¹ Akhirnya, dansanak-dansanakku, arailah dalam Tuhan. Aku kada kabaratan manulisakan lagi hal-hal nang sama kakawu karana hal nyia akan manjagamu. ² Bahatilah tarhadap kuyuk-kuyuk, bahatilah tarhadap para palaku kajahatan, wan bahatilah tarhadap buhannya nang manyunat awak, ³ sabab kitalah urang-urang basunat nang sejati, nang manyambah dalam Roh Allah, mamuliaakan Yesus Kristus, wan nang kada manaruh parcaya lawan hal-hal nang lahiriah ⁴ walaupun aku sabujurnya maampuni alasan gasan bermegah pada hal-hal nang lahiriah. Umpama ada urang lain nang bapikir bahwa inya maampuni alasan gasan bermegah pada hal-hal nang lahiriah, talabih lagi aku: ⁵ Aku disunat pada hari ka dalapan, bangsa Israel tulen, matan suku Benyamin, urang Ibrani nang babahasa Ibrani. Manurut Hukum Taurat, aku adalah urang Farisi. ⁶ Dalam hal samangat, aku adalah panganiaya jemaat, wan dalam hal kabanaran di bawah Hukum Taurat, aku kada bacacat. ⁷ Akan tatapi, segala sesuatu nang dahulu manguntungakan aku, wayahini kuanggap rugi karana Kristus. ⁸ Sungguh sagala sasuatu kuanggap rugi dibandingakan lawan panganalan akan Yesus Kristus, Tuhanku, nang jauh labih baharaga matan apa pun. Demi Kristus, aku talah kahilangan sabarataan karana sabarataan nyitu wahini kuanggap ratik! supaya aku bulih mandapatakan Kristus. ⁹ Aku ditamuakan dalam Kristus kada dalam kabujuran nang baasal matan diriku saurang nang kudapatakan matan Hukum Taurat, tatapi nang datang malalui iman dalam Kristus, yaitu kabujuran matan Allah nang berdasarkan lawan iman. ¹⁰ Kiranya aku ulih manganal Inya wan kuasa Kebangkitan-Nya serta basatu dalam pandaritaan-Nya gasan manjadi saparti Dia dalam kamatian-Nya ¹¹ Sehingga pada paampihannya aku mandapati kebangkitan diri antara urang mati. Bagarak Maju kapada Panggilan Surgawi ¹² Namun, kada baarti aku talah mandapatakannya atawa talah sampurna, malainkan aku mangapungnya supaya aku manangkapnya sabagaiman Kristus Yesus talah managkap aku. ¹³ Dansanak-dansanak, aku kada maanggap bahwa aku talah managkapnya. Akan tatapi, satu hal nang kulakuakan: aku malupakan apa nang di balakangku wan mangarahakan diri kapada nyapa nang di hadapanku. ¹⁴ Aku tarus maju kapada tujuan gasan mandapat hadiah, yaitu hiyawan surgawi matan Allah dalam Yesus Kristus. ¹⁵ Marilah kita nang sampurna bapikir kaya nyia. Amun kawu kada bapikirk kaya nyia, Allah akan manunjukakannya lawan jalas kapadamu. ¹⁶ Namun demikian, marilah kita tarus hidup sasuai lawan kabanaran nang sudah kita ampuni. ¹⁷ Dansanak-dansanak, umpatilah teladanku wan parhatiakan lawan saksama urang-urang nang jua hidup sasuai lawan teladan nang kawu lihat matan kami. ¹⁸ Sabab, ada banyak urang nang hidup sebagai musuh-musuh salib Kristus. Tantang hal nyia, aku talah rancak mangisahakannya kapadamu wan asia aku mangisahakannya lagi lawan aing mata. ¹⁹ Hujung hidup buhannya adalah kabinasaan, karina allah buhannya adalah parut buhannya, wan pujian buhannya adalah hal-hal nang manyupani. Pikiran buhannya hanyalah pada hal-hal duniawi. ²⁰ Akan tetapi, kewarganegaraan kita adalah di surga, di mana kita lawan semangat hibak mahadang-hadang Juru Selamat, yaitu Tuhan Yesus Kristus. ²¹ Inya pacangan maubah awak kahinaan kita manjadi mirip lawan awak kamuliaan-Nya. Lawan kuasa-Nya nyitu Kristus ulih mambawa sagala sasuatu tunduk lawan-Inya.