¹ Ka sotən na hanjiimi go, "Mən sʊgəmən yəm bə nyam, karə bagi ba jɨnəm bə me ba chuu bwiyatəm, ba chuu dʊʊtǝttan Taajiiyuwi nyəngkə ba be rə kumnii gərəng." ² A bukka kotə tə nukkunəng, Yesʊ ka dəb Bitrus, Yakobo na Yohana ka gwi nə hanjiim a gʊ həla wʊ pəlli dang nən ji. A gai bwiyangʊ ka wʊlga a kak kan jiiyəng. ³ Dʊtǝttang gʊ ka chii kwaʊ wʊ me rǝ ni a gʊsəti wʊ ba dəmən a nəngngai. ⁴ Kən Iliya na Musa jɨrtəne wa hanjiimi, sʊga yəmni tən Yesʊwʊng. ⁵ Kən Bitrus go, "Ni məssari, ka nyagʊ nən bənəng ka gʊmbe, nən nəngnga kungngote tə bwanbi, dʊmʊn din, Musa din na dan Iliyan din." ⁶ (A yəmbə jii wʊ ba sʊwei, bəra rə taate.) ⁷ Kə korta be məra hanjiiməng. Kən nui dagi jiir jɨrera korən nəng, sʊrə go, "Bwe we Yəlla daai ya miyʊ. Tə kaʊtən su we." ⁸ Rəkwa gaiyəng, hanjiim a wumən kəmtəng a chuubə ni, bwigi Yesʊ gən kwan. ⁹ Hanjiim fiye ra həlla hiyəng, kən hangʊ a ne sori hanjiim go kar ba sotən jiiya chuuwi a gʊ ni ba kwan, a dʊwe yɨgiira fʊlla wʊ Yəlla Niyʊ ba gun məne rəga bwiyati. ¹⁰ Kən hanjiim a masi rə yəm həməng, ka jaʊkag gʊlgara jʊgər da jiiyən go, wʊllai ji wʊ hangʊ kəmmari rə bam yəmbi "guntang a bwiyate." ¹¹ Hanjiim a gʊl hangʊ go, "Wʊlla ma ki nəb mʊlarəm ba soriyəm sʊwe rə go a chiin bwi Iliya a be rə jiiguwʊng?" ¹² Ka sotənna hanjiimi go, "Bən jum, Iliya ka be rǝ jigu go na gə juwe rə wunɨ ji. ¹³ Mənni wʊlla makii mʊlla mo kwag Yəlla Niyʊ ba no kʊnang na bən kwila bong? Mənni mən sʊgəmən mo, Iliya ka be, hanjiim ka nəngnga tən jiiya chuu sərri, nyəngkə wang a sʊwe rə ga jiiyang giiyəng." ¹⁴ Bukka kaʊwe bwi a mura məssarbə ba gəməng, ka chuu hanjiim tən nəb mwam na rə nəb mʊlarəm ba soriyəm jʊga bʊri kiin. ¹⁵ Rəkwa-rəkwang hanjiim a chuu hangʊwʊng, nəb ka mənna bʊnte rə kwani ka mwarawa be sʊ hangʊwʊng. ¹⁶ Ka gʊl məssarbə ba gəmən go, "Tə jʊga tən buri a wʊllai?" ¹⁷ Kə gʊ a mura nəb həm a ngatənəng go, "Ni məsari, n’be nəng yəlla miyʊ a gwa mwiyʊ; karə we bwira wʊ me bə nga tənnə go sʊ yəmmi, ¹⁸ a guntən ki ka mara təm, jəg fugulta nyii, kərsə nungte, kʊm bwi kǝngkang. N'chəlla məssarbə ba mʊm mo a jəgtən, mənna dəmən be." ¹⁹ Ka ngatənəng go, "Jɨn daam bə rə bʊnaiya nəbbəntang ka yəmbə nyaməng, Bən chii nən jɨn yɨgiira wunɨ fʊlla? Bən midaa nən jɨn yɨgiira hale? Be mənnə hangʊ." ²⁰ Kən hanjiim a be tənə rə bwe hiyəng. We hi a chu Yesʊwʊng, ka maʊ bwe hi ya təm fʊtəlare. Bwe hi a yara təməng ka sʊ jəg fugulta nyi. ²¹ Yesʊ a gʊl tee hiyəng, "Ka lang nəngnga nyang nyəng kǝ ga?" Tee go, "Bwigi kangngəng kǝn bweng. ²² Ka mai mʊ wa kərang, tən hii, farə juutang ka gəng. Bən dəmən nəngnga gʊji ki, nui kʊnang ka nənnəng na tʊga bən." ²³ Yesʊ a sotən go, "Bən dəmən ki? Wunɨ ji wʊ nəngnga bwiyʊ bəra rə ni wa nəbən yəm bə nyami." ²⁴ Rəkwa-rəkwang tee bwe hiyʊ ka gug jiir rə kumni go, "Kən nəbən yəmbə nyam! Tʊgai ya bʊnai ya yəm bə nyam ba miyəmmi." ²⁵ Yesʊ a chuu berə rə səngniyəng, ka