¹ A jɨrmənne wa gaiyəng ka be bɨr da gənəng, kə məssarbə ba gəm a fʊngngəng. ² Ko gɨriiyʊ a beng, ka məssatən na nəb a kan da rʊwani nyiiniyən, nəb mwam ba nuiyəm, ? mənna bʊnte, nəngnga gʊlte go, "A nya kang məsarang ka le?" "Dan bərsan də ne hangʊ nyang nyəngkən gən dɨne?" "Mənni jɨna mənatangka bʊniyəng kə nəngngarə rə kanangʊwʊng kə bo?" ³ "Me gən bwe wʊ sʊlla riti wʊga, yəllan Meriyʊ, na rə chiyangʊ nən ll Yakobo, Yahuda, na Joses na Simani ga? Mo chəttə-chʊwitangʊ nə ka kiin a gʊ ga?" ⁴ Hanjiim ka nəngnga fur də yulluwun nən Yesʊ, kən Yesʊ a sotənna hanjiimi go, "Niwʊ yʊwe yəmi me rə graate a mura bɨr da gən, a mura dʊgərtǝtan gʊ, na mura kaitan gʊ." ⁵ A kabi ba nəngnga swiyer da mənnatang ka bʊniyəng kə mwaməng, a tǝgtəna titang ka kaniyəng ka nəngnga təna nəbba bwara-bwaraiyǝm na nya bwitə ləmmangngəm. ⁶ Hangʊ ka nui mənnatang ka bwiyəng bəra rə bʊnai ya nəbbəntang ka yəmbə nyam ba jiiyəm. Ka di a kaʊwʊrre murte rə məssarang. ⁷ Ka buwe bə kwu a jɨr bəsʊwʊməng, ka sʊ təmma hanjiim bəsʊ-bəsʊwʊng, a ne kumnii a jiiya weni bwirai, ⁸ ka ne sori hanjiim go a dimən a damər ki, kari ba dəb; jɨnii jaʊri, chəmmər, tən swa a yom ba jiiyəm, ⁹ mənni na dʊ ləbərte, na kar ba dəb dʊttǝ təsʊ. ¹⁰ Yesʊ go, "Kaitə tə dɨgi wi ki, kar tə jɨrre yɨgira jiwʊ bətə dʊ muri hiyʊ. ¹¹ Bɨr da yǝggən bən ki, jiiwʊ tə jɨrməna gaiyʊ, tə bamən kur da nanan jɨnuwʊn na duuta dʊtənan ji. ¹² Ba hanjiim a jɨreng ka sʊ waʊtangna yəm go nəbba bukang na dʊ nəngngatang a jɨnii bwirai. ¹³ Nəb mwam ka nya bwitə ləmmangngi bəra ki ba hanjiim ka karamən səmbatə bwirai a gwa nəngngatang a fini rə nʊngngi. ¹⁴ Nidʊ Hiridʊs ka nui, bəra ki dun da Yesʊwʊn kən yəm deni. Bagi sʊrə go, "Kən guge Yohana nəngnga batismai a mura nəbba bɨtɨrom, bənga nya kumnii ta nəngngatannga jɨna mənatang a buniyʊ gʊ chuuri." ¹⁵ Bagi bo go, "Nən Iliya" Bagi go nən gʊ wʊ yʊwe yəmmi nyǝra kwan a mura nəbbə yʊwe yəmməm bə chǝrem. ¹⁶ Mənni a fʊlla Hiridʊs a nuiyəng, go, "Yohana gə mwemən duri ka gun." ¹⁷ Bəra ki hangʊ ka taʊ a dəg mai Yohana jarəmməng bəra nəng nyiiya chi Filibusi wʊ hangʊ a naai mənni, wʊ bɨrɨ mo Hirodiyai. ¹⁸ Bəra ki Yohana sotən na Hiridʊsi go, "Me mənə sǝrra kak ka duutəng n'na nyiiya chʊmmi." ¹⁹ Bəra ki Hirodiya ka nui jwagər da jir dandəng, ka fau jutang kan gəng, mənna nyabə sǝr. ²⁰ Bəra rə Yʊlgoi na nəngngatang kə nyang ka Yohanang, Hiridʊs ka nui taatangʊ, kǝ farə go gə juu. A jiwa kaʊtən suu a yəm bangəmi ki, furii ka kiyare, mənni bo, ka kaʊtən suu we rə bwiləmri. ²¹ Mən ka gaiyəng, sǝr ka nyabwi, a fʊlla Hiridʊs a nəngnga jɨnii-jaʊra bwiləmra ko buwong ka gəngngi na buwowʊ nəbbə gram ba təm ba gəmməng na rə ba Galiliyəm. ²² Yʊwiya Hirodiyasi a be na yəl-yəlang a kak ka Hiridʊs tən fʊʊbəba gəməng, kə bwiya ləməng. Nidʊ a wumən nyiiyəng ka sotəna bwe chʊwi hi go, "Chəlla warigʊ ji mən fari, bən nən." ²³ Ka baʊtən bʊni go, "Chəlla warigʊ ji mən fari ki nanʊ gulo təm ba miyəmi ki, bən nən." ²⁴ Kə bwe chʊwi hi a kaba gwa neei go, "Wʊllai ji bən chillai?" "Dur da Yohana nəngnga batismai." ²⁵ Kə bwe chʊwi hi a kaʊbwi rə sǝgəng a gwa nidʊwi go, "Mən faʊ mo niye dur da Yohana nəngnga batismai a mura kasi kʊ nyang nyəngke." ²⁶ Ka daa nidʊ, mənna dəmən ba kwiila tən chǝllan da gən bəra rə bʊni ta baʊwi na rə fʊʊbə ba gəm. ²⁷ Bəra rə nyang, ka təm niwʊ barə kərangngi a mura bə torəm go di na be rə dur da Yohanan. Kə ni tori a diyəng ka mwewʊ dur hən a jarəməng. ²⁸ A be rə durhən a kasiyəng ka ne bwe chʊwi hiyəng, ka ditən gǝra neeng. ²⁹ Məssarbe ba gəm a nui jiwa nəngnga bwiyʊwʊng, ka be dəb bwiyangʊ a yɨga dəg a suwʊng. ³⁰ Nəb təmrəm həm a kaʊwe bwi a gwan Yesʊwiyəng, ka sotən warigʊ jɨna nəngngai tən jiya məssatən na nəbbi, ³¹ kən hangʊ a sotən na hanjiimi go, "Tə yɨgi a gʊ me nəb wi na tə gɨrmən bani." Bəra ki nəb ka nəngnga tən mwam ma hanjiimi, me rə sǝr da jaʊtangnga jɨnii-jaʊriyən. ³² Bəra rə nyang, kən hanjiim a dɨga bʊntəlong ngəng ka diya gʊ me nəb wiyəng. ³³ Nəb ba chuu hanjiim diyarəng, ka yəm, ka lu hanjiim rə səngniyəng yɨgiira gai, jɨrowʊra murtan jiiwʊ warigʊ. ³⁴ Jiwʊn hanjiim a laʊ nyii ya wimangngi na chuu mwama nəbbiyəng, Yesʊ ka nui kʊnang ka jiyəng, bəra ki, a chuu hanjiim nyəra maate me rə yaariyʊ. Kən hangʊ a sʊ məssatən jɨnii mwaməng. ³⁵ Yʊwa maang, kə məssarbə ba gəm a be gwa giyʊwʊng go, "Fʊlla ka suu, mənni nʊwa gʊ me kaini wi. ³⁶ Təm nəbba diya na yɨga təm bə rə dom, na murtə rə doi na nya sʊta jɨnii-jaʊri." ³⁷ Mənni ka ngatəna hanjiimiyəng sotənəng go, "Jɨn tə ne jɨnii-jaʊri na juwa." Hanjiim go! Bənnən yʊwe jɨnii-jaʊra dinarii beetə təsʊ wi ki ba laʊtǝnna ne nəbbi wʊ ga? ³⁸ Hangʊ a gul hanjiim go , "Tə ka tənə mwantə tə fʊm-fʊmi tə nyənne? Tə jǝgawe." A kaʊwe bwiyəng go, "Mwantə tə nʊ, na laatǝ təsʊ." ³⁹ Kən Hangʊ go tə dəg nəb a chiiro kʊltə-rə-kʊltə a jiiya yiir də yuwun. ⁴⁰ Kə nəbba chiiro kʊltə-kʊltəng, bagi bee kwan-kwan, bagi fʊrtə nʊ-tə nʊ. ⁴¹ Kən Hangʊ a dəb mwantə tə fʊm-fʊmi tə nʊ rə laatə təsʊ ka gʊg a jii a dəgtən kangngəng, ka ne məssarbə bangəm go ne nəbbəng. ⁴² Hanjiim warigʊ ka jʊwa a riira. ⁴³ Kʊsalanangʊ yǝn kʊrai ka riiro kʊtoni kwu a jɨr təsʊ. ⁴⁴ Nəbba jʊwam ka laʊ nee təttə nʊ. ⁴⁵ Rə kwa rə kwang ka dəg məssarbə ba gəm a bʊntəlong go di a kak ka gəng yɨgira Baisaida, a bukka sotən na nəb go diyang. ⁴⁶ Nəb a diyang, ka gwi a bang rʊwa nyiini. ⁴⁷ Yʊwa mang, bʊntəlong ka laʊ jʊgər da wimangngən mənni hangʊ ka təm fʊ. ⁴⁸ Hangʊ ka chuu nyəngkə hanjiim no kʊnang rəgəng, bəra rə səmba wimangngi wa gune rə kumniiyʊ. Rə yawii swiriyəng, hangʊ ka diye yowʊra jii ya hi farə go gə suu hanjiim. ⁴⁹ Mənni hanjiim a chuu hangʊ yowʊra jiiya hiiyəng, lʊngtənʊ go bwiyang, ka maʊ wʊriyəng. ⁵⁰ Bəra ki hanjiim a chuu hangʊwʊng ka nui taate. Rə kwa rə kwang, hangʊ ka sotən na hanjiimi go, "Tə taʊ furnan jɨnu." "Nən me!" "Taate kara magəne!" ⁵¹ Hangʊ a dɨga bʊntəlong na nya hanjiiməng, kə səmba siyəng. Hanjiim ka mənna bʊni deni. ⁵² Bəra ki hanjiim a fʊm bə yəm ba mwantə tə fʊm-fʊmi. Furna jiiyu ka kʊse. ⁵³ Bukkən hanjiim a yawʊng, ka be təm ba Genasara, ka bʊ bʊntəlong a gaiyəng. ⁵⁴ Hanjiim a jɨro mənne wa bʊntəlongngəng, nəb ka yəmme hangʊ rə kwa, ⁵⁵ ka diyawʊ rə səngni warigʊ a mura murta jiiyu dəbba wʊrə ba bwara-bwaraiyəm a baltəttə daarawi a jiiyu, fʊng hangʊ rə ge. ⁵⁶ Wunɨ ga wʊ hangʊ a dɨgga murtǝ kətəlei na rə təm ba jiyəmmi ki, mən be nəng nəb ba bwara-bwaraiyəm a gana bandʊwati. Chəllarə hangʊ go dugi tə məbra nyii ya dʊggi yangʊ, ba məbram warigʊ ka kwara.