¹ Farisawa ka kʊra bwi a gwa Yesʊwi tən bagi nəb mularəm ba soriyəm ba jɨre wa Urshalimam. ² Hanjiim ka chu go bagi məssarbə ba Yesʊwʊm bə jaʊ jɨnii rə kani kʊrsən. ³ (Bəra ki a chii tən bwi a Farisawa na Yahudawa a yəramən kani ka dʊ a jaʊ jɨnii jaʊri, me bə jarə jɨnii jaʊri kani kʊrsən. ⁴ Farisawa kaʊwe bwi a bandʊwa ki, a chii bwi a wai hii kǝ mənna jaʊ jɨnii-jaʊri. Ka yagi sortə mwam yə hanjiim fʊngri wa taʊ yəraməntang a chʊlleti, guute, rə gani chiirona gʊn jarə jɨnii-jaʊri wi.) ⁵ Farisawa tən nəb mʊlarəm ka nəngngatən gulən a Yesʊwi go, "Wʊllai ji ya nəngnga kii məssarbə ba mʊm me bə fʊng sori ya nəbbə gramiyəng? Bəra ki bə jaʊ jɨnii-jaʊri rə kani kʊrsən." ⁶ Mənni kə hangʊ a jaʊtən go, "Ni yʊwe yəmi, Ishaya ka sʊwe rə langtang go jɨn nəbbə bwiram. "Ka mʊlla go, ‘'Nəbbə, nəbbəntang ka graatəng ka jiiyəng wa nyi, mənni furna jiiyu nən pəre nən me. ⁷ Nyiini rʊwa nan jiiyu yərə kʊni, me gujii a muri, məssarang ka nəbbəng gən soriyan jiiyu.' ⁸ Kətə jamən sori wa Taajiiyuwi, tə taʊ məssarang ka nəbbəng rə kumnii." ⁹ Nyang bo ka sotəna hanjiimi go, "Kətə nəngnga na tə nyɨng soriya Taajiiyuwi rə kɨng, to na tə fʊng soriyan jɨnu. ¹⁰ Musa sʊwe go, 'Ne graate tee mʊ tən nee mʊ,' na, 'Ni wa kəbba tee tən neei ba bwiya. ¹¹ Mənni jɨn tə sʊwe to, 'Ni a sotənna tee tən nee go, "Ji wʊ na bən nənni kən ne Taajiiyu,'" ¹² rə nyang, kətə ne sər ni to kari ba tuga tee tən nee. ¹³ Kətə ti soriya Taajiiyuwi a yulo ji rə kʊni, bəra rə yobiyan jɨnu tə mutǝn jiwi . Na rə yagi jɨnii dəndang tə nəngngari." ¹⁴ Ka kaba bu kʊlən da nəbbən sotənnə go, "Tə kaʊtən suu a mi waringəm ba jɨnəm na tə jəgga. ¹⁵ Meng guji wa tariyʊ wʊ dɨgira muriyʊ wʊ ba ləbtə niyʊ, jiwʊ jɨre ra niyu n’gə ləbtə ni." ¹⁶ Niwu karə suuniyu masi a nui. ¹⁷ Yesʊ a dʊ kʊlən da nəbbən na gun a dɨga kaiyəng, kə məssarbə ba gəm a gʊl hangʊ a ji ya yəm dəgrəmhəm. ¹⁸ Kən Yesʊ a jaʊtən go, "A murtǝ nǝn jɨn nyang tə jəgga bə ga? Tə yəmbə to ji wʊ dɨgira nyi ya niyʊ me n’gə lʊgtə ni ga, ¹⁹ bəra ki me ba dɨga furiiyan gʊ, mənni bə dǝga fur da gən, a buk ki bən nəngnga tari rə ge." Rə bam yəm be, Yesʊ bə sʊwe go jɨnii-jaʊri warigʊ nən nyagʊ. ²⁰ Hangʊ go, "Jiiwʊ jɨrera nyi ya niyʊ n’gə lʊgtə ni. ²¹ Bəra ki kəmarang kə bwirang bə jɨre wa furi ya niyʊ, daagatang kə sirəməng, kuute, juurang, ²² talte, jələn də bwiran, furii bwira, sʊ, gugtang ka durəng, mɨɨte, jiir də bwiran. ²³ Warigʊ jɨnii bwirai yaiye bə jɨre wa furi bəngə ləbtə ni." ²⁴ Ka gun mənna gaiyəng ka diya murta Taya na Sidoni. Ka dɨga tagi kaiyəng, bəra ki me bə farə go nəbba yəm, mənni a bara bə bwi. ²⁵ Mənni rəkwa-rə-kwang, gʊ nyui wʊ we bwira darə yʊwi yangʊwi ka nui ji wʊ Yesʊ nəngngari, ka be yara kak ka gəngəng. ²⁶ Nyui hi wa təm ba Girkami, buwʊng ka Fanichang. Ka chəlla go hangʊ a jəgmən weni bwirai yə da yʊwiya gʊwi. ²⁷ Hangʊ a sotəna nyui hi go, "Masi fʊ bətəba rii fur, bəra ka daʊtən bʊwe dəb jɨnii-jaʊra bətəbiyʊ ne jwate." ²⁸ Kə nyui hi a jaʊtən na hangʊ wi go, "Nən nyang, Bɨgsɨr, mənni jwatǝ ka nya kəsəlaniya yəra təmmi." ²⁹ Ka sotən go, "Bəra kǝn sʊwe nyang nyəngkǝng, di. We bwira ka jɨrmənna yʊmmoi." ³⁰ A kaʊ bwi ya kaiyəng a nya yʊwi a dəddai a swete, we bwira hi ka jɨr. ³¹ A kaʊ bwi a jɨr mənna Tayang ka tʊtən na Sidonəng a kulo wimang ka Galiliyəng yɨgiira mura təm ba Dikafolosəm. ³² Kən betən rə gʊ ni wʊ langngər a bʊwa-bʊwaiyʊ, kən chəlla hangʊwʊng mo titən kang. ³³ Hangʊ ka wʊmənne ni hi a jʊgər da nəbbən a be gǝra kɨngngəng, ka titən wurtangʊ a suuniyan gʊwʊng, a sugtən suguməng, ka məbra langngər da gənəng. ³⁴ Ka jəga jiiyəng, ka hege yuuməng, ka sotən go "Ifatha,"ji sʊweri go, "wumən." ³⁵ Rə kwa-rə-kwang, ni hi ka sʊ nui yəm, ji ya bʊwa langngər da gəni ka dimǝn ka sʊ yǝm nyagʊ. ³⁶ Ka baʊtən jiir go kara sotəna gʊ ni. Mənni rə jiir da baʊtən nən warigʊ, hanjiim ka si finang ka swiyer da nəngngan. ³⁷ jɨnii hangʊ nəngngari ka ne mənnatangnga bʊni hanjiim deni, sʊrə go, "Hangʊ ka nəngnga jɨnii warigʊ nyagʊ. Nəbbə me bə nui yəməm rə bə me bə sʊrəm, kə nuire sʊrə wal-wal."