amun naan sa nangkurang sesuatu teke papaneran-papaneran huang kita nubuat itu,Allah sagar ngepo bagianne teke kakau pamolum, teke kota kudus, dan teke hal-hal sa tatulis huang kitab itu." ²⁰ Io sa basaksi neo hal-hal itu sawada, "Ya, Uki segera hawi." Amen*! Hawileh, Tuhan Yesus! ²¹ Anugerah Tuhan Yesus nyindrah iko kahai. Amen.