¹ A yai kotə yǝre re, kʊlən da nəbbən ka kʊra bwite bo mənni me rə ji ba jaʊwi, kən Yesʊ a buwe məssarbə ba gəməng a sotən go, ² "Kʊlən da nəbbən de kə bʊni mənne, bəra ki kʊ kotə tə bwanbi nə ka kiin, me jɨnii-jaʊri we. ³ Kʊ sotən mo diya kaini yatə rə kʊn ki, ba funo jʊwi, bəra ki, bagi kaina jiyu nən pre." ⁴ Məssarbə ba gem ka nga tən nəng go, "Mənni bənən nyawʊ jɨnii-jaʊri ba laʊtəna nəb bambi na me kaina gaiwʊng a le?" ⁵ Ka gʊl hanjiiməng go, "Ka tənə mwantə tə fʊm-fʊmi tə nyənne?" Hanjiim go, "Nyibi." ⁶ Ka sotəna nəb go a chiiro-chiiroi. Ka dəb mwantə tə fʊm fʊmi hiyəng, bukkǝ hangʊ a nəngngatən wʊnan nəng, Ka wula-wulai. Ka ne məssarbə ba gəməng go wutugotən na nəb. Kən hanjiim a wutugotǝnǝng. ⁷ Hanjiim bo karə betəlai bani, buk ka nəngnga tən wʊnanəng bo ka sotən na məssarbə ba gəm go tə kaʊ bwi tə wutugo. ⁸ A jʊwang ka riira. A kʊra jiiya dʊtəniyəng, ka riiro kɨltɨ tǝ kʊntai nyibi. ⁹ Ka nəbbə barəm a muri nyəra neetə tə gwar. Ka yo hanjiiməng. ¹⁰ Rə-kwa-rə-kwang ka dɨga bʊntəlongngəng tən məssarbə ba gəm yɨgira kʊlo Dalmatiyai. ¹¹ Kə Farisawa be jʊʊga buri tən hangʊwʊng. Hanjiim go hangʊ na nəngngai gimən gʊjii wa chii wullo wa jiiyu wi, gʊlən da bɨngorangngən. ¹² A hege yuum a we gʊwʊng, kə go, "Wʊlla maki daam bə kʊwʊm fawe wulo jiiyuwʊng? Mən sʊgəmən yəm bə nyam, me rə wullo wʊ bən nʊng bam daam bambi." ¹³ Ka dʊ ba hanjiiməng, a dɨga bʊntəlongngəng ka diya dagi yawʊrəng. ¹⁴ A wai fʊlla hi, məssarbə ba gəm ka tamən a diye bə rə jɨnii-jaʊri kʊri. Bwigi a mwan din da diye gǝra mura bʊntəlong ka hiiyənǝng. ¹⁵ Ka wʊtən suwa hanjiimi go, "Tə yo kəmtə tə fʊm bwi nyagʊ bəra rə jʊlai ya Farisawa na tən Hiridʊsi." ¹⁶ Məssarbe ka sʊ jʊʊga ra bwitan jiiyu go, "Bə sʊ yəm bambe bəra ki me nənə mwan də fʊm-fʊmənəng." ¹⁷ Yesʊ ka rə yəmtang a nyangngi, ka sotən na hanjiimi go, "Bəra rə wʊllai ki tə jʊʊga buri ya mwantiyəng?" Tə yəmbə ga? Laʊwerə kʊ me tənə yəmtang ga? Furna jɨnu wa kuma muri ga? ¹⁸ Ka tə nə kəmte, me tə chuurə ga? Ka tə nə suuni, me tə nuirə ga? Furna jɨnu wa kuma muri ga? ¹⁹ N’wula mwantə tə fʊm-fʊmi tə nʊwʊng a mura nəb neete tə nʊwʊng, tə nya kɨltə tə nyənna dʊtən? Hanjiim go, "Kwu a jɨr təsʊ." ²⁰ Mənni fʊlla wʊ wulla mwantə tə fʊm-fʊmi nyibi a mura nəb neetə tə gwari, tə dəba kɨltə tə nyənne? "Hanjiim go, "Nyibi." ²¹ Hangʊ go, "Berə tənkʊ tə jəgga bə ga?" ²² Ka be Baisaida. Kən betənnə rə duu a Yesʊwi chəllarə mo titən kang. ²³ Yesʊ a taʊ kang ka duu hiyəng, ka jɨrmən rəga muri hiyəng. A sug tən sugum a kəmtəng na titən kangngəng, ka gʊləng go, "Kamən chuurə guji ga?" ²⁴ A jəga jiiyəng, go, "Kamən chuurə nəb yorə nyəra rite." ²⁵ A kaʊ bwi a titən kang a kəmtə hiyəng, kə ni hi ya wumən kəmtəng, chutang ka gəng ka yɨgtən bwi chuurə kwe. ²⁶ Yesʊ go hangʊ a di ya kaitangngʊ, ka sotən go, "Kari bən dɨga bɨr." ²⁷ Yesʊ ka jɨr tən məssarbə ba gəm yɨgiira murta Kaisariya a Filibiyʊ. Ka jʊwiyəng ka gul məssarbə ba gəm go, "Nəb bə sʊwe go mənnə wune?" ²⁸ Hanjiim a ngatənəng go, "Yohana wʊ nəngngatən batisma nəbbi. Bagi bə sʊwe go, 'Iliya,' bagi bo go, 'Kwan a mura nəbbə yʊwe yəməm.'" ²⁹ Ka gʊl hanjiiməng go, "Mənni jɨn bo, tə sʊwe to mənnə wune?" Bitrus a jaʊtən go, "Mwe mənnə Kristi." ³⁰ Yesʊ a mwetən suuwʊng go kari ba sotəna gʊ ni. ³¹ Kən hangʊ a sʊ məssatəna hanjiimi go, a chii bwi Yəlla Niyʊ a no kʊnang a mura jɨnii mwam, taabe, nidʊwa nəbbə tung jɨniiya chəriya Taajiiyuwʊm, na rə bə mʊlla jɨniiyəm ba kwiila hangʊ, bən juu, a buk ka kotə tə bwanbiyəng ki ba gun. ³² A sʊwe yəm həm nən tangsang. Kən Bitrus a bu hangʊ a kɨngngəng ka sʊ mwilatən yəməng. ³³ Kən Yesʊ a wʊlga bwi a jəga məssarbə ba gəməng, Ka mwilatən yəm a Bitrusi go, "Kaʊwe bwi a bukka miyəng mʊ Chetan! Jiya daa ni me wa Taajiiyuwi wa jɨna nəbbi." ³⁴ Kə Hangʊ a buwe nəb mwaməm na rə məssarbə ba gəm go, "Niwʊ farə go gə fʊngiyʊ ki, a chii kwag a ko dur da gən, na dəbbe riyang yʊwarang kanggəng na fʊngngiye. ³⁵ Bəra ki, wunɨ wʊ farə go gə jəg yuum ba gəmmi ki a chii bwi a bʊna, warigʊ wa bʊna yuum ba gəm bəra nən mi na bəra rə yəmbə ləmmangngəm bǝn jǝg. ³⁶ Ni ba nya fini tə nyənni nyəngka kʊra jɨna gʊsəti warigʊwʊng, na bʊna yuum ba gəməng? ³⁷ Wʊllai ji wʊ ni ba nəbbən a nyii ya yuum ba gəmmi? ³⁸ Warigʊ ni wʊ ba chiitən jiya bujɨriyu rə bwamər damiyən a bam daam ba jɨnii-bwiraiyəm be, Yəlla Niyʊ ba nui bujɨri tangngʊ a jii wu ba be tən weni-təmri a mura graatətta Teengʊwi."