baʊtən jiir a we bwiraiyəng go, "Mʊ we mɨi na rə wʊ bʊwa langngəri, kən sʊnən jɨrmənne na kari bən kaʊ bwi a bwe hi." ²⁶ A maʊ wʊri na məga bwe hi rə kumniyəng ka jɨrəng. Kə bwe hi a dəddai da bwiya-bwiyang, nəb mwam go, "Ka bwiya." ²⁷ Kən Yesʊ a taʊ bwe hi ya kangngəng, ka guggəng, kə bwe hi ya səssiyəng. ²⁸ Yesʊ a dɨga kaiyəng, məssarbə ba gəm ka gʊl go, "Wʊlla ma ki nən dəmən bə nə jəg we bwira hiyəng?" ²⁹ Hangngʊ a sotən na hanjiimi go, "Wai we me bə jɨrre me sotangnga hii we tən rʊwani nyii ki." ³⁰ Kə hanjiim a dʊ gaiyəng ka tʊ a Galiliyəng. Hangʊ a fabə go gʊ ni a yəm gʊ tə kawi, ³¹ bəra ki bə məssatənna məssarbə ba gəm. Ka sotən go, "Bən nəbən Yəlla Niyʊ a kang ka nəbəng, bǝn juu. Jii wʊn juuwi ki, bukka kotə tə bwanbiying ba gun." ³² Mənni hanjiim a jəgga bə ban yəm be, hanjiim bə nui taata gʊltangngi. ³³ Kən hanjiim a be Kafarnahuməng. A bukka dɨga kaiyəng kə hangʊ a gʊl hanjiim go, "Wʊllai ji tə sʊgara jʊwiyʊ?" ³⁴ Hanjiim a dəmən ba sʊwe gujii. Bəra ki hanjiim a lang bə jʊʊga buri go wunɨ gəba chii wʊ gǝra. ³⁵ Hangʊ a chii-chiiyəng ka buwe bə kwu a jɨr bəsʊwʊməng, ka sotəna hanjiimi go, "Karə wʊ farǝ go gə chii wʊrə jiguwi ki, a chii bwi a yullo wʊ kətəle na bwira bagiyʊ warigʊwi." ³⁶ Ka dəb bwe kətəlegʊwiyəng ka ti a jʊgər da jiiyinəng, ka dəb bwe hi a kʊmmangʊ ka sotəna hanjiimi go, ³⁷ Ni wʊ ba yʊ bwe nyang nyəng ki bəra nən mi, a yʊ me, ni wa yʊwiyʊ, a yəbə mən kwan, a yʊi nǝn tee miyʊ wa təmiyei." ³⁸ Yohana sotən go, "Bɨgsɨr, kənə chuu gʊ ni karamən weni bwirai a nəb rə dun da mʊn, mənni kənəng dang rəge, bəra ki me bə fʊng bənə." ³⁹ Kən Yesʊ a sʊwe go, "Kari tə dang rəge, bəra ki me rə ni wʊ ba nəngnga swiyer də nyan rə dunda miyən ki ba kaʊwe bwi rə bug a sʊwe gʊji bwira a mi. ⁴⁰ Ni wʊ me chʊgo bwiga ta nənnʊwi, nən wʊni. ⁴¹ Ni wʊ ba nəgən hii tə no bəra ki tən nəbba Kristiyəm, mən sʊgəmən yəm bə nyam ba nya nətəttangʊ. ⁴² Wʊ ni wa yullo ji ya yarti wa kwan na muriya bətəm ba nəbbən yəmbə nyami, ba liitən nyagʊ a ni hi bʊtən ner də kʊntan a kwiir da gən na mai gəra wimang. ⁴³ Kə kang ka mʊng ba dəgən yar ki, mwemən na maisəre. Ba linən nyagʊwi dɨgiiya kai tə nyai mənnə kang kiin, tən kə bən dɨgiiya kərang rə bwiyamʊ warigʊwʊng. ⁴⁴ Gʊ gɨlgotangʊ me bə bɨtɨrori na kərang ka gəng me bə dumori. ⁴⁵ Ki naa ka mʊng ba dəgən yar ki, mwemən maisəre. Ba linən nyagʊ dɨgiya kaitə nyai mən kuri na kǝ kə bən dɨgiya kərang rə naani təsʊwʊng. ⁴⁶ Gʊ gɨlgotangʊ me bə bɨtɨrori na kərang ka gəng me bə dumori. ⁴⁷ Kən kəmta mʊ ba dəgən yar ki, jəgamən. Ba linən nyagʊwi dɨgiiya dʊʊtətta Taajiiyuwi mən duu tən kəbən dɨgiiya kərang rə kəmta mʊ təsʊwʊng. ⁴⁸ Gʊ gɨlgotangʊ me bə bɨtɨrori na kərang ka gəng me bə dumori. ⁴⁹ Bəra ki kərang gʊ bən tʊmən wunɨ gəri. ⁵⁰ Bʊmkanəm ka nyagʊ, mənni a bunna chʊlʊwi yangʊ ki, wʊllai ba nǝngngai? Tə chii bʊmkanəm a jɨnii, natə chii rǝ ləmmang rə bwitə